Vaibhav Suryavanshi’s Record-Breaking Knock: દુલીપ ટ્રોફી 2026ની સેમિફાઇનલ મેચમાં 15 વર્ષના યુવા ક્રિકેટર વૈભવ સૂર્યવંશીએ પોતાની તોફાની બેટિંગથી સૌને દંગ કરી દીધા છે. બેંગલુરુના BCCI સેન્ટર ઓફ એક્સેલન્સ (CoE) ગ્રાઉન્ડ-1 ખાતે ઈસ્ટ ઝોન તરફથી રમતા વૈભવે સેન્ટ્રલ ઝોનના બોલરો સામે આક્રમક અંદાજમાં બેટિંગ કરી હતી. તેણે માત્ર 81 બોલમાં 7 ચોગ્ગા અને 7 છગ્ગાની મદદથી 92 રનની શાનદાર ઇનિંગ રમી હતી. વૈભવે માત્ર 42 બોલમાં પોતાની અડધી સદી પણ પૂરી કરી હતી.
57 વર્ષ જૂનો ઐતિહાસિક રેકોર્ડ તૂટ્યો
પોતાની આ ધમાકેદાર ઇનિંગ દરમિયાન વૈભવે દુલીપ ટ્રોફીના ઇતિહાસમાં સૌથી નાની ઉંમરે અડધી સદી ફટકારવાનો 57 વર્ષ જૂનો રેકોર્ડ પોતાના નામે કરી લીધો છે. તેણે 15 વર્ષ અને 157 દિવસની ઉંમરે આ સિદ્ધિ મેળવી હતી. આ પહેલાં આ રેકોર્ડ 1969માં લક્ષ્મણ સિંહના નામે હતો, જેમણે 16 વર્ષ અને 23 દિવસની ઉંમરે દુલીપ ટ્રોફીમાં અડધી સદી ફટકારી હતી.
સચિન તેંડુલકરનો રેકોર્ડ તોડતા રહી ગયો નજીક
વૈભવ પોતાની પ્રથમ દુલીપ ટ્રોફી સદી તરફ ઝડપથી આગળ વધી રહ્યો હતો, પરંતુ સ્પિનર હર્ષ દુબેના બોલ પર મોટો શોટ રમવાના પ્રયાસમાં તે 92 રનના સ્કોર પર આઉટ થઈ ગયો. જો તે સદી પૂરી કરવામાં સફળ રહ્યો હોત, તો દુલીપ ટ્રોફીમાં સૌથી નાની ઉંમરે સદી ફટકારવાનો સચિન તેંડુલકરનો રેકોર્ડ તોડી શક્યો હોત. સચિને 1990-91ની દુલીપ ટ્રોફીમાં 17 વર્ષ અને 262 દિવસની ઉંમરે આ સિદ્ધિ મેળવી હતી.
મેચની સ્થિતિ અને પ્રથમ ઇનિંગનો સ્કોર
ઈસ્ટ ઝોને ટોસ જીતીને પ્રથમ બોલિંગ કરવાનો નિર્ણય લીધો હતો. ઈજાના કારણે ઈશાન કિશન ઉપલબ્ધ ન હોવાથી 15 વર્ષના વૈભવ સૂર્યવંશીએ ઈસ્ટ ઝોનની કેપ્ટનશીપ સંભાળી હતી.
પ્રથમ ઇનિંગમાં સેન્ટ્રલ ઝોનની ટીમ 266 રન બનાવીને ઓલઆઉટ થઈ ગઈ હતી. ટીમ તરફથી રિંકુ સિંહે 88 બોલમાં 60 રનની મહત્વપૂર્ણ ઇનિંગ રમી હતી. ઈસ્ટ ઝોન તરફથી મુકેશ કુમાર અને અભિજીત સરકારે 3-3 વિકેટ ઝડપી હતી, જ્યારે મોહમ્મદ શમીએ 2 વિકેટ લીધી હતી.
વૈભવ સૂર્યવંશીની 92 રનની તોફાની અને રેકોર્ડબ્રેકિંગ ઇનિંગના કારણે ઈસ્ટ ઝોને મેચમાં મજબૂત સ્થિતિ બનાવી લીધી છે. માત્ર 15 વર્ષની ઉંમરે વૈભવે પોતાની બેટિંગ અને રેકોર્ડથી ફરી એકવાર સાબિત કર્યું છે કે ભારતીય ક્રિકેટને એક મોટો યુવા સ્ટાર મળી રહ્યો છે.
