IND vs NZ Series 2026: ટીમ ઈન્ડિયાના ન્યૂઝીલેન્ડ પ્રવાસને લઈને ક્રિકેટ ચાહકોમાં અત્યારથી જ જબરદસ્ત ઉત્સાહ જોવા મળી રહ્યો છે. ભારતીય ટીમ ઓક્ટોબરથી ન્યૂઝીલેન્ડ સામે ત્રણેય ફોર્મેટમાં લાંબો પ્રવાસ કરશે. આ પ્રવાસ દરમિયાન બંને ટીમો વચ્ચે કુલ 12 મેચ રમાવાની છે. પ્રવાસ શરૂ થવામાં હજુ લગભગ બે મહિના બાકી છે, પરંતુ મેચોની ટિકિટનું વેચાણ શરૂ થતાં જ ચાહકોનો ઉત્સાહ જોવા મળી રહ્યો છે.
48 કલાકમાં 26 હજાર ટિકિટોનું રેકોર્ડ વેચાણ
ન્યૂઝીલેન્ડ ક્રિકેટના જણાવ્યા અનુસાર, 24 ઓગસ્ટથી શરૂ થયેલા ક્રિકેટ નેશન મેમ્બર પ્રી-સેલના પ્રથમ 48 કલાકમાં જ 26,000 ટિકિટો વેચાઈ ગઈ છે. ખાસ કરીને ભારત સામેની વ્હાઇટ-બોલ મેચોને લઈને સૌથી વધુ માંગ જોવા મળી રહી છે. ઓકલેન્ડના ઇડન પાર્ક ખાતે યોજાનારી મેચો માટે ચાહકોમાં ખાસ ઉત્સાહ છે. ન્યૂઝીલેન્ડ ક્રિકેટના જણાવ્યા અનુસાર ભારતના આ લાંબા મલ્ટી-ફોર્મેટ પ્રવાસે ટિકિટની માંગમાં મોટો વધારો કર્યો છે.
હેગલી ઓવલમાં પણ ટિકિટની ભારે માંગ
ક્રાઇસ્ટચર્ચનું હેગલી ઓવલ પણ ચાહકોની પસંદગીમાં આગળ છે. 9,000 દર્શકોની ક્ષમતા ધરાવતા આ મેદાન પર 22 અને 24 ઓક્ટોબરે બે T20I મેચ રમાશે. આ ઉપરાંત 27 નવેમ્બરથી 1 ડિસેમ્બર દરમિયાન બીજી અને અંતિમ ટેસ્ટ મેચ પણ અહીં રમાવાની છે. મેચોની ટિકિટનું વેચાણ જે ગતિએ થઈ રહ્યું છે તેને જોતા આ બંને T20I ઉપરાંત ટેસ્ટ મેચ માટે પણ સ્ટેડિયમ હાઉસફુલ થવાની શક્યતા વ્યક્ત કરવામાં આવી રહી છે.
વેલિંગ્ટનમાં પણ ક્રિકેટનો ક્રેઝ
વેલિંગ્ટનમાં પણ ટિકિટના પ્રારંભિક વેચાણને સારો પ્રતિસાદ મળ્યો છે. અહીં ત્રીજી T20I અને બીજી ODI રમાવાની છે. બીજી તરફ, ભારત અને ન્યૂઝીલેન્ડ વચ્ચેની પ્રથમ ટેસ્ટ મેચ 19 નવેમ્બરથી વેલિંગ્ટનના ઐતિહાસિક બેસિન રિઝર્વ ખાતે શરૂ થશે. ન્યૂઝીલેન્ડ ક્રિકેટના ચીફ માર્કેટિંગ અને કોમર્શિયલ ઓફિસર ગ્લેન ક્રિચલીએ ટિકિટના ઝડપી વેચાણ અંગે ખુશી વ્યક્ત કરી છે. તેમણે કહ્યું કે શરૂઆતથી જ ચાહકોને અગાઉથી તૈયારી કરવાની અપીલ કરવામાં આવી હતી અને પ્રથમ બે દિવસનું રેકોર્ડ વેચાણ દર્શાવે છે કે લોકોએ આ વાતને ગંભીરતાથી લીધી છે.
7 સપ્ટેમ્બરથી સામાન્ય ચાહકો માટે ટિકિટ વેચાણ
હાલમાં ટિકિટનું પ્રી-સેલ ચાલી રહ્યું છે. સામાન્ય લોકો માટે ટિકિટનું વેચાણ 7 સપ્ટેમ્બરથી શરૂ થશે. ક્રિકેટ નેશન પર સાઇન અપ કરનારા ચાહકોને પ્રી-સેલ વિન્ડોનો લાભ મળશે અને તેમને 15 ટકા ડિસ્કાઉન્ટ પણ મળી શકે છે.
ભારત-ન્યૂઝીલેન્ડ વચ્ચે કુલ 12 મેચ
ભારતીય ટીમના આ પ્રવાસમાં પાંચ T20I, પાંચ ODI અને બે ટેસ્ટ મેચ રમાશે. એટલે કે એક મહિનાથી વધુ ચાલનારા આ પ્રવાસમાં ચાહકોને ત્રણેય ફોર્મેટની ક્રિકેટ જોવા મળશે.
T20I શ્રેણી:
22 ઓક્ટોબર: પ્રથમ T20I – ક્રાઇસ્ટચર્ચ
24 ઓક્ટોબર: બીજી T20I – ક્રાઇસ્ટચર્ચ
27 ઓક્ટોબર: ત્રીજી T20I – વેલિંગ્ટન
30 ઓક્ટોબર: ચોથી T20I – ઓકલેન્ડ
1 નવેમ્બર: પાંચમી T20I – હેમિલ્ટન
ODI શ્રેણી:
4 નવેમ્બર: પ્રથમ ODI – ઓકલેન્ડ
7 નવેમ્બર: બીજી ODI – વેલિંગ્ટન
10 નવેમ્બર: ત્રીજી ODI – હેમિલ્ટન
13 નવેમ્બર: ચોથી ODI – માઉન્ટ મૌંગાનુઇ
15 નવેમ્બર: પાંચમી ODI – માઉન્ટ મૌંગાનુઇ
ટેસ્ટ શ્રેણી:
19થી 23 નવેમ્બર: પ્રથમ ટેસ્ટ – વેલિંગ્ટન
27 નવેમ્બરથી 1 ડિસેમ્બર: બીજી ટેસ્ટ – ક્રાઇસ્ટચર્ચ
ભારત સામે ન્યૂઝીલેન્ડમાં ફરી ક્રિકેટનો જંગ
ટીમ ઈન્ડિયાનો ન્યૂઝીલેન્ડ પ્રવાસ શરૂ થાય તે પહેલાં જ ટિકિટના રેકોર્ડ વેચાણે બંને દેશો વચ્ચેની ક્રિકેટ લોકપ્રિયતાનો અંદાજ આપી દીધો છે. હવે સામાન્ય ચાહકો માટે ટિકિટ વિન્ડો ખુલ્યા બાદ માંગમાં વધુ વધારો થવાની શક્યતા છે.
