Virender Sehwag Aryavir Sehwag: વીરેન્દ્ર સેહવાગના પુત્ર આર્યવીર સેહવાગે જુનિયર ક્રિકેટ બાદ હવે અંડર-19 ક્રિકેટમાં પણ પોતાની છાપ છોડવાનું શરૂ કરી દીધું છે. તાજેતરમાં ઓસ્ટ્રેલિયા અંડર-19 સામેની ત્રણ મેચની વનડે સિરીઝમાં આર્યવીરે કુલ 109 રન બનાવ્યા હતા. તેના આ પ્રદર્શન બાદ વીરેન્દ્ર સેહવાગે પુત્રના ખેલ અને તેને આપેલી સલાહ અંગે વાત કરી છે.
આર્યવીરને પિતાએ શું સલાહ આપી?
સેહવાગે જણાવ્યું કે સિરીઝ પહેલાં તેમણે આર્યવીરને એક ખાસ સલાહ આપી હતી. તેમણે પુત્રને કહ્યું હતું કે મેદાન પર ખુલ્લેઆમ રમો અને મોટા રન બનાવવાની ચિંતા ન કરો. જો તમે સ્વાભાવિક રમત રમશો તો મોટા રન આપમેળે આવશે. પરંતુ મોટા સ્કોર વિશે સતત વિચારતા રહેશો તો તેના પર દબાણ વધી શકે છે. સેહવાગે કહ્યું કે લોકો તમને પ્રેમ કરશે, તમારી ટીકા કરશે અને કેટલાક લોકો તમને નફરત પણ કરશે. પરંતુ ખેલાડીએ લોકો શું કહે છે તેના પર પ્રતિક્રિયા આપવાને બદલે પોતાના પ્રદર્શન અને રમત પર ધ્યાન આપવું જોઈએ.
‘લોકો શું કહે છે તેની ચિંતા ન કરો’
વીરેન્દ્ર સેહવાગે વધુમાં જણાવ્યું કે આર્યવીરે લોકોની અપેક્ષાઓ કરતાં પોતાના વિકાસને પ્રાથમિકતા આપવી જોઈએ. જો તમે રન બનાવી રહ્યા છો તો સમજવું કે તમારું પ્રદર્શન સારું છે અને જો રન નથી બનાવી રહ્યા તો તમારી રમત પર વધુ કામ કરવાની જરૂર છે. તેમણે પુત્રને સલાહ આપી કે લોકો જે કહેવું હોય તે કહેવા દો, પરંતુ ખેલાડીએ પોતાની પ્રક્રિયા, પ્રેક્ટિસ અને રમત પર ધ્યાન કેન્દ્રિત કરવું જોઈએ.
આર્યવીરના પ્રદર્શનથી સેહવાગ ખુશ
વીરેન્દ્ર સેહવાગ એ વાતથી ખુશ છે કે આર્યવીરે તેમની સલાહને ગંભીરતાથી લીધી. ઓસ્ટ્રેલિયા અંડર-19 સામેની ત્રણ મેચમાં આર્યવીરે કુલ 109 રન બનાવ્યા અને દરેક મેચમાં ટીમને સારી શરૂઆત અપાવવામાં યોગદાન આપ્યું. સિરીઝમાં તેનો સ્ટ્રાઈક રેટ 100થી વધુ રહ્યો હતો. જોકે, આર્યવીર સિરીઝ દરમિયાન અર્ધસદી ફટકારી શક્યો નહોતો. ત્રીજી મેચમાં તે 47 રન બનાવીને આઉટ થયો હતો. તેમ છતાં, તેના આ પ્રદર્શનને લઈને પિતા વીરેન્દ્ર સેહવાગે સંતોષ વ્યક્ત કર્યો છે.
