Asian Games 2026: એશિયન ગેમ્સ 2026માં ભારતીય રમતવીરો સતત ઉત્કૃષ્ટ પ્રદર્શન કરીને દેશનું ગૌરવ વધારી રહ્યા છે. આ વૈશ્વિક રમત મહાકુંભમાં ગુજરાતની હોનહાર રાઇફલ શૂટર ઇલાવેનિલ વાલારિવાને પોતાની અદ્ભુત રમતથી ભારત તેમજ સમગ્ર ગુજરાત રાજ્યનું નામ આંતરરાષ્ટ્રીય સ્તરે રોશન કર્યું છે. નિશાનેબાજીમાં મેળવેલી આ ભવ્ય સફળતા બાદ રાજ્ય સરકાર દ્વારા ખેલાડીની મહેનત અને સિદ્ધિને યોગ્ય બિરદાવવામાં આવી છે.
ગાંધીનગરમાં સન્માન સમારોહ અને પુરસ્કાર
રાજધાની ગાંધીનગરમાં આયોજિત એક વિશેષ પ્રોગ્રામ દરમિયાન ગુજરાત સરકારની 'ખેલપ્રતિભા પુરસ્કાર યોજના' હેઠળ ઇલાવેનિલ વાલારિવાનનું ભવ્ય સન્માન કરવામાં આવ્યું હતું. ગુજરાતના નાયબ મુખ્યમંત્રી હર્ષ સંઘવીના હસ્તે ખેલાડીને રૂ. 1.33 કરોડની માતબર રકમનો ચેક અર્પણ કરવામાં આવ્યો હતો. આ પ્રોત્સાહક ઇનામ મેળવ્યા બાદ ઇલાવેનિલે રાજ્ય સરકારનો આભાર વ્યક્ત કર્યો હતો.
બે અલગ-અલગ ઇવેન્ટ્સમાં જીત્યા સિલ્વર મેડલ્સ
જાપાન ખાતે રમાઈ રહેલી એશિયન ગેમ્સમાં ઇલાવેનિલે રાઇફલ શૂટિંગમાં બેવડી સફળતા હાંસલ કરી છે. તેમણે મહિલાઓની 10 મીટર એર રાઇફલ ઇન્ડિવિઝ્યુઅલ (વ્યક્તિગત) સ્પર્ધા અને 10 મીટર એર રાઇફલ ટીમ ઇવેન્ટ એમ બંને કેટેગરીમાં શ્રેષ્ઠ પ્રદર્શન કરીને બે સિલ્વર મેડલ પોતાના નામે કર્યા છે. તેમની આ સિદ્ધિથી રાજ્યના અન્ય યુવા ખેલાડીઓને પણ મોટી પ્રેરણા મળી રહી છે.
હર્ષ સંઘવીનો સંદેશ અને ખેલાડીઓને પ્રોત્સાહન
આ પ્રસંગે નાયબ મુખ્યમંત્રી અને ગૃહમંત્રી હર્ષ સંઘવીએ ઇલાવેનિલને હૃદયપૂર્વકના અભિનંદન પાઠવ્યા હતા. તેમણે જણાવ્યું હતું કે ગુજરાત સરકાર રાજ્યના ખેલાડીઓને આંતરરાષ્ટ્રીય સ્તરનું કોચિંગ અને શ્રેષ્ઠ ઈન્ફ્રાસ્ટ્રક્ચર આપવા માટે કટિબદ્ધ છે. જ્યારે પણ કોઈ ખેલાડી વૈશ્વિક મંચ પર દેશનું પ્રતિનિધિત્વ કરે છે, ત્યારે તેની આ સફળતા પાછળ તેની વર્ષોની સખત મહેનતની સાથે માતા-પિતાનો પણ અમૂલ્ય ત્યાગ અને સહયોગ રહેલો હોય છે.
