Asian Para Games 2026 Nagoya: જાપાનના નાગોયા ખાતે શરૂ થયેલી પેરા એશિયન ગેમ્સ-2026ના પ્રથમ દિવસે સોમવારે ભારતીય પેરા શૂટર્સે શાનદાર પ્રદર્શન કરીને દેશને એકસાથે બે મેડલ અપાવ્યા છે. મહિલાઓની 10 મીટર એર રાઇફલ સ્ટેન્ડિંગ SH1 ઇવેન્ટમાં ભારતીય શૂટર મોના અગ્રવાલે ગોલ્ડ મેડલ અને દેશની જ સ્ટાર શૂટર અવની લેખરાએ સિલ્વર મેડલ જીતીને 'વન-ટુ ફિનિશ' હિસ્ટ્રી બનાવી છે. ક્વોલિફિકેશન રાઉન્ડમાં મોના અગ્રવાલે 629.1નો અદભુત સ્કોર કરીને પેરા એશિયન ગેમ્સનો નવો ક્વોલિફિકેશન રેકોર્ડ પણ કાયમ કર્યો હતો.
9 મહિનાની ઉંમરે પોલિયો થયો છતાં હિંમત ન હારી મોના અગ્રવાલ
મોના અગ્રવાલ રાજસ્થાનના સીકર જિલ્લાની વતની અને જાણીતી પેરા-શૂટિંગ ખેલાડી છે. તેમનો જન્મ 8 નવેમ્બર, 1987ના રોજ થયો હતો. માત્ર 9 મહિનાની બાળવયે તેમને પોલિયો થઈ ગયો હતો, જેના કારણે તેમના બંને પગ પ્રભાવિત થયા હતા. પેરા-શૂટિંગમાં પ્રવેશતા અગાઉ મોનાએ પેરા-એથ્લેટિક્સ, પેરા-પાવરલિફ્ટિંગ અને સીટિંગ વોલીબોલ જેવી રમતોમાં પણ પોતાની ક્ષમતા સાબિત કરી હતી.
રાજસ્થાન ટીમની કેપ્ટનશિપથી લઈને પેરિસ પેરાલિમ્પિક્સ બ્રોન્ઝ અને અર્જુન એવોર્ડ
વર્ષ 2019માં મોનાએ રાજસ્થાનની મહિલા સીટિંગ વોલીબોલ ટીમનું નેતૃત્વ કરીને નેશનલ ચેમ્પિયનશિપમાં ગોલ્ડ મેડલ જીત્યો હતો. ડિસેમ્બર 2021માં તેમણે રાઇફલ શૂટિંગની તાલીમ શરૂ કરી હતી અને 2022માં નેશનલ લેવલે સિલ્વર મેળવ્યો હતો. વર્ષ 2023 તથા 2024માં નવી દિલ્હી ખાતે વર્લ્ડ શૂટિંગ પેરા સ્પોર્ટ વર્લ્ડ કપમાં 250.7ના સ્કોર સાથે ગોલ્ડ જીતીને તેમણે એશિયન રેકોર્ડ સ્થાપ્યો હતો. પેરિસ 2024 પેરાલિમ્પિક્સમાં બ્રોન્ઝ મેડલ જીતનાર મોનાને 2024માં દેશના પ્રતિષ્ઠિત 'અર્જુન એવોર્ડ'થી નવાજવામાં આવ્યા હતા.
10 વર્ષની ઉંમરે કાર એક્સિડન્ટમાં કરોડરજ્જુની ઈજા
બીજી તરફ સિલ્વર મેડલ વિજેતા અવની લેખરા 2012માં ભયાનક કાર એક્સિડન્ટનો ભોગ બની હતી, જેમાં તેમની કરોડરજ્જુમાં ગંભીર ઈજા થઈ હતી. તે સમયે તેઓ માત્ર 10 વર્ષના હતા. રિકવરી દરમિયાન તેમના પિતાએ તેમને રમતગમત સાથે જોડાવા પ્રોત્સાહિત કર્યા હતા. ભારતના ઓલિમ્પિક શૂટિંગ ચેમ્પિયન અભિનવ બ્રિન્દ્રાની આત્મકથા ‘એ શોટ એટ હિસ્ટ્રી’ વાંચીને પ્રેરણા મેળવ્યા બાદ તેમણે 2015માં શૂટિંગની શરૂઆત કરી હતી, જેણે તેમનામાં આત્મવિશ્વાસ ફરી જગાવ્યો હતો.
વધારાની માહિતી: પેરા એશિયન ગેમ્સ 2026 અને LA 2028 પેરાલિમ્પિક્સ ક્વોટા
LA-2028 પેરાલિમ્પિક્સ ક્વોટા સ્લોટ: આ સિલ્વર મેડલ જીતવાની સાથે જ અવની લેખરાએ 2028 લોસ એન્જલસ (LA 2028) પેરાલિમ્પિક્સ માટેનો ભારતનો સત્તાવાર ક્વોટા સ્લોટ સુરક્ષિત કરી લીધો છે. મોના અગ્રવાલે વર્લ્ડ ચેમ્પિયનશિપ દ્વારા આ ક્વોટા અગાઉથી જ મેળવી લીધો હતો.
દક્ષિણ કોરિયાને બ્રોન્ઝ: આ જ ઇવેન્ટના ફાઇનલમાં 250.0ના રેકોર્ડ સ્કોર સાથે મોના અગ્રવાલે પોતાની સાથી અવની લેખરાને માત્ર 0.4 પોઇન્ટના માર્જિનથી હરાવીને ગોલ્ડ મેળવ્યો હતો, જ્યારે દક્ષિણ કોરિયાની યુનરી લી એ બ્રોન્ઝ મેડલ મેળવ્યો હતો.
SH1 કેટેગરી: SH1 કેટેગરી એવા પેરા શૂટર્સ માટે હોય છે જેમના નીચેના અંગોમાં શારીરિક દિવ્યાંગતા હોય છે અને તેઓ વ્હીલચેર કે ચેર પર બેસીને શૂટિંગ કરે છે.
