Cricketer Sreesanth Father Passed Away: ભારતીય ક્રિકેટ ટીમના પૂર્વ ફાસ્ટ બોલર એસ. શ્રીસંતના પિતા વી. શાંતકુમારન નાયરનું 89 વર્ષની વયે ખાનગી હોસ્પિટલમાં નિધન થયું છે. શુક્રવારે રાત્રે 9:45 વાગ્યે તેમણે અંતિમ શ્વાસ લીધા હતા. શાંતકુમારન નાયર છેલ્લા કેટલાક સમયથી હાર્ટ સંબંધિત તકલીફોને કારણે કોચીની લિસી હોસ્પિટલમાં સારવાર હેઠળ હતા. તેમના નિધનના સમાચાર સામે આવતા જ રમતગમત જગત અને તેમના ચાહકોમાં શોકની લહેર ફરી વળી છે.
રવિવારે થશે અંતિમ સંસ્કાર, વિદેશથી સગા-સંબંધીઓની રાહ
પારિવારિક સૂત્રોના જણાવ્યા અનુસાર હાલમાં શાંતકુમારન નાયરના પાર્થિવ દેહને હોસ્પિટલના શબઘરમાં રાખવામાં આવ્યો છે. વિદેશમાં રહેતા પરિવારના સભ્યો અને નજીકના સંબંધીઓ આવી પહોંચ્યા બાદ રવિવારે તેમના પાર્થિવ દેહને કોઠામંગલમ સ્થિત તેમના પૈતૃક નિવાસે લઈ જવામાં આવશે. રવિવારે સવારે 10:00 વાગ્યાથી બપોરે 2:00 વાગ્યા સુધી તેમનો દેહ અંતિમ દર્શન માટે રાખવામાં આવશે, જ્યારે સાંજે 4:00 વાગ્યે પૂર્ણ ધાર્મિક વિધિ સાથે તેમના અંતિમ સંસ્કાર કરવામાં આવશે.
LICમાં સેવાઓ અને શાંતકુમારન નાયરનો પરિવાર
વી. શાંતકુમારન નાયર ભારતીય જીવન વિમા નિગમ (LIC) માંથી ઝોનલ મેનેજરના પદ પરથી નિવૃત્ત થયા હતા. તેઓ પોતાના પરિવારમાં પત્ની ટી. એન. સાવિત્રીદેવી તથા ચાર સંતાનો દીપુ, નિવેદિતા, દિવ્યા અને શ્રીસંતને વિલાપ કરતા છોડી ગયા છે. તેમના જમાઈઓમાં પ્રખ્યાત પ્લેબેક સિંગર મધુ બાલકૃષ્ણનનો પણ સમાવેશ થાય છે. શાંતકુમારન નાયરે પોતાના બાળકોને સ્પોર્ટ્સ અને આર્ટ્સ ક્ષેત્રે આગળ વધવા માટે હંમેશાં પ્રોત્સાહિત કર્યા હતા.
શ્રીસંતનું આંતરરાષ્ટ્રીય ક્રિકેટ કરિયર
એસ. શ્રીસંતે ભારત તરફથી આંતરરાષ્ટ્રીય સ્તરે કુલ 90 મેચ રમીને 169 વિકેટ ઝડપી છે. તેમણે 27 ટેસ્ટ મેચોમાં 87 વિકેટ, 52 વન-ડે ઇન્ટરનેશનલ મેચોમાં 75 વિકેટ અને 9 ટી-20 મેચોમાં 7 વિકેટ મેળવી હતી. શ્રીસંત વર્ષ 2007માં રમાયેલા પ્રથમ ટી-20 વર્લ્ડ કપ અને વર્ષ 2011માં ભારતે જીતેલા ODI વર્લ્ડ કપની વિજેતા ટીમના સભ્ય પણ રહી ચૂક્યા છે. તેમની આક્રમક બોલિંગ શૈલી અને જુસ્સાને કારણે ચાહકોમાં તેમની એક ખાસ ઓળખ રહી છે.
વિશ્વકપમાં શ્રીસંતનું યોગદાન અને જીવનના ઉતાર-ચઢાવ
શ્રીસંતના ક્રિકેટ કરિયરમાં ઘણા યાદગાર ક્ષણો આવ્યા છે. 2007ના ટી-20 વર્લ્ડ કપની ફાઇનલમાં જોહાનિસબર્ગ ખાતે મિસ્બાહ-ઉલ-હકનો ઐતિહાસિક કેચ પકડીને ભારતમાં વર્લ્ડ કપ લાવવામાં શ્રીસંતે મહત્ત્વની ભૂમિકા ભજવી હતી. કરિયરમાં અનેક વાદ-વિવાદો અને પ્રતિબંધોનો સામને કર્યા પછી પણ તેઓ ક્રિકેટ અને મનોરંજન ક્ષેત્રે સક્રિય રહ્યા હતા. આ તમામ મુશ્કેલ સમયમાં તેમના પિતા અને પરિવારે તેમનો મક્કમતાથી સાથ આપ્યો હતો, જેને શ્રીસંતે પોતાના ઇન્ટરવ્યુમાં અવારનવાર યાદ કર્યો છે.
