Ravindra Jadeja Loses No. 1 Test Ranking: સાઉથ આફ્રિકાના 26 વર્ષીય અને 6 ફૂટ 8 ઇંચ ઊંચા ઝડપી બોલર માર્કો યાનસેને ઓસ્ટ્રેલિયા સામેની ટેસ્ટ મેચમાં યાદગાર રમત રમી બતાવી હતી. વર્લ્ડ ટેસ્ટ ચેમ્પિયનશિપ અંતર્ગત રમાયેલી આ મેચમાં યાનસેને બેટ અને બોલ બંનેથી કમાલ કર્યો હતો. તેણે ઓસ્ટ્રેલિયાની પહેલી ઇનિંગમાં શાનદાર બેટિંગ કરતા 85 રન ફટકાર્યા હતા અને સાથે જ પાંચ મહત્વપૂર્ણ વિકેટ પણ ઝડપી હતી. આ શાનદાર મેચ વિનિંગ પ્રદર્શનના કારણે તેને ICC રેન્કિંગમાં જબરદસ્ત ફાયદો થયો છે.
ઓલરાઉન્ડરની સાથે ટેસ્ટ બોલિંગ રેન્કિંગમાં પણ નંબર-1 બન્યા માર્કો યાનસેન
માર્કો યાનસેને માત્ર ઓલરાઉન્ડર જ નહીં, પરંતુ ટેસ્ટ બોલિંગ રેન્કિંગમાં પણ સર્વોચ્ચ સ્થાન મેળવી લીધું છે. તેણે ઓસ્ટ્રેલિયાના દિગ્ગજ બોલર મિશેલ સ્ટાર્કને પાછળ છોડીને બોલરોના લિસ્ટમાં પણ ટોચનું સ્થાન પ્રાપ્ત કર્યું છે. ટેસ્ટ કરિયરમાં પહેલીવાર યાનસેને બોલિંગ અને ઓલરાઉન્ડર બંને મુખ્ય કેટેગરીમાં નંબર-1 તાજ હાંસલ કરીને એક મોટી સિદ્ધિ પોતાના નામે કરી છે.
રવીન્દ્ર જાડેજાની ચાર વર્ષના લાંબા રાજનો આવ્યો અંત
ભારતીય ઓલરાઉન્ડર રવીન્દ્ર જાડેજા છેલ્લા ચાર વર્ષથી વધુ સમયથી વિશ્વના નંબર-1 ટેસ્ટ ઓલરાઉન્ડર તરીકે અકબંધ રહ્યા હતા. પરંતુ તાજેતરના રેટિંગ ફેરફારો બાદ તેઓ 422 રેટિંગ પોઈન્ટ્સ સાથે બીજા સ્થાન પર સરકી ગયા છે. બીજી તરફ, માર્કો યાનસેન 451 રેટિંગ પોઈન્ટ્સ મેળવીને વિશ્વના નવા નંબર-1 ટેસ્ટ ઓલરાઉન્ડર બની ગયા છે.
ટેમ્બા બાવુમા અને અન્ય ખેલાડીઓની રેન્કિંગમાં પણ સુધારો
આ લેટેસ્ટ રેન્કિંગ અપડેટમાં સાઉથ આફ્રિકાના કપ્તાન ટેમ્બા બાવુમાને પણ મોટો ફાયદો થયો છે. ઓસ્ટ્રેલિયા સામે શાનદાર સદી (179 રન) ફટકારીને પ્લેયર ઓફ ધ મેચ બનેલા બાવુમા ચાર સ્થાનની છલાંગ લગાવીને ટેસ્ટ બેટિંગ રેન્કિંગમાં બીજા સ્થાને પહોંચી ગયા છે. આ ઉપરાંત સાઉથ આફ્રિકાના સ્પિનર સિમોન હાર્મર અને ઓસ્ટ્રેલિયાના સ્કોટ બોલેન્ડની રેન્કિંગમાં પણ સુધારો જોવા મળ્યો છે.
