Rinku Singh Dance Video: UP T20 League 2026ની ફાઇનલમાં મેરઠ મેવરિક્સે શાનદાર પ્રદર્શન કરીને લખનૌ ફાલ્કન્સને 94 રનથી હરાવી ટ્રોફી પોતાના નામે કરી છે. રિંકુ સિંહની આગેવાની હેઠળ મેરઠે 20 ઓવરમાં 203 રન બનાવ્યા હતા, જેના જવાબમાં લખનૌની ટીમ માત્ર 109 રનમાં ઓલઆઉટ થઈ ગઈ. આ જીત બાદ રિંકુ સિંહનો ટીમ સાથે ડાન્સ કરતો વીડિયો પણ સોશિયલ મીડિયા પર ચર્ચામાં છે.
દિવ્યાંશ જોશીની રેકોર્ડબ્રેક સદી
મેરઠની જીતના હીરો યુવા બેટ્સમેન દિવ્યાંશ જોશી રહ્યા હતા. તેમણે ફાઇનલમાં માત્ર 40 બોલમાં 105 રનની તોફાની ઇનિંગ રમી હતી. તેમની ઇનિંગમાં 12 ચોગ્ગા અને 7 છગ્ગા સામેલ હતા. દિવ્યાંશે માત્ર 37 બોલમાં સદી પૂરી કરીને UPT20ના ઇતિહાસમાં સૌથી ઝડપી સદીનો રેકોર્ડ પોતાના નામે કર્યો હતો. તેઓ 105 રન બનાવી રિટાયર્ડ આઉટ થયા હતા.
મેરઠે લખનૌ સામે 204 રનનો પડકાર મૂક્યો
દિવ્યાંશની વિસ્ફોટક બેટિંગના કારણે મેરઠ મેવરિક્સે નિર્ધારિત 20 ઓવરમાં 7 વિકેટે 203 રન બનાવ્યા હતા. આ સાથે લખનૌ ફાલ્કન્સ સામે 204 રનનો પડકાર મૂકાયો હતો. જો, કે લખનૌની શરૂઆતથી જ વિકેટો પડતી રહી અને ટીમ મેરઠના બોલિંગ આક્રમણ સામે ટકી શકી નહીં. અંતે લખનૌની આખી ટીમ 16 ઓવરમાં 109 રન બનાવી ઓલઆઉટ થઈ ગઈ.
વિશાલ ચૌધરીની બોલિંગે પણ કમાલ કર્યો
મેરઠની જીતમાં દિવ્યાંશની સદી જેટલી જ મહત્વની ભૂમિકા બોલર વિશાલ ચૌધરીની રહી. તેમણે 4 ઓવરમાં માત્ર 24 રન આપીને 4 વિકેટ ઝડપી હતી. તેમની શાનદાર બોલિંગના કારણે લખનૌની રનચેઝ પર શરૂઆતથી જ દબાણ રહ્યું અને 204 રનના લક્ષ્ય સામે ટીમ માત્ર 109 રનમાં સમેટાઈ ગઈ.
રિંકુ સિંહની કેપ્ટન્સીમાં મેરઠ ફરી ચેમ્પિયન
રિંકુ સિંહની આગેવાની હેઠળ મેરઠ મેવરિક્સે UPT20માં બીજી વખત ખિતાબ જીત્યો છે. આ ટીમ સતત ચોથી વખત ફાઇનલમાં પહોંચી હતી અને હવે બીજી વખત ચેમ્પિયન બની છે. ફાઇનલમાં રિંકુ બેટિંગમાં માત્ર 1 રન બનાવી શક્યા હતા, પરંતુ તેમની કેપ્ટન્સીમાં ટીમે એકતરફી જીત મેળવી. ટ્રોફી જીત્યા બાદ રિંકુ સિંહે ટીમના સાથી ખેલાડીઓ સાથે મેદાન પર ડાન્સ કરીને જીતની ઉજવણી કરી હતી. તેમનો આ અંદાજ ચાહકોમાં ખાસ ચર્ચાનો વિષય બન્યો છે.
મેરઠની બીજી UPT20 ટ્રોફી
મેરઠ મેવરિક્સે ફાઇનલમાં બેટિંગ અને બોલિંગ બંને વિભાગમાં દબદબો જમાવ્યો. દિવ્યાંશની રેકોર્ડ સદી અને વિશાલ ચૌધરીની ચાર વિકેટ બાદ ટીમે 94 રનની મોટી જીત મેળવીને UPT20 2026ની ટ્રોફી પોતાના નામે કરી છે.
