Asian Para Games 2026: ભારતીય પેરા જુડો ખેલાડી કપિલ પરમારે એશિયન પેરા ગેમ્સમાં શાનદાર પ્રદર્શન કરીને બ્રોન્ઝ મેડલ પોતાના નામે કર્યો છે. પુરુષોની J1 -70 કિલોગ્રામ વજન શ્રેણીમાં કપિલે પ્લેઓફ મુકાબલામાં ઇન્ડોનેશિયાના અહનાફ રાફલી શિદકીને હરાવીને પોડિયમ પર સ્થાન મેળવ્યું હતું. જોકે, કપિલનો ઇરાદો ગોલ્ડ મેડલ જીતવાનો હતો, પરંતુ સેમિફાઇનલમાં મળેલી હાર બાદ તેણે બ્રોન્ઝ મેડલથી સંતોષ માનવો પડ્યો હતો.
સેમિફાઇનલમાં હાર બાદ પ્લેઓફમાં જીત
કપિલ પરમાર સેમિફાઇનલ મુકાબલામાં ઇન્ડોનેશિયાના જુનૈદી સામે ટકરાયો હતો. આ મુકાબલામાં તેને 0-1થી હારનો સામનો કરવો પડ્યો હતો. ત્યારબાદ બ્રોન્ઝ મેડલ માટેના પ્લેઓફ મુકાબલામાં કપિલે ફરી મજબૂત વાપસી કરી અને ઇન્ડોનેશિયાના અહનાફ રાફલી શિદકીને હરાવીને મેડલ જીત્યો હતો. આ મુકાબલો એક મિનિટથી થોડો વધુ સમય ચાલ્યો હતો.
ગોલ્ડ જીતવાનું સપનું અધૂરું, બ્રોન્ઝ મેડલથી સંતોષ
મેડલ જીત્યા બાદ કપિલ પરમાર ભાવુક થઈ ગયો હતો. તેણે પોતાની લાગણીઓ વ્યક્ત કરતાં કહ્યું હતું કે તે અહીં ગોલ્ડ મેડલ જીતવાના ઇરાદા સાથે આવ્યો હતો, પરંતુ અંતે બ્રોન્ઝ મેડલથી સંતોષ માનવો પડ્યો. કપિલે કહ્યું, “આજે ગોલ્ડની બાબતમાં નસીબ મારા પક્ષમાં નહોતું, પરંતુ હું આ બ્રોન્ઝ મેડલ માટે આભારી છું. મેં ખૂબ મહેનત કરી છે અને લાંબા સમય પછી આ મારો પહેલો મેડલ છે.”
શું છે જુડોની J1 શ્રેણી?
જુડોની J1 શ્રેણી ગંભીર દૃષ્ટિની ક્ષતિ ધરાવતા ખેલાડીઓ માટે હોય છે. તેમાં સંપૂર્ણપણે દૃષ્ટિહીન ખેલાડીઓથી લઈને પ્રકાશની મર્યાદિત અનુભૂતિ કરી શકતા ખેલાડીઓનો સમાવેશ થાય છે. આવી સ્પર્ધાઓમાં ખેલાડીઓ પોતાની શારીરિક ક્ષમતા, તકનીક અને તાલીમના આધારે પ્રતિસ્પર્ધી સામે મુકાબલો કરે છે.
પેરાલિમ્પિક્સમાં પણ જીતી ચૂક્યો છે બ્રોન્ઝ
કપિલ પરમાર અગાઉ પણ આંતરરાષ્ટ્રીય સ્તરે ભારતનું નામ રોશન કરી ચૂક્યો છે. તેણે 2024ના પેરિસ પેરાલિમ્પિક્સમાં પણ બ્રોન્ઝ મેડલ જીત્યો હતો. આ ઉપરાંત, વર્ષ 2019ની કોમનવેલ્થ ચેમ્પિયનશિપમાં તેણે ગોલ્ડ મેડલ મેળવીને પોતાની પ્રતિભાનો પરિચય આપ્યો હતો. કપિલની માતા છેલ્લા કેટલાક સમયથી બીમાર હોવાનું પણ જણાવાયું છે. આવા વ્યક્તિગત પડકારો વચ્ચે આંતરરાષ્ટ્રીય સ્પર્ધામાં મેડલ જીતવો તેના માટે મહત્ત્વપૂર્ણ સિદ્ધિ છે. એશિયન પેરા ગેમ્સમાં મળેલો આ બ્રોન્ઝ મેડલ કપિલની મહેનત, સંઘર્ષ અને જુડોમાં તેની સતત પ્રગતિને દર્શાવે છે.
