Aryavir Sehwag Scores Brilliant Runs: ભારતીય ક્રિકેટ ટીમના પૂર્વ ધુરંધર ઓપનર વીરેન્દ્ર સેહવાગની વિસ્ફોટક બેટિંગ શૈલી આજે પણ દરેક ફેન્સના મનમાં તાજી છે. હવે તેમનો 18 વર્ષીય પુત્ર આર્યવીર સેહવાગ પણ પિતાના પદચિહ્નો પર ચાલીને ક્રિકેટના મેદાનમાં પોતાની ઓળખ બનાવી રહ્યો છે. હાલમાં જ વીનુ માંકડ ટ્રોફીમાં અંડર-19 કક્ષાએ રમતા આર્યવીરે પોતાની શાનદાર અને તોફાની બેટિંગથી સહુનું ધ્યાન ખેંચ્યું છે. ચંડીગઢ સામે રમાયેલી મેચમાં તેણે વિરોધી બોલરોને બરાબરના દોડાવ્યા હતા અને પોતાની ઉત્કૃષ્ટ બેટિંગ ક્ષમતાનો પરિચય કરાવ્યો હતો.
143 બોલમાં ફટકાર્યા અણનમ 173 રન
વિજયનગરમના ડૉ. પીવીજી રાજુ સ્પોર્ટ્સ કોમ્પ્લેક્સ ખાતે દિલ્હી અને ચંડીગઢ વચ્ચે રમાયેલી આ મેચમાં આર્યવીરે શરૂઆતથી જ આક્રમક વલણ અપનાવ્યું હતું. તેણે માત્ર 143 બોલનો સામનો કરીને અણનમ 173 રનની વિશાળ ઇનિંગ્સ રમી હતી. આ તોફાની રમત દરમિયાન તેના બેટમાંથી 19 ચોગ્ગા અને 8 છગ્ગા છૂટ્યા હતા. આર્યવીરના આ શાનદાર પ્રદર્શનના જોરે દિલ્હીની ટીમે નિયત 50 ઓવરમાં 6 વિકેટના નુકસાને 289 રનનો મજબૂત સ્કોર બનાવ્યો હતો.
મુશ્કેલ પરિસ્થિતિમાં ટીમની કમાન સંભાળી
આ મેચમાં આર્યવીરે માત્ર રન જ ના બનાવ્યા પરંતુ જવાબદારીપૂર્વક બેટિંગ કરીને અલગ-અલગ તબક્કે ટીમ માટે મહત્વપૂર્ણ ભાગીદારીઓ પણ નોંધાવી હતી. દિલ્હીના બીજા ઓપનર અર્ણવ બુગ્ગાએ 47 રનનું યોગદાન આપ્યું હતું અને બંને વચ્ચે પ્રથમ વિકેટ માટે 98 રનની મજબૂત ભાગીદારી થઈ હતી. અર્ણવના આઉટ થયા બાદ આર્યવીરે અભિરાજ સિંહ (18 રન) સાથે ત્રીજી વિકેટ માટે 48 રન જોડ્યા હતા. ત્યારબાદ જ્યારે ટીમનો સ્કોર 4 વિકેટે 179 રન હતો, ત્યારે તેણે શાંતનુ યાદવ (અણનમ 27 રન) સાથે મળીને પાંચમી વિકેટ માટે 89 રન ઉમેરી ટીમને ભવ્ય સ્કોર સુધી પહોંચાડી હતી.
દિલ્હી અંડર-19 ટીમનું કરી રહ્યો છે નેતૃત્વ
આર્યવીર માટે આ ઇનિંગ્સ માનસિક રીતે પણ ખૂબ ખાસ બની રહી હતી. આ અગાઉની કર્ણાટક સામેની મેચમાં દિલ્હીની ટીમને 198 રનથી મોટી હારનો સામનો કરવો પડ્યો હતો, જેમાં કર્ણાટકના 418 રનના જવાબમાં દિલ્હી માત્ર 220 રનમાં સમેટાઈ ગયું હતું અને આર્યવીરે તેમાં 32 રન કર્યા હતા. પરંતુ ચંડીગઢ સામેની મેચમાં તેણે જોરદાર વાપસી કરી છે. ઉલ્લેખનીય છે કે આર્યવીર હાલ વીનુ માંકડ ટ્રોફીમાં દિલ્હી અંડર-19 ટીમની કપ્તાની કરી રહ્યો છે.
ભારત માટે પણ રમી ચૂક્યો છે આર્યવીર
આર્યવીર સેહવાગ સતત પોતાના પ્રદર્શનમાં સુધારો કરી રહ્યો છે. આ અગાઉ સપ્ટેમ્બર મહિનામાં ઓસ્ટ્રેલિયા સામે રમાયેલી ત્રણ મેચની યુવા વનડે શ્રેણીમાં તેણે ભારતીય ટીમનું પ્રતિનિધિત્વ કર્યું હતું, જ્યાં તેણે ત્રણ ઇનિંગ્સમાં કુલ 109 રન બનાવ્યા હતા. હવે ચંડીગઢ સામે રમેલી આ મોટી અને મેચ વિનિંગ ઇનિંગ્સ બાદ દિલ્હીની ટીમને આગામી મેચોમાં પણ પોતાના કપ્તાન પાસેથી આવા જ સાતત્યપૂર્ણ અને વિસ્ફોટક પ્રદર્શનની આશા રહેશે.
