Rinku Singh, UP T20 League 2026: યુપી ટી20 લીગ 2026માં રિંકુ સિંહે ફરી એકવાર પોતાની વિસ્ફોટક બેટિંગથી ધમાલ મચાવી છે. 23 ઓગસ્ટે વરસાદથી પ્રભાવિત મેરઠ મેવેરિક્સ અને ગોરખપુર લાયન્સ વચ્ચે રમાયેલી 8-8 ઓવરની મેચમાં રિંકુએ માત્ર એક ઓવરમાં 28 રન ફટકારીને મેચનો રંગ બદલી નાખ્યો હતો.
એક ઓવરમાં 5 બાઉન્ડ્રી, ફટકાર્યા 28 રન
મેરઠ મેવેરિક્સની ઇનિંગ્સની છઠ્ઠી ઓવરમાં રિંકુ સિંહે ગોરખપુર લાયન્સના લેગ-સ્પિનર વિશાલ નિષાદને નિશાન બનાવ્યો હતો. ઓવરના પ્રથમ બોલ પર રિંકુએ સિક્સ ફટકારી હતી. ત્યારબાદ ચોગ્ગો, સિક્સ, સિક્સ અને ચોગ્ગો ફટકારીને માત્ર પાંચ બોલમાં જ 26 રન બનાવી લીધા હતા. છેલ્લા બોલે બે રન સાથે આ ઓવરમાં કુલ 28 રન થયા હતા. રિંકુની આ તોફાની બેટિંગે મેરઠ મેવેરિક્સને લક્ષ્ય સુધી ઝડપથી પહોંચાડવામાં મોટી ભૂમિકા ભજવી હતી.
વિશાલ નિષાદે IPLમાં પણ બનાવ્યું હતું સ્થાન
રિંકુએ જે બોલરની એક ઓવરમાં 28 રન ફટકાર્યા તે વિશાલ નિષાદ છે. લેગ-સ્પિનર વિશાલ ક્રિકેટમાં આગળ વધતા પહેલાં પોતાના પિતાને મજૂરીમાં મદદ કરતો હતો. IPL 2026ની મેગા ઓક્શનમાં વિશાલ નિષાદને પંજાબ કિંગ્સે ₹30 લાખમાં ખરીદ્યો હતો. જોકે, યુપી ટી20 લીગની આ મેચમાં રિંકુ સિંહે તેની એક ઓવરને સંપૂર્ણપણે ધ્વસ્ત કરી નાખી હતી.
ગોરખપુર લાયન્સે આપ્યો હતો 92 રનનો ટાર્ગેટ
વરસાદને કારણે મેચ 8 ઓવરની કરવામાં આવી હતી. ગોરખપુર લાયન્સે પ્રથમ બેટિંગ કરતાં 6 વિકેટે 91 રન બનાવ્યા હતા. ટીમ તરફથી જીસાન અંસારીએ 4 વિકેટ ઝડપી હતી. જવાબમાં મેરઠ મેવેરિક્સે માત્ર 6.4 ઓવરમાં એક પણ વિકેટ ગુમાવ્યા વિના 92 રનનો લક્ષ્યાંક હાંસલ કરી લીધો હતો.
7 બોલમાં 29 રન બનાવી રિંકુ રહ્યો અણનમ
મેરઠ તરફથી ચિકારા 44 રને અણનમ રહ્યો હતો. બીજી તરફ રિંકુ સિંહે માત્ર 7 બોલમાં 29 રન ફટકારીને મેચને એકતરફી બનાવી દીધી હતી. રિંકુની આ ઇનિંગ્સમાં તેની આક્રમક બેટિંગ ફરી એકવાર જોવા મળી હતી. વરસાદથી ટૂંકાયેલી મેચમાં તેણે મળેલી થોડી જ તકનો ભરપૂર ફાયદો ઉઠાવી ટીમને શાનદાર જીત અપાવી હતી.
