Mohammed Siraj Controversy: ન્યૂઝીલેન્ડ સામેની વેલિંગ્ટન ટેસ્ટની પ્લેઈંગ ઇલેવનમાંથી ભારતીય ઝડપી બોલર મોહમ્મદ સિરાજને બહાર રાખવામાં આવતાં રાજકીય વિવાદ શરૂ થયો છે. કોંગ્રેસ સાંસદ ઈમરાન મસૂદે સિરાજના નામના આધારે તેમની સાથે ભેદભાવ થતો હોવાનો આરોપ લગાવ્યો હતો. હવે ભારતના પૂર્વ કેપ્ટન કપિલ દેવે આ વિવાદ પર પ્રતિક્રિયા આપતાં કહ્યું છે કે દરેક વ્યક્તિને ખુશ રાખી શકાય નહીં. તેમણે સ્પષ્ટ કર્યું કે ટીમની પસંદગીનો નિર્ણય પસંદગીકારો, કેપ્ટન અને ટીમ મેનેજમેન્ટનો હોય છે.
'દરેકને ખુશ રાખવા શક્ય નથી': કપિલ દેવ
વાતચીત દરમિયાન કપિલ દેવને ઈમરાન મસૂદના આરોપો અંગે સવાલ પૂછવામાં આવ્યો હતો. તેના જવાબમાં તેમણે કહ્યું હતું કે, 'આ જવાબદારી પસંદગીકારો, કેપ્ટન અને ટીમ મેનેજમેન્ટની છે. આ બાબતે પસંદગીકારોને પૂછો, હું કોઈ નથી. અમારા જેવા લોકોએ આના પર ટિપ્પણી ન કરવી જોઈએ. જે લોકો પાસે આ જવાબદારી છે, તેમણે જ જવાબ આપવો જોઈએ. મને લાગે છે કે તેઓ ખૂબ જ સારું કામ કરી રહ્યા છે. આપણે દરેક વ્યક્તિને ખુશ રાખી શકતા નથી.'
વ્યક્તિગત પસંદ-નાપસંદ કરતાં ટીમની યોજના મહત્ત્વની
ભારતીય ક્રિકેટની પસંદગી પ્રક્રિયા પર ભરોસો વ્યક્ત કરતાં કપિલ દેવે વધુમાં જણાવ્યું હતું કે વ્યક્તિગત પસંદ કે નાપસંદ કરતાં ટીમની યોજના અને દેશનું પ્રદર્શન વધુ મહત્ત્વનું છે. તેમણે કહ્યું હતું કે, 'તમે કોઈ સિસ્ટમની ટીકા ન કરી શકો, કારણ કે તે આ જ રીતે બનાવવામાં આવી છે. ભારતીય ક્રિકેટ ટીમ સારું પ્રદર્શન કરી રહી છે તે વધુ મહત્ત્વનું છે. મને સિરાજ પસંદ છે, પરંતુ ટીમ પસંદ કરવાનો નિર્ણય પસંદગીકારો, મેનેજર અને કેપ્ટનનો જ હોય છે. અમારી પસંદ-નાપસંદથી કોઈ ફરક પડતો નથી. સંગઠન કઈ રીતે યોજના બનાવી રહ્યું છે તે મહત્ત્વનું છે.'
શું હતો કોંગ્રેસ સાંસદ ઈમરાન મસૂદનો આરોપ?
આ સમગ્ર વિવાદની શરૂઆત ન્યૂઝીલેન્ડ સામે વેલિંગ્ટનમાં રમાયેલી પ્રથમ ટેસ્ટની પ્લેઈંગ ઇલેવનમાં મોહમ્મદ સિરાજને સ્થાન ન મળતાં થઈ હતી. આ મુદ્દે કોંગ્રેસ સાંસદ ઈમરાન મસૂદે ટીમની પસંદગી પર સવાલ ઉઠાવ્યા હતા. તેમણે આરોપ લગાવ્યો હતો કે સારા પ્રદર્શન છતાં સિરાજને ટીમમાં સ્થાન આપવામાં આવ્યું નથી અને તેમના નામના કારણે ભેદભાવ કરવામાં આવ્યો છે. ઈમરાન મસૂદે કહ્યું હતું કે, 'એવું કહેવામાં આવી રહ્યું છે કે સારા પ્રદર્શન છતાં તેમને ટીમમાં જગ્યા આપવામાં આવી નથી. તેમનું નામ સિરાજ છે અને આ જ કારણે તેમને સ્થાન મળ્યું નથી. જો તમે સારા પ્રદર્શન છતાં તેમને નથી પસંદ કરી રહ્યા, તો તેમાં ભેદભાવ સ્પષ્ટપણે દેખાઈ આવે છે.' આ નિવેદન બાદ ક્રિકેટ ટીમની પસંદગીને લઈને રાજકીય ચર્ચા શરૂ થઈ હતી. હવે કપિલ દેવે પસંદગીકારો અને ટીમ મેનેજમેન્ટની જવાબદારી પર ભાર મૂકીને આ વિવાદમાં પોતાનો મત રજૂ કર્યો છે.








