સૂર્યકુમાર યાદવ હવે દુબઈમાં બન્યા શાહરૂખ ખાનના પાડોશી: 'શાહરૂખ્સ રેસિડેન્સ'માં ખરીદ્યું આલીશાન ઘર

Suryakumar Yadav Buys Luxury Home in Dubai: ભારતીય ક્રિકેટ ટીમના બેટ્સમેન સૂર્યકુમાર યાદવ મેદાન પર પોતાના શાનદાર શૉટ્સ અને આક્રમક બેટિંગ માટે જાણીતા છે. પરંતુ આ વખતે સૂર્યા કોઈ ક્રિકેટ મેચના કારણે નહીં, પણ એક મોટા રોકાણને લીધે ચર્ચાના કેન્દ્રમાં આવ્યા છે. સૂર્યકુમાર યાદવે દુબઈના અતિ આલીશાન વિસ્તારમાં નવું ઘર ખરીદીને પોતાના ફેન્સને મોટું સરપ્રાઇઝ આપ્યું છે. ખાસ વાત એ છે કે આ નવું સરનામું તેમને બોલિવૂડના કિંગ શાહરૂખ ખાનના પાડોશી બનાવે છે.

ઇન્સ્ટાગ્રામ પર શેર કર્યો ખાસ વીડિયો
સૂર્યકુમારે પોતાના આ નવા આશિયાના વિશે સોશિયલ મીડિયા પ્લેટફોર્મ ઇન્સ્ટાગ્રામ પર એક ખાસ વીડિયો શેર કરીને ચાહકોને આ ખુશખબર આપી હતી. આ વીડિયોમાં તેઓ પોતાની પત્ની દેવિશા શેટ્ટી સાથે પ્રોપર્ટીના કાગળો પર સહી કરતા જોવા મળે છે. દસ્તાવેજો પર સહી કરતી વખતે પતિ-પત્ની વચ્ચે પ્રેમાળ હસી-મજાક પણ જોવા મળ્યો હતો. દુબઈના પ્રખ્યાત ડેવલપર 'Danube Properties' સાથે કરાર કરીને સૂર્યાએ પોતાની આ સપનાની પ્રોપર્ટી પોતાની નામે કરી લીધી છે.

શાહરૂખ ખાન સાથેનું ખાસ કનેક્શન
સૂર્યકુમાર યાદવે દુબઈના પ્રાઇમ લોકેશન 'દુબઈ મેરીટાઇમ સિટી'માં આવેલી પ્રોપર્ટીમાં રોકાણ કર્યું છે. Danube Group દ્વારા 'Shahrukhz Residences by Danube' નામે એક પ્રીમિયમ અને લક્ઝરી વોટરફ્રન્ટ પ્રોજેક્ટ આકાર પામી રહ્યો છે. સૂર્યાએ આ જ પ્રોજેક્ટમાં પોતાનું ઘર ખરીદ્યું છે, જેના કારણે તેઓ હવે બોલિવૂડ સુપરસ્ટાર શાહરૂખ ખાનની આ પ્રતિષ્ઠિત બિલ્ડિંગના પડોશમાં રહેશે.

શા માટે સૂર્યાએ પસંદ કર્યું દુબઈ?
દુબઈમાં ઘર ખરીદવાના નિર્ણય અંગે વાત કરતા સૂર્યકુમારે પોતાની આઈપીએલ દિવસોની યાદો તાજી કરી હતી. તેમણે જણાવ્યું કે તેઓ પ્રથમ વખત વર્ષ 2014માં IPL રમવા માટે દુબઈ આવ્યા હતા અને ત્યારબાદ 2020માં પણ ત્યાં લાંબો સમય વિતાવ્યો હતો. તેમણે ઉમેર્યું કે, "હવે આખું ભારત દુબઈ તરફ જોઈ રહ્યું છે. અહીંની લક્ઝરી અને જીવનશૈલી સાચે જ અદભૂત છે. મુંબઈમાં પણ સંપૂર્ણ સુરક્ષા છે, પણ સુરક્ષાના મામલે દુબઈનું વાતાવરણ ખૂબ શાંતિ અને સુકૂન આપે છે."

'લોન્ગિવિટી લાઉન્જ' અને સુવિધાઓએ જીત્યું દિલ
આ પ્રોજેક્ટની વિશેષતા અંગે વાત કરતા સૂર્યાએ કેપ્શનમાં લખ્યું કે, આ વોટરફ્રન્ટ રેસિડેન્સમાં 40થી વધુ પ્રીમિયમ સુવિધાઓ છે, પરંતુ જે બાબતે તેમનું દિલ જીતી લીધું તે છે અહીંનું 'લોન્ગિવિટી લાઉન્જ' (Longevity Lounge). કોઈપણ રેસિડેન્શિયલ પ્રોજેક્ટમાં હેલ્થ, રિકવરી અને ફિટનેસને ધ્યાનમાં રાખીને બનાવવામાં આવેલું આવું લાઉન્જ તેમણે પહેલીવાર જોયું હોવાનું જણાવ્યું હતું.