Saina nehwal retires: ભારતીય બેડમિન્ટન જગતનો એક સુવર્ણ અધ્યાય આજે સત્તાવાર રીતે પૂર્ણ થયો છે. લંડન ઓલિમ્પિકમાં દેશને બ્રોન્ઝ મેડલ અપાવી ઈતિહાસ રચનાર સાયના નેહવાલે પ્રોફેશનલ બેડમિન્ટનમાંથી સંન્યાસ લેવાની પુષ્ટિ કરી છે. લાંબા સમયથી ઘૂંટણની ગંભીર ઈજા અને બીમારી સામે લડી રહેલી સાયનાએ સ્વીકાર્યું છે કે હવે તેની શારીરિક સ્થિતિ ટોપ લેવલની રમત રમવા માટે સાથ આપી રહી નથી. આ જાહેરાત સાથે જ વિશ્વભરના તેના કરોડો ચાહકોમાં નિરાશા વ્યાપી ગઈ છે, પરંતુ એક મહાન ખેલાડીની વિદાયને સૌ કોઈ સલામ કરી રહ્યા છે.
મેં મારા સિદ્ધાંતો પર રમત છોડી
સાયના નેહવાલ છેલ્લે 2023માં સિંગાપોર ઓપનમાં રમી હતી, ત્યારથી તે કોર્ટથી દૂર હતી. એક પોડકાસ્ટમાં તેણે ખુલાસો કર્યો કે, મેં હકીકતમાં બે વર્ષ પહેલાં જ રમવાનું બંધ કરી દીધું હતું. મેં મારા જીવનના સિદ્ધાંતો પર બેડમિન્ટન શરૂ કર્યું હતું અને મને યોગ્ય લાગ્યું ત્યારે મારા જ સિદ્ધાંતો પર તેને છોડી દીધું. મને નિવૃત્તિની મોટી જાહેરાત કરવાની જરૂર ન લાગી, કારણ કે મારું શરીર મને કહી રહ્યું હતું કે હવે બસ. સાયનાના આ નિવેદને સ્પષ્ટ કર્યું છે કે તે માનસિક રીતે ઘણા સમય પહેલા તૈયાર થઈ ગઈ હતી.
ઘૂંટણની કાર્ટિલેજ ઘસાઈ ગઈ અને આર્થરાઈટિસ થયો
નિવૃત્તિ પાછળનું સૌથી મોટું અને દુઃખદ કારણ ઘૂંટણની ગંભીર બીમારી છે. સાયનાએ જણાવ્યું કે તેના ઘૂંટણની કાર્ટિલેજ (ગાદી) સંપૂર્ણપણે ઘસાઈ ગઈ છે અને તેને આર્થરાઈટિસની બીમારી થઈ છે. જે સાયના પહેલા દિવસના 8-9 કલાક સખત પ્રેક્ટિસ કરતી હતી, તે હવે માત્ર 1-2 કલાકની રમત બાદ પણ ઘૂંટણના અસહ્ય સોજા અને દુખાવાથી ઘેરાઈ જાય છે. રમત પ્રત્યેના ઝનૂન છતાં શારીરિક મર્યાદાઓએ તેને આ કઠોર નિર્ણય લેવા મજબૂર કરી છે.
કરિયરના પીક સમયે જ લાગ્યો હતો મોટો આંચકો
સાયનાની કરિયરમાં 2016ના રિયો ઓલિમ્પિક એક ટર્નિંગ પોઈન્ટ સાબિત થયા હતા. તે સમયે ઘૂંટણની ઈજાએ તેના ફોર્મ અને કરિયર પર ભારે અસર કરી હતી. જોકે, હાર ન માનવાના સ્વભાવવાળી સાયનાએ 2017ની વર્લ્ડ ચેમ્પિયનશિપમાં બ્રોન્ઝ અને 2018ની કોમનવેલ્થ ગેમ્સમાં ગોલ્ડ મેડલ જીતીને શાનદાર કમબેક કર્યું હતું. પરંતુ વારંવાર ઉભી થતી ઘૂંટણની સમસ્યાઓએ આખરે તેને 2024-25 સુધીમાં રમત છોડવા માટે વિવશ કરી દીધી.
વિશ્વની નંબર 1 બનીને ભારતનું નામ રોશન કર્યું
સાયના નેહવાલ માત્ર એક ખેલાડી નથી, પણ એક આંદોલન છે જેણે ભારતમાં બેડમિન્ટનને લોકપ્રિય બનાવ્યું. 2012ના લંડન ઓલિમ્પિકમાં બ્રોન્ઝ મેડલ જીતીને તે બેડમિન્ટનમાં ઓલિમ્પિક મેડલ લાવનાર પ્રથમ ભારતીય ખેલાડી બની હતી. પૂર્વ વિશ્વ નંબર 1 સાયનાએ ત્રણ ઓલિમ્પિકમાં ભારતનું પ્રતિનિધિત્વ કર્યું અને 2010 તેમજ 2018 કોમનવેલ્થ ગેમ્સમાં ગોલ્ડ મેડલ જીતીને ભારતને બેડમિન્ટનમાં સુપરપાવર બનાવવામાં મુખ્ય ભૂમિકા ભજવી હતી.
હવે નવી પેઢીને માર્ગદર્શન આપશે?
સાયનાની નિવૃત્તિ સાથે જ ભારતીય બેડમિન્ટનમાં એક યુગનો અંત આવ્યો છે. જોકે, તેની સિદ્ધિઓ આવનારી પેઢીઓ માટે હંમેશા પ્રેરણારૂપ રહેશે. સાયનાએ ભલે કોર્ટ છોડી હોય, પણ તેની રમત પ્રત્યેની સમજ અને અનુભવનો લાભ ભારતીય બેડમિન્ટનને એકેડેમી કે કોચિંગ દ્વારા મળતો રહેશે તેવી રમતપ્રેમીઓને આશા છે. સાયનાએ સાબિત કર્યું કે જો ઈચ્છાશક્તિ મજબૂત હોય તો એક મધ્યમવર્ગીય છોકરી પણ વિશ્વના શિખરે પહોંચી શકે છે.
