FIFA World Cup 2026: રમતગમત અને આંતરરાષ્ટ્રીય રાજકારણ વચ્ચેનો સંઘર્ષ હવે ફૂટબોલના સૌથી મોટા મંચ પર જોવા મળી રહ્યો છે. વર્ષ 2026માં યોજાનારા FIFA વર્લ્ડ કપ પહેલા એક મોટો વિવાદ ઉભો થયો છે. ઈરાનની ફૂટબોલ ટીમે સુરક્ષા અને રાજકીય કારણોસર યુનાઇટેડ સ્ટેટ્સમાં મેચ રમવા અંગે ગંભીર ચિંતા વ્યક્ત કરી છે અને પોતાની મેચો અન્ય દેશમાં ખસેડવાની માંગ કરી છે. આ ઘટનાક્રમે રમત જગતમાં ખળભળાટ મચાવી દીધો છે, કારણ કે આ વિવાદ બરાબર એવો જ છે જેવો થોડા સમય પહેલા ICC મેન્સ T20 વર્લ્ડ કપ દરમિયાન ભારત અને બાંગ્લાદેશ વચ્ચે જોવા મળ્યો હતો.
'અમેરિકા નહીં, મેક્સિકોમાં રમીશું'
ઈરાની ફૂટબોલ ફેડરેશને અધિકૃત રીતે FIFA ને વિનંતી કરી છે કે તેમની ગ્રુપ સ્ટેજની મેચો, જે હાલમાં અમેરિકાના વિવિધ શહેરોમાં નિર્ધારિત છે, તેને યુનાઇટેડ સ્ટેટ્સની બહાર ખસેડવામાં આવે. ઈરાને દલીલ કરી છે કે મધ્ય પૂર્વમાં વધતા લશ્કરી તણાવ અને અમેરિકા સાથેના વણસેલા સંબંધોને જોતા તેમના ખેલાડીઓની સુરક્ષા જોખમમાં મુકાઈ શકે છે. આ સુરક્ષા ચિંતાઓની સાથે ઈરાને વિઝા નિયમો, મુસાફરી પ્રતિબંધો અને અમેરિકાના પ્રતિકૂળ રાજકીય વાતાવરણને પણ મુખ્ય અવરોધ ગણાવ્યા છે.
મેક્સિકોના રાષ્ટ્રપતિની મોટી જાહેરાત
ઈરાનની આ ચિંતાઓ વચ્ચે મેક્સિકો એક રક્ષક તરીકે સામે આવ્યું છે. મેક્સિકોના રાષ્ટ્રપતિ ક્લાઉડિયા શેનબૌમે એક મહત્વપૂર્ણ નિવેદન આપતા જણાવ્યું છે કે, જો ફૂટબોલની સર્વોચ્ચ સંસ્થા FIFA ઈચ્છે તો મેક્સિકો ઈરાનની તમામ મેચોનું આયોજન કરવા માટે સંપૂર્ણ તૈયાર છે. તેમણે સ્પષ્ટ કર્યું કે મેક્સિકોને ઈરાનની યજમાની કરવામાં કોઈ સમસ્યા નથી. નોંધનીય છે કે 2026નો વર્લ્ડ કપ સંયુક્ત રીતે અમેરિકા, મેક્સિકો અને કેનેડામાં યોજાવાનો છે, તેથી મેક્સિકોની આ ઓફર વ્યૂહાત્મક રીતે મહત્વની માનવામાં આવે છે.
ક્રિકેટના વિવાદનું પુનરાવર્તન?
આ સમગ્ર મામલો થોડા સમય પહેલા ક્રિકેટ જગતમાં બનેલી ઘટનાની યાદ અપાવે છે. T20 વર્લ્ડ કપ દરમિયાન બાંગ્લાદેશે સુરક્ષાના કારણોસર ભારત જવાનો ઇનકાર કર્યો હતો અને મેચો શ્રીલંકા કે પાકિસ્તાન જેવા તટસ્થ સ્થળે ખસેડવાની માંગ કરી હતી. અંતે સહમતી ન સધાતા બાંગ્લાદેશ ટુર્નામેન્ટમાંથી બહાર થઈ ગયું હતું અને સ્કોટલેન્ડને તક મળી હતી. હવે ફૂટબોલ વિશ્વમાં પણ ઈરાન તે જ પથ પર ચાલી રહ્યું હોય તેવું લાગી રહ્યું છે.
FIFA સામે મોટો પડકાર
જોકે, ઈરાનની આ માંગણી સંતોષવી FIFA માટે લોઢાના ચણા ચાવવા સમાન છે. વર્લ્ડ કપનું શેડ્યૂલ, સ્ટેડિયમનું બુકિંગ, ટિકિટિંગ અને બ્રોડકાસ્ટિંગ અધિકારો પહેલેથી જ નક્કી થઈ ગયા છે. છેલ્લી ઘડીએ મેચો એક દેશમાંથી બીજા દેશમાં ખસેડવી એ લાજિસ્ટિકલ અને આર્થિક રીતે મોટું નુકસાન લાવી શકે છે. FIFAએ હજુ સુધી આ મામલે મૌન સેવ્યું છે, પરંતુ જો ઈરાનની શરતો નહીં સ્વીકારાય, તો ઈરાન વર્લ્ડ કપમાંથી ખસી જવાની ચીમકી પણ આપી શકે છે.
ફૂટબોલ ચાહકોની નજર FIFA ના આગામી નિર્ણય પર
11 જૂનથી 19 જુલાઈ, 2026 દરમિયાન યોજાનારો આ વર્લ્ડ કપ અત્યાર સુધીનો સૌથી મોટો અને ભવ્ય હોવાનો દાવો કરવામાં આવી રહ્યો છે, પરંતુ ઈરાન અને અમેરિકા વચ્ચેનો આ 'કોલ્ડ વોર' ટૂર્નામેન્ટની મજા બગાડી શકે છે. હવે વિશ્વભરના ફૂટબોલ ચાહકોની નજર FIFA ના આગામી નિર્ણય પર ટકેલી છે.
