Ind vs Pak: મહિલા એશિયા કપ 2026માં પાકિસ્તાન મહિલા ક્રિકેટ ટીમને ભારત સામે સાત વિકેટથી કારમી હારનો સામનો કરવો પડ્યો છે. ફાતિમા સનાની આગેવાની હેઠળની પાકિસ્તાની ટીમની હાર બાદ હવે કેપ્ટન ફાતિમા સનાને પણ મોટો ઝટકો લાગ્યો છે. આંતરરાષ્ટ્રીય ક્રિકેટ પરિષદ (ICC)એ મેદાન પર કરેલી હરકતને લઈને ફાતિમાને આચારસંહિતાના ઉલ્લંઘન બદલ દંડ ફટકાર્યો છે.
પેવેલિયન પરત ફરવાનો ઈશારો કર્યો
મેચ દરમિયાન ફાતિમાએ ભારતની ત્રણ વિકેટ ઝડપી હતી. જોકે, ભારતીય ઓપનર શેફાલી વર્માને આઉટ કર્યા બાદ ફાતિમાએ તેની તરફ જોઈને પેવેલિયન પરત ફરવાનો ઈશારો કર્યો હતો. ICCએ આ વર્તનને ખેલાડીઓ માટે નક્કી કરાયેલી આચારસંહિતાનો ભંગ ગણાવ્યો છે. આ બદલ પાકિસ્તાની કેપ્ટન પર તેની મેચ ફીના 10 ટકા જેટલો દંડ લાદવામાં આવ્યો છે.
અત્યાર સુધીનો સૌથી ઓછો સ્કોર નોંધાયો
આ મુકાબલામાં ભારતીય ટીમે પાકિસ્તાનને માત્ર 55 રનમાં ઓલઆઉટ કરી દીધું હતું. આ સ્કોર સાથે પાકિસ્તાનના નામે મહિલા T20 આંતરરાષ્ટ્રીય ક્રિકેટમાં તેનો અત્યાર સુધીનો સૌથી ઓછો સ્કોર નોંધાયો છે. પાકિસ્તાની બેટિંગ સંપૂર્ણપણે નિષ્ફળ રહી હતી અને ભારતીય બોલરોએ શરૂઆતથી જ ટીમ પર દબાણ જાળવી રાખ્યું હતું.
સાત વિકેટે શાનદાર જીત મેળવી હતી
55 રનના લક્ષ્યાંકનો પીછો કરવા ઉતરેલી ટીમ ઈન્ડિયાએ માત્ર નવ ઓવરમાં જ મેચ પોતાના નામે કરી લીધી હતી અને સાત વિકેટે શાનદાર જીત મેળવી હતી. આમ, એક તરફ પાકિસ્તાનને ભારત સામે શરમજનક હાર મળી, તો બીજી તરફ તેની કેપ્ટન ફાતિમા સનાને મેદાન પરના વર્તન બદલ ICCની કાર્યવાહીનો પણ સામનો કરવો પડ્યો છે.
