Aaryavir Sehwag India U-19 Squad: ઓસ્ટ્રેલિયા અંડર-19 ક્રિકેટ ટીમના ભારત પ્રવાસ પહેલા ભારતીય ક્રિકેટ કંટ્રોલ બોર્ડ (BCCI)ની મેન્સ સિલેક્શન કમિટીએ ભારત U-19 સ્ક્વોડની અધિકૃત જાહેરાત કરી દીધી છે. પસંદગી સમિતિ દ્વારા ઓસ્ટ્રેલિયા અંડર-19 સામે ત્રણ વન-ડે મેચ અને બે મલ્ટી-ડે (ચાર દિવસીય) મેચો માટે અલગ-અલગ ટીમની ઘોષણા કરવામાં આવી છે. BCCIના માનદ સચિવ દેવજીત સૈકિયાએ આ ટીમોની પુષ્ટિ કરી છે. આ સિરીઝની સૌથી વિશેષ બાબત એ છે કે, ભારતીય ક્રિકેટના દિગ્ગજ ખેલાડી વીરેન્દ્ર સહેવાગના પુત્ર આર્યવીર સહેવાગ અને પૂર્વ કેપ્ટન રાહુલ દ્રવિડના પુત્ર અન્વય દ્રવિડની ભારતની U-19 વન-ડે ટીમમાં પસંદગી થઈ છે.
વન-ડે અને મલ્ટી-ડે ટીમની કપ્તાની
ઓસ્ટ્રેલિયા સામેની 3 વન-ડે મેચોની સિરીઝ માટે લક્ષ્ય રાયચંદાનીને કેપ્ટન બનાવવામાં આવ્યા છે, જ્યારે યશબર્ધન ચૌહાણ વાઈસ કેપ્ટન રહેશે. બીજી તરફ, બે મલ્ટી-ડે મેચોની સિરીઝ માટે યશબર્ધન ચૌહાણને કપ્તાની સોંપાઈ છે અને લક્ષ્ય રાયચંદાની વાઈસ કેપ્ટનની ભૂમિકા ભજવશે.
ભારત U-19 વનડે સ્ક્વોડ: લક્ષ્ય રાયચંદાની (કેપ્ટન), યશબર્ધન ચૌહાણ (વાઈસ કેપ્ટન), રજત બધેલ (વિકેટકીપર), આર્યવીર સહેવાગ, વી.કે. વિનીત, કુશાગ્ર ઓઝા, અર્જુન રાજપૂત, મનાલ ચૌહાણ, અન્વય દ્રવિડ (વિકેટકીપર), વી. યશવીર, રોહિત યાદવ, શાવિન વિનોદ, મોહિત ઉલવા, ચિગુરુપતિ વેંકટા અને કાવ્યા પટેલ.
મલ્ટી-ડે સ્ક્વોડ: યશબર્ધન ચૌહાણ (કેપ્ટન), લક્ષ્ય રાયચંદાની (વાઈસ કેપ્ટન), સાગર વિર્ક, કુશાગ્ર ઓઝા, મનાલ ચૌહાણ, કુશ પટેલ, માનવ ક્રિષ્ણા (વિકેટકીપર), અભિપ્રાય બિસ્વાસ (વિકેટકીપર), રોહિત યાદવ, ઈશાન ઓમ, અયાન અક્રમ, પ્રણવ રાઘવેન્દ્ર, પ્રિયાંશુ સિંહ, મોહિત ઉલવા અને આર્યન યાદવ.
આર્યવીર સહેવાગ અને અન્વય દ્રવિડને શા માટે મળ્યું સ્થાન?
