IND vs ZIM, T20 World Cup 2026 India Playing XI: T20 વર્લ્ડ કપ 2026ના સુપર-8 તબક્કામાં દક્ષિણ આફ્રિકા સામે મળેલી હાર બાદ ભારતીય ટીમ પર દબાણ વધ્યું છે. હવે ઝિમ્બાબ્વે સામેની આગામી નિર્ણાયક મેચ પહેલા ભારતીય ટીમના બેટિંગ કોચ સિતાંશુ કોટકે મીડિયા સાથેની વાતચીતમાં પ્લેઇંગ ઇલેવનમાં ફેરફારના સ્પષ્ટ સંકેતો આપ્યા છે. કોટકે ખાસ કરીને મિડલ ઓર્ડરની નબળાઈને દૂર કરવા માટે સંજુ સેમસનને નંબર 3 પર અજમાવવાની શક્યતા પર ભાર મૂક્યો છે.
સંજુ સેમસનની એન્ટ્રીથી બદલાઈ શકે છે સમીકરણો
ભારતીય ટીમ અત્યારે ટોપ ઓર્ડરમાં ડાબા હાથના બેટ્સમેનોની બહુમતી ધરાવે છે. ઓપનિંગમાં ઇશાન કિશન અને અભિષેક શર્માની જોડી છે, જ્યારે ત્રીજા નંબરે તિલક વર્મા રમી રહ્યો છે. વિરોધી ટીમો જ્યારે ઓફ-સ્પિનરોનો ઉપયોગ કરે છે ત્યારે આ કોમ્બિનેશન મુશ્કેલીમાં મુકાઈ રહ્યું છે. કોટકે જણાવ્યું હતું કે, "અમે ટીમ કોમ્બિનેશન પર ગંભીરતાથી ચર્ચા કરી રહ્યા છીએ. સંજુ સેમસન એક એવો ખેલાડી છે જે વિકેટકીપર હોવાની સાથે ટોપ ઓર્ડરમાં ગમે ત્યાં બેટિંગ કરી શકે છે. નેટ્સમાં તેની તૈયારી જોતા તેને પ્લેઇંગ ઇલેવનમાં સામેલ કરવા પર ચોક્કસપણે વિચાર કરવામાં આવશે."
આઉટ ઓફ ફોર્મ અભિષેક શર્માનો બચાવ
યુવા ઓપનર અભિષેક શર્મા આ વર્લ્ડ કપમાં અત્યાર સુધી ફ્લોપ રહ્યો છે. 75ના સ્ટ્રાઈક રેટથી માત્ર 15 રન બનાવનાર અભિષેક વિશે કોટકે નરમ વલણ અપનાવ્યું હતું. તેમણે કહ્યું કે, "અભિષેક બીમારીને કારણે પોતાની કુદરતી લય ગુમાવી બેઠો હતો. જ્યારે તે 30 બોલમાં 80-90 રન ફટકારતો હતો ત્યારે કોઈ સવાલ પૂછતું નહોતું. અમારું કામ તેને માનસિક રીતે મજબૂત રાખવાનું છે. તે માત્ર એક સારી ઇનિંગથી જ પોતાના જૂના ફોર્મમાં પરત ફરી જશે."
તિલક વર્માના સ્ટ્રાઈક રેટ પર સ્પષ્ટતા
નંબર 3 પર રમી રહેલા તિલક વર્માના 118ના ધીમા સ્ટ્રાઈક રેટ વિશે પૂછવામાં આવતા કોટકે બચાવ કરતા કહ્યું કે, પરિસ્થિતિ મુજબ રમવું જરૂરી છે. પાકિસ્તાન સામેની મેચમાં પિચ સ્પિનરોને મદદ કરી રહી હતી અને ટીમ ઝડપથી વિકેટ ગુમાવવા માંગતી નહોતી. તેમણે સ્પષ્ટ કર્યું કે તિલકને રક્ષણાત્મક રમવાની કોઈ સૂચના અપાઈ નથી, તે માત્ર એક-બે મોટા શોટથી પોતાની લય પાછી મેળવી લેશે.
"દબાણ સામે લડવું જ પડશે"
દક્ષિણ આફ્રિકા સામે 76 રનથી મળેલી કારમી હાર બાદ ભારત માટે હવે ઝિમ્બાબ્વે અને વેસ્ટ ઈન્ડિઝ સામેની જીત અનિવાર્ય છે. કોટકે સ્વીકાર્યું કે આ વર્લ્ડ કપ ભારતમાં હોવાથી અપેક્ષાઓનું ભારે દબાણ છે. તેમણે કહ્યું, "જો આપણે વર્લ્ડ ચેમ્પિયન બનવું હોય તો દબાણનો સામનો કરવો જ પડશે. દક્ષિણ આફ્રિકા સામેની મેચ છેલ્લા બે વર્ષમાં અમારું સૌથી ખરાબ પ્રદર્શન હતું, પરંતુ અમને ટીમની માનસિક શક્તિ પર પૂરો વિશ્વાસ છે. અમે ફરીથી એ જ આક્રમક બ્રાન્ડનું ક્રિકેટ રમીશું જેના માટે ભારતીય ટીમ જાણીતી છે."
ઓપનિંગ ભાગીદારી પર ભાર
કોચના મતે ભારતની સફળતાનો મુખ્ય આધાર ઓપનિંગ ભાગીદારી પર રહેશે. ઇશાન કિશન અને અભિષેક શર્માની જોડી જો પાવરપ્લેમાં મજબૂત શરૂઆત અપાવે તો મિડલ ઓર્ડર પરથી દબાણ ઓછું થઈ શકે છે. ટીમ હવે પિચની સ્થિતિ અને વિરોધી ટીમના બોલિંગ આક્રમણને ધ્યાનમાં રાખીને સકારાત્મક અભિગમ સાથે મેદાનમાં ઉતરશે.








