Duleep Trophy 2026: વૈભવ સૂર્યવંશીની ઈસ્ટ ઝોન ટીમે દુલીપ ટ્રોફીની ક્વાર્ટર ફાઇનલમાં નોર્થ ઈસ્ટ ઝોનને એક ઇનિંગ્સ અને 210 રનથી હરાવીને સેમિફાઇનલમાં સ્થાન મેળવી લીધું છે. બેંગલુરુના BCCI સેન્ટર ઑફ એક્સેલન્સ ગ્રાઉન્ડ-2 પર રમાયેલી મેચમાં ઈસ્ટ ઝોને શરૂઆતથી જ શાનદાર પ્રદર્શન કર્યું હતું.
ઈસ્ટ ઝોને પ્રથમ ઇનિંગમાં બનાવ્યા 467 રન
ઈસ્ટ ઝોને પ્રથમ ઇનિંગમાં 467 રનનો વિશાળ સ્કોર નોંધાવ્યો હતો. ટીમ તરફથી સુદીપ ઘરામીએ 146 રનની શાનદાર ઇનિંગ રમી હતી, જ્યારે શાહબાઝ અહેમદે 167 રન ફટકાર્યા હતા. બીજી તરફ, દુલીપ ટ્રોફીમાં ડેબ્યૂ કરી રહેલો વૈભવ સૂર્યવંશી બેટિંગમાં ખાસ કમાલ કરી શક્યો નહોતો અને માત્ર 6 બોલમાં 8 રન બનાવીને આઉટ થયો હતો.
નોર્થ ઈસ્ટ ઝોન બંને ઇનિંગમાં નિષ્ફળ
467 રનના જવાબમાં નોર્થ ઈસ્ટ ઝોનની ટીમ પ્રથમ ઇનિંગમાં માત્ર 111 રનમાં ઓલઆઉટ થઈ ગઈ હતી. ત્યારબાદ ફોલોઓન મળ્યા બાદ બીજી ઇનિંગમાં પણ ટીમ ખાસ પ્રતિકાર કરી શકી નહોતી અને 146 રનમાં ઓલઆઉટ થઈ ગઈ હતી. પરિણામે ઈસ્ટ ઝોને એક ઇનિંગ્સ અને 210 રનની વિશાળ જીત મેળવી.
વૈભવે બોલિંગમાં કરી જોરદાર વાપસી
બેટિંગમાં માત્ર 8 રન બનાવ્યા બાદ વૈભવ સૂર્યવંશીએ બોલિંગમાં શાનદાર વાપસી કરી હતી. તેણે નોર્થ ઈસ્ટ ઝોનની બીજી ઇનિંગમાં માત્ર 3 ઓવરમાં 11 રન આપી 2 વિકેટ ઝડપી હતી. ખાસ વાત એ છે કે બંને વિકેટ તેણે એક જ ઓવરમાં માત્ર ચાર બોલના અંતરમાં ઝડપી હતી.
હવે સેમિફાઇનલમાં સેન્ટ્રલ ઝોન સામે મુકાબલો
નોર્થ ઈસ્ટ ઝોન સામેની જીત સાથે ઈસ્ટ ઝોને સેમિફાઇનલમાં સ્થાન નિશ્ચિત કરી લીધું છે. હવે ઈસ્ટ ઝોનનો મુકાબલો સેન્ટ્રલ ઝોન સામે થશે. ઉપલબ્ધ કાર્યક્રમ મુજબ સેમિફાઇનલ 30 ઓગસ્ટથી રમાવાની છે.
