Asian Games 2026: ક્રિકેટ જગતમાં એક અનોખી અને ઐતિહાસિક ક્ષણ નજીક આવી રહી છે. એશિયન ગેમ્સ 2026 દરમિયાન 22 સપ્ટેમ્બરે સાનો ઇન્ટરનેશનલ ક્રિકેટ ગ્રાઉન્ડ પર જાપાનની ક્રિકેટ ટીમ પહેલીવાર વિશ્વની નંબર-1 T20 ટીમ ભારત સામે મેદાનમાં ઉતરશે. જાપાન ક્રિકેટ માટે આ એક ખૂબ જ મહત્વપૂર્ણ અને યાદગાર તક છે. આ મેચ માટે જાપાને પોતાની 15 સભ્યોની મજબૂત ટીમ જાહેર કરી દીધી છે, અને આ ટીમની કમાન અનુભવી ઓલરાઉન્ડર ખેલાડી કેન્ડલ કાડોવાકી-ફ્લેમિંગને સોંપવામાં આવી છે.
કોણ છે જાપાનના કેપ્ટન કેન્ડલ કાડોવાકી-ફ્લેમિંગ?
કેન્ડલ કાડોવાકી-ફ્લેમિંગ જાપાન ક્રિકેટના ઇતિહાસનો સૌથી સફળ અને ભરોસાપાત્ર બેટ્સમેન ગણાય છે. જાપાનમાં જન્મેલા ફ્લેમિંગ બાળપણમાં એટલે કે સાત વર્ષની નાની ઉંમરે ઓસ્ટ્રેલિયા શિફ્ટ થઈ ગયા હતા. તેમણે ઓસ્ટ્રેલિયાના સ્થાનિક ક્રિકેટમાં ક્વીન્સલેન્ડ માટે અંડર-17 સ્તરે શાનદાર પ્રદર્શન કર્યું હતું. જ્યારે તેઓ 18 વર્ષના થયા ત્યારે જાપાન ક્રિકેટ બોર્ડે તેમનો સંપર્ક કર્યો હતો. ત્યારથી તેઓ સતત જાપાન માટે રમતા રહ્યા છે. પોતાના કરિયરમાં તેમણે 55 T20 મેચોમાં 38ની સરેરાશથી 1,871 રન બનાવ્યા છે, જેમાં 2 સદી અને 12 અડધી સદી શામેલ છે.
ક્રિકેટર હોવા સાથે કોર્પોરેટ વર્લ્ડમાં પણ ચમકે છે ફ્લેમિંગ
કેન્ડલ માત્ર મેદાન પર જ નહીં, પરંતુ મેદાન બહાર પણ એક સફળ વ્યક્તિત્વ ધરાવે છે. તેઓ માત્ર એક પ્રોફેશનલ ક્રિકેટર જ નથી, પરંતુ એક મોટી વૈશ્વિક કંપનીમાં સિનિયર ફાઇનાન્શિયલ એનાલિસ્ટ તરીકે પોતાની સેવાઓ આપી રહ્યા છે. આ ઉપરાંત તેઓ પોતાની પ્લેયર મેનેજમેન્ટ કંપની પણ સફળતાપૂર્વક ચલાવે છે. રમતગમત અને કોર્પોરેટ વર્ક બેલેન્સ કરવાની તેમની આ ક્ષમતા ઘણા રમતપ્રેમીઓ માટે પ્રેરણાદાયી છે.
એમએસ ધોનીથી કેમ ડરતો હતો જાપાનનો કેપ્ટન?
ઓસ્ટ્રેલિયામાં ઉછરેલા અને ત્યાંનું ક્રિકેટ જોઈને મોટા થયેલા ફ્લેમિંગે એક ઇન્ટરવ્યુ દરમિયાન ભારતના પૂર્વ કેપ્ટન મહેન્દ્ર સિંહ ધોની સાથે જોડાયેલો એક અત્યંત રસપ્રદ કિસ્સો શેર કર્યો હતો. ફ્લેમિંગે જણાવ્યું હતું કે જ્યારે તેઓ બાળપણમાં ઓસ્ટ્રેલિયા અને ભારત વચ્ચેની મેચો જોતા હતા, ત્યારે એમએસ ધોની બેટિંગ કરવા આવે એટલે તેમને એક અલગ જ પ્રકારનો ગભરાટ થતો હતો. તેમને હંમેશાં એવો ડર રહેતો કે ધોની પિચ પર હશે તો ઓસ્ટ્રેલિયા જીતેલી મેચ પણ ગમે તે ક્ષણે હારી જશે. ધોનીનું ફિનિશર તરીકેનું પ્રદર્શન જોઈને તેઓ ધોનીની ક્ષમતા અને આક્રમક રમતથી ખૂબ પ્રભાવિત પણ હતા અને ડરતા પણ હતા.
ભારત સામે કેપ્ટન તરીકેની ભૂમિકા સંભાળશે ફ્લેમિંગ
જે ખેલાડી એક સમયે ટીવી સ્ક્રીન પર ભારતીય ક્રિકેટરો અને ધોનીના પ્રદર્શનથી પ્રભાવિત થઈને ડર અનુભવતો હતો, તે જ કેન્ડલ કાડોવાકી-ફ્લેમિંગ હવે એશિયન ગેમ્સ 2026માં પોતાની રાષ્ટ્રીય ટીમ જાપાનનું નેતૃત્વ કરશે. હવે આખી દુનિયાની નજર એ વાત પર રહેશે કે ભારતીય ટીમના વિશ્વસ્તરીય બોલરો અને બેટ્સમેનો સામે જાપાનની આ યુવા ટીમ અને તેના કેપ્ટન કેવું પ્રદર્શન કરે છે. ભારત અને જાપાન વચ્ચેની આ મેચ જોવા માટે ક્રિકેટ ચાહકો અત્યારથી જ ખૂબ ઉત્સાહિત છે.
