Asian Games 2026:એશિયન ગેમ્સ 2026નું કાઉન્ટડાઉન શરૂ થઈ ગયું છે અને તમામ ખેલાડીઓ પોતાના ઉત્કૃષ્ટ પ્રદર્શન માટે સખત મહેનત કરી રહ્યા છે. આ વખતે ભારતની 207 સભ્યોની વિશાળ ટીમ વર્ષ 2022ના પોતાના જૂના રેકોર્ડને તોડીને વધુ મેડલ જીતવાના ઈરાદા સાથે મેદાનમાં ઊતરવા જઈ રહી છે. પરંતુ આ મહત્વપૂર્ણ ટૂર્નામેન્ટ શરૂ થાય તે પહેલાં જ ભારતની સૌથી મોટી એવી એથ્લેટિક્સ ટીમ સામે એક મોટો વિઝા વિવાદ આવીને ઊભો રહ્યો છે.
5 ભારતીય ખેલાડીઓના વિઝા અટવાયા
મળતી માહિતી મુજબ, ભારતીય એથ્લેટિક્સ ટીમના મોટાભાગના સભ્યો જાપાન પહોંચી ચૂક્યા છે, પરંતુ હજુ પણ 5 ભારતીય ખેલાડીઓને જાપાનના વિઝા મળવાના બાકી છે. એશિયન ગેમ્સમાં એથ્લેટિક્સની મુખ્ય સ્પર્ધાઓ 23 સપ્ટેમ્બરથી આઈચી-નાગોયા ખાતે શરૂ થવાની છે. આવી સ્થિતિમાં સમયસર વિઝા ન મળવાને કારણે એથ્લેટ્સ અને સ્પોર્ટ્સ ફેડરેશનની ચિંતાઓમાં મોટો વધારો થયો છે.
શા માટે ઊભી થઈ વિઝાની સમસ્યા?
આ વિઝા વિલંબ પાછળનું મુખ્ય કારણ ટેકનિકલ પ્રક્રિયા બતાવવામાં આવી રહ્યું છે. પાસપોર્ટ અને વિઝા આઉટસોર્સિંગ કંપની VFS એવો આગ્રહ રાખી રહી છે કે અરજીઓ માત્ર એ જ સ્થળે જમા કરાવવામાં આવે જ્યાંથી ખેલાડીઓના પાસપોર્ટ ઈશ્યૂ (જારી) થયા હોય. અલગ-અલગ રાજ્યોમાંથી આવતા ખેલાડીઓ માટે આ નિયમના કારણે મુશ્કેલી ઊભી થઈ છે. જોકે, એથ્લેટિક્સ ફેડરેશન ઓફ ઈન્ડિયા (AFI) ને આશા છે કે સરકારની મદદથી આ મામલો ટૂંક સમયમાં ઉકેલાઈ જશે.
એક્લિમેટાઇઝેશન કેમ્પ ગુમાવવાનો ભય
જાપાનના હવામાન અને વાતાવરણ સાથે અનુકૂલન સાધવા માટે ભારતીય ટીમ માટે ખાસ 'એક્લિમેટાઇઝેશન કેમ્પ'નું આયોજન કરવામાં આવ્યું છે. બાકીના ખેલાડીઓ હાલમાં જાપાનની સુકુબા યુનિવર્સિટીમાં તાલીમ લઈ રહ્યા છે. વિઝામાં વિલંબને કારણે જે 5 ખેલાડીઓ ભારતમાં અટવાયા છે, તેમને આ મહત્વપૂર્ણ ટ્રેનિંગ કેમ્પમાં બહુ ઓછો સમય મળશે અથવા તો તેમણે સીધા જ નાગોયા ખાતે મુખ્ય ટીમ સાથે જોડાવું પડશે.
એથ્લેટિક્સ સિવાય અન્ય રમતોની તૈયારીઓ
ઉલ્લેખનીય છે કે, એશિયન ગેમ્સમાં એથ્લેટિક્સ પછી હોકી ભારતનું બીજું સૌથી મોટું 40 સભ્યોનું ગ્રુપ છે. બીજી તરફ, ક્રિકેટમાં ભારતીય ટીમે તેના ઉત્કૃષ્ટ ICC રેન્કિંગના આધારે સીધો ક્વોર્ટર-ફાઇનલમાં પ્રવેશ મેળવી લીધો છે. ભારતીય ક્રિકેટ ટીમ પોતાની પ્રથમ મેચ 28 સપ્ટેમ્બરે રમશે. હવે સૌની નજર એ વાત પર ટકેલી છે કે વિઝાની સમસ્યાનો સામનો કરી રહેલા 5 ખેલાડીઓ સમયસર જાપાન પહોંચી શકે છે કે નહીં.
