IND vs AFG T20: ભારત અને અફઘાનિસ્તાન વચ્ચેની ત્રીજી T20I પહેલા અફઘાનિસ્તાન ક્રિકેટ બોર્ડે ટીમ ઈન્ડિયા માટે ખાસ ડિનરનું આયોજન કર્યું હતું. દિલ્હીમાં યોજાયેલા આ કાર્યક્રમમાં ભારતીય અને અફઘાનિસ્તાની ખેલાડીઓ ઉપરાંત બંને ક્રિકેટ બોર્ડના ટોચના અધિકારીઓ પણ સામેલ થયા હતા. આ કાર્યક્રમનો હેતુ બંને દેશો વચ્ચેના લાંબા સમયથી ચાલી રહેલા ક્રિકેટ સંબંધો અને મિત્રતાની ઉજવણી કરવાનો હતો.
અફઘાનિસ્તાને ટીમ ઈન્ડિયાને કેમ ડિનર પર બોલાવી?
અફઘાનિસ્તાન ક્રિકેટ બોર્ડે આ ખાસ કાર્યક્રમને ‘કોહ-એ-ઝફર’ નામ આપ્યું હતું, જેનો અર્થ ‘વિજયનું શિખર’ થાય છે. આ કાર્યક્રમમાં ભારત અને અફઘાનિસ્તાન વચ્ચેની ક્રિકેટ સફર તથા બંને ક્રિકેટ બોર્ડ વચ્ચેના મજબૂત સંબંધોને ઉજાગર કરવામાં આવ્યા હતા. ખેલાડીઓએ એકબીજા સાથે પોતાના ક્રિકેટ અનુભવો પણ શેર કર્યા હતા. કાર્યક્રમ દરમિયાન બંને ટીમના ખેલાડીઓ વચ્ચે ભેટોની આપ-લે પણ થઈ હતી. સાથે જ ભારત અને અફઘાનિસ્તાનના ક્રિકેટ અધિકારીઓ પણ આ ખાસ સાંજનો ભાગ બન્યા હતા. અફઘાનિસ્તાન ક્રિકેટ બોર્ડે BCCIના નેતૃત્વ અને ભારતીય ક્રિકેટ સાથેના લાંબા સમયથી ચાલી રહેલા સંબંધોને માન આપતાં સન્માન પણ કર્યું હતું.
ટીમ ઈન્ડિયાનું થયું સન્માન
‘કોહ-એ-ઝફર’ કાર્યક્રમ દરમિયાન અફઘાનિસ્તાન ક્રિકેટ બોર્ડ તરફથી ભારતીય ખેલાડીઓ અને BCCIના અધિકારીઓને મોમેન્ટો આપીને સન્માનિત કરવામાં આવ્યા હતા. બંને દેશોના ખેલાડીઓએ સાથે ફોટોગ્રાફ્સ પણ પડાવ્યા હતા અને કાર્યક્રમ દરમિયાન ક્રિકેટ સિવાયના અનુભવ પણ એકબીજા સાથે શેર કર્યા હતા.
IND-AFGના ખેલાડીઓએ શું કહ્યું?
ઈવેન્ટ દરમિયાન ઈશાન કિશને અફઘાનિસ્તાનના ખેલાડીઓની ક્રિકેટ પ્રતિભા ઉપરાંત તેમના સ્વભાવની પણ પ્રશંસા કરી હતી. તેણે જણાવ્યું કે IPL દરમિયાન ઘણા ભારતીય અને અફઘાન ખેલાડીઓ એકસાથે રમ્યા હોવાથી બંને ટીમના ખેલાડીઓ વચ્ચે સારી ઓળખ છે. ઈશાને ખાસ કરીને મોહમ્મદ નબી સાથે મુંબઈ ઈન્ડિયન્સમાં રમવાના પોતાના અનુભવનો ઉલ્લેખ કર્યો હતો અને કહ્યું હતું કે નબીએ તેને બેટિંગ દરમિયાન ઘણી મદદ કરી છે. મોહમ્મદ નબીએ પણ ભારતમાં ક્રિકેટ રમવાના પોતાના અનુભવ વિશે વાત કરી હતી. તેમણે કહ્યું કે ભારત તેમના માટે ક્રિકેટ રમવા માટે ખાસ સ્થળ રહ્યું છે અને IPLમાં રમવાથી તેમના અનુભવમાં વધારો થયો છે. નબીના જણાવ્યા અનુસાર, ભારત અને IPLમાં રમવાથી તેમને ઘણું શીખવા મળ્યું છે.
ફ્રેન્ડશીપ ડિનર પછી હવે ત્રીજી T20Iનો વારો
ભારત અને અફઘાનિસ્તાન વચ્ચેની ત્રણ મેચની T20I સીરિઝમાં ભારત પહેલેથી જ 2-0ની અપરાજિત લીડ મેળવી ચૂક્યું છે. બીજી T20Iમાં ભારતે અફઘાનિસ્તાનને 7 વિકેટે હરાવીને સીરિઝ પોતાના નામે કરી હતી. હવે બંને ટીમો 17 સપ્ટેમ્બરે દિલ્હીના અરુણ જેટલી સ્ટેડિયમમાં ત્રીજી અને અંતિમ T20Iમાં સામસામે થશે.
