ICC announces schedule of ODI World Cup 2027: ICC વનડે વર્લ્ડ કપ 2027ને લઈને ક્રિકેટ ચાહકોની આતુરતાનો અંત આવ્યો છે. ઇન્ટરનેશનલ ક્રિકેટ કાઉન્સિલે દક્ષિણ આફ્રિકા, ઝિમ્બાબ્વે અને નામીબિયામાં યોજાનારા વર્લ્ડ કપનું સંપૂર્ણ શેડ્યૂલ જાહેર કરી દીધું છે. 2 ઓક્ટોબર 2027થી શરૂ થનારા આ ક્રિકેટ મહાકુંભની ફાઇનલ 21 નવેમ્બરે રમાશે. ભારતીય ટીમ પોતાની પ્રથમ મેચ 7 ઓક્ટોબરે ઓસ્ટ્રેલિયા સામે રમશે, જ્યારે સૌથી વધુ ચર્ચિત ભારત-પાકિસ્તાન મુકાબલો 10 ઓક્ટોબરે જોહાનિસબર્ગમાં યોજાશે.
10 ઓક્ટોબરે ભારત-પાકિસ્તાન વચ્ચે મહામુકાબલો
વર્લ્ડ કપના ગ્રૂપ સ્ટેજમાં ભારત અને પાકિસ્તાનને એક જ ગ્રૂપમાં સ્થાન મળ્યું છે. ભારતીય ટીમ 7 ઓક્ટોબરે કેપટાઉનમાં ઓસ્ટ્રેલિયા સામે પોતાના અભિયાનની શરૂઆત કરશે. ત્યારબાદ 10 ઓક્ટોબરે જોહાનિસબર્ગમાં ભારતનો સામનો પાકિસ્તાન સામે થશે. આ પછી 14 ઓક્ટોબરે સેન્ચુરિયનમાં અફઘાનિસ્તાન સામે મેચ રમાશે. ભારત 17 ઓક્ટોબરે ક્વોલિફાયર-Aથી આવનારી ટીમ સામે અને 24 ઓક્ટોબરે ઝિમ્બાબ્વે સામે ટકરાશે.
3 દેશોના 12 વેન્યુ પર રમાશે 57 મેચ
2027નો વનડે વર્લ્ડ કપ ત્રણ દેશોમાં યોજાશે. દક્ષિણ આફ્રિકાના 8, ઝિમ્બાબ્વેના 3 અને નામીબિયાના 1 સહિત કુલ 12 વેન્યુ પર ટૂર્નામેન્ટની 57 મેચ રમાશે. આ મેગા ટૂર્નામેન્ટમાં કુલ 14 ટીમો ભાગ લેશે. ICCએ કેપટાઉનમાં આયોજિત વિશેષ કાર્યક્રમ દરમિયાન વર્લ્ડ કપના કાર્યક્રમની સત્તાવાર જાહેરાત કરી હતી.
બે ગ્રૂપમાં વહેંચાશે 12 ટીમો
2027ના વર્લ્ડ કપનું ફોર્મેટ અગાઉના કેટલાક વર્લ્ડ કપની સરખામણીમાં અલગ હશે. શરૂઆતના તબક્કા બાદ 12 ટીમો મુખ્ય સ્પર્ધામાં આગળ વધશે અને તેમને બે ગ્રૂપમાં વહેંચવામાં આવશે. ગ્રૂપ-Aમાં અફઘાનિસ્તાન, ઓસ્ટ્રેલિયા, ભારત, પાકિસ્તાન, ઝિમ્બાબ્વે અને ક્વોલિફાયર-Aનો સમાવેશ કરવામાં આવ્યો છે. જ્યારે ગ્રૂપ-Bમાં બાંગ્લાદેશ, ઇંગ્લેન્ડ, દક્ષિણ આફ્રિકા, શ્રીલંકા, ન્યૂઝીલેન્ડ અને ક્વોલિફાયર-Bની ટીમ રહેશે.
10 ટીમોનું ક્વોલિફિકેશન પૂર્ણ
હાલ સુધીમાં 2027 વનડે વર્લ્ડ કપ માટે 10 ટીમોએ ક્વોલિફાય કરી લીધું છે. ભારત, પાકિસ્તાન, ઓસ્ટ્રેલિયા, ઇંગ્લેન્ડ, ન્યૂઝીલેન્ડ, શ્રીલંકા, બાંગ્લાદેશ અને અફઘાનિસ્તાનને ICC વનડે રેન્કિંગના આધારે સીધી જગ્યા મળી છે. યજમાન દક્ષિણ આફ્રિકા અને ઝિમ્બાબ્વેને પણ ટૂર્નામેન્ટમાં સીધી એન્ટ્રી મળી છે. નામીબિયા સહ-યજમાન હોવા છતાં ICCનું પૂર્ણ સભ્ય દેશ ન હોવાથી તેને સીધી એન્ટ્રી મળી નથી. બાકીની ચાર ટીમો ક્વોલિફાયર રાઉન્ડમાંથી વર્લ્ડ કપમાં પ્રવેશ મેળવશે. વેસ્ટ ઇન્ડીઝ પણ ક્વોલિફાયર રાઉન્ડમાં રમશે. આ રીતે 2027નો વર્લ્ડ કપ શરૂ થાય તે પહેલાં જ ક્વોલિફિકેશનની રેસ પણ ક્રિકેટ ચાહકો માટે રસપ્રદ બનવાની છે.