જમણા હાથના વિસ્ફોટક બેટ્સમેન આર્યવીર સહેવાગે હાલમાં જ દિલ્હી પ્રીમિયર લીગ 2026માં વેસ્ટ દિલ્હી લાયન્સ તરફથી રમતાં પોતાના પિતા વીરેન્દ્ર સહેવાગની શૈલીમાં આક્રમક શોટ્સ ફટકારીને સૌનું ધ્યાન ખેંચ્યું હતું. આ સિવાય તેણે 2024માં કૂચ બિહાર ટ્રોફીમાં મેઘાલય સામે 297 રનની ભવ્ય ઈનિંગ રમી હતી. બીજી તરફ, વિકેટકીપર-બેટ્સમેન અન્વય દ્રવિડે જુલાઈ 2026માં ભારત U-19ના શ્રીલંકા પ્રવાસ દરમિયાન ૮૭ રનની મહત્વપૂર્ણ ઈનિંગ રમીને પોતાની ક્ષમતા સાબિત કરી હતી. જોકે, આર્યવીર અને અન્વય બંનેને માત્ર વન-ડે ટીમમાં જ સ્થાન મળ્યું છે, મલ્ટી-ડે ટીમમાં તેમને સામેલ કરવામાં આવ્યા નથી.
સિરીઝનું સંપૂર્ણ શેડ્યૂલ
આ પ્રવાસની ત્રણેય વન-ડે મેચો અને પ્રથમ મલ્ટી-ડે મેચ રાજકોટના સ્ટેડિયમમાં રમાશે, જ્યારે બીજી મલ્ટી-ડે મેચ અમદાવાદના બી ગ્રાઉન્ડ પર રમાશે.
18 સપ્ટેમ્બર, 2026 (શુક્રવાર): પ્રથમ વન-ડે, રાજકોટ (સવારે 9.00)
21 સપ્ટેમ્બર, 2026 (સોમવાર): બીજી વન-ડે, રાજકોટ (સવારે 9.00)
23 સપ્ટેમ્બર, 2026 (બુધવાર): ત્રીજી વન-ડે, રાજકોટ (સવારે 9.00)
27થી 30 સપ્ટેમ્બર, 2026: પ્રથમ મલ્ટી-ડે મેચ, રાજકોટ (સવારે 9.30)
5થી 8 ઓક્ટોબર, 2026: બીજી મલ્ટી-ડે મેચ, અમદાવાદ (બી ગ્રાઉન્ડ) (સવારે 9.30)
ભારતીય જુનિયર ક્રિકેટ અને નેપોટિઝમ
ડોમેસ્ટિક ક્રિકેટમાં કડક પસંદગી પ્રક્રિયા: ભારતીય ક્રિકેટમાં માત્ર દિગ્ગજોના પુત્ર હોવાને કારણે સ્થાન મળતું નથી. અન્વય અને આર્યવીર બંનેએ BCCIની માન્યતા પ્રાપ્ત સ્ટેટ ટૂર્નામેન્ટ્સમાં સતત રન બનાવીને સિલેક્ટર્સનું ધ્યાન ખેંચ્યું છે.
સમિત દ્રવિડનું ઉદાહરણ: રાહુલ દ્રવિડના મોટા પુત્ર સમિત દ્રવિડ પણ કર્ણાટક તરફથી ડોમેસ્ટિક ક્રિકેટ અને ભારત U-19 ટીમમાં રમી ચૂક્યા છે. હવે નાના ભાઈ અન્વયે પણ પોતાના પ્રદર્શનથી આંતરરાષ્ટ્રીય સ્તરે એન્ટ્રી કરી છે.
ગુજરાત ખાતે આંતરરાષ્ટ્રીય યુથ મેચો: રાજકોટનું સૌરાષ્ટ્ર ક્રિકેટ એસોસિએશન (SCA) સ્ટેડિયમ અને અમદાવાદનું નરેન્દ્ર મોદી સ્ટેડિયમ કમ્પાઉન્ડ (B ગ્રાઉન્ડ) યુથ ઈન્ટરનેશનલ ક્રિકેટ ઈવેન્ટ્સ માટે વિશ્વસ્તરીય ઈન્ફ્રાસ્ટ્રક્ચર પૂરું પાડે છે.
