Kumkum Mohod Asian Games: એશિયન ગેમ્સ 2026ના અંતિમ દિવસે ભારતની યુવા તીરંદાજ કુમકુમ મોહોડે શાનદાર પ્રદર્શન કરતાં મહિલાઓની વ્યક્તિગત રિકર્વ ઇવેન્ટમાં ગોલ્ડ મેડલ જીતીને ઈતિહાસ રચ્યો છે. દક્ષિણ કોરિયાની ઓહ યેજિન સામેની રોમાંચક ફાઇનલ 5-5થી બરાબર રહ્યા બાદ મુકાબલો શૂટઓફમાં પહોંચ્યો હતો. અહીં કુમકુમે પરફેક્ટ 10નો નિશાન લગાવ્યો, જ્યારે ઓહ યેજિને 8નો સ્કોર કર્યો અને ભારતીય તીરંદાજે ગોલ્ડ પોતાના નામે કરી લીધો.
વ્યક્તિગત રિકર્વમાં ગોલ્ડ જીતનારી પ્રથમ ભારતીય મહિલા
કુમકુમની આ જીત ભારતીય આર્ચરી માટે ઐતિહાસિક છે. તે એશિયન ગેમ્સમાં મહિલાઓની વ્યક્તિગત રિકર્વ ઇવેન્ટમાં મેડલ જીતનારી પ્રથમ ભારતીય મહિલા બની છે અને આ મેડલને ગોલ્ડમાં ફેરવીને તેણે વધુ મોટી સિદ્ધિ હાંસલ કરી છે. આ જીત સાથે ભારતને લોસ એન્જેલસ ઓલિમ્પિક 2028 માટે એક ક્વોટા સ્થાન પણ મળ્યું છે.
ક્વાર્ટર ફાઇનલથી જ શરૂ થયો હતો શાનદાર સફર
ફાઇનલ સુધી પહોંચવાના માર્ગમાં કુમકુમે જબરદસ્ત પ્રદર્શન કર્યું હતું. ક્વાર્ટર ફાઇનલમાં તેણે વર્લ્ડ ચેમ્પિયન અને પૂર્વ ઓલિમ્પિક ગોલ્ડ મેડાલિસ્ટ કાંગ ચેયૉંગને 6-4થી હરાવી મોટો ઉલટફેર કર્યો હતો. ત્યારબાદ સેમિફાઇનલમાં ચીનની ઝૂ જિંગયીને 6-2થી હરાવીને ફાઇનલમાં સ્થાન મેળવ્યું હતું. ઝૂ સામેની સેમિફાઇનલમાં કુમકુમે 28-27, 30-30, 29-29 અને 29-28ના સ્કોર સાથે જીત મેળવી હતી. આ જીત સાથે તેણે ભારત માટે LA28 ઓલિમ્પિક ક્વોટા સ્થાન પણ નિશ્ચિત કર્યું હતું.
આ એશિયન ગેમ્સમાં કુમકુમનું બીજું ગોલ્ડ
કુમકુમ માટે આ એશિયન ગેમ્સમાં આ બીજો ગોલ્ડ મેડલ છે. અગાઉ તેણે અંકિતા ભક્ત અને કીર્તિ શર્મા સાથે મળીને મહિલાઓની રિકર્વ ટીમ ઇવેન્ટમાં ગોલ્ડ મેડલ જીત્યો હતો. આ ઉપરાંત ધીરજ બોમ્મદેવરા સાથે મિક્સ્ડ ટીમ ઇવેન્ટમાં તેણે સિલ્વર મેડલ પણ પોતાના નામે કર્યો છે. 17 વર્ષની કુમકુમની આ સિદ્ધિ ભારતીય આર્ચરી માટે મહત્વપૂર્ણ બની છે. વ્યક્તિગત ઇવેન્ટની ફાઇનલમાં દબાણ વચ્ચે શૂટઓફમાં પરફેક્ટ 10 ફટકારીને તેણે ગોલ્ડ મેડલ પોતાના નામે કર્યો અને એશિયન ગેમ્સમાં ભારત માટે યાદગાર પ્રદર્શન કર્યું.








