PM Modi Israel parliament: ભારતના વડાપ્રધાન નરેન્દ્ર મોદીએ ઇઝરાયેલની સંસદ નેસેટમાં સંબોધન દરમિયાન ગુજરાતના જામ સાહેબ દ્વારા દ્વિતીય વિશ્વયુદ્ધ દરમિયાન આપવામાં આવેલી માનવતાભરી શરણની ઘટનાને યાદ કરી હતી. તેમણે કહ્યું કે હોલોકોસ્ટ માનવ ઇતિહાસનું અંધકારમય પ્રકરણ હતું, છતાં પણ તે સમયગાળા દરમિયાન માનવતા જીવંત રહી હતી, જેનો અનોખો દાખલો ગુજરાતના નવાનગરના મહારાજા હતા.
જામ સાહેબની માનવતા: 'ધ ગુડ મહારાજા'
દિગ્વિજયસિંહજી રણજીતસિંહજી જાડેજા, જેમને જામ સાહેબ તરીકે ઓળખવામાં આવે છે, તેમણે 1940ના દાયકામાં પોલેન્ડના આશરે 500 મહિલાઓ અને 200 બાળકોને બાલાછડી (જામનગર નજીક) આશ્રય આપ્યો હતો. તે સમયગાળા દરમિયાન એડોલ્ફ હિટલરે પોલેન્ડ પર આક્રમણ કરીને બીજા વિશ્વયુદ્ધની શરૂઆત કરી હતી. યુદ્ધની ભયાનક પરિસ્થિતિમાં અનેક દેશોએ શરણ આપવા ઇનકાર કર્યો હતો, પરંતુ જામ સાહેબે પોતાના રાજ્યના દરવાજા ખોલી દીધા. બાલાછડી ખાતે શરણાર્થી કેમ્પ સ્થાપી નવ વર્ષ સુધી તેમના ભોજન, રહેવા અને શિક્ષણની વ્યવસ્થા કરવામાં આવી. બાળકોને સ્થાનિક સૈનિક શાળામાં ભણાવવાની સુવિધા પણ અપાઈ. પોલેન્ડ પરત ફર્યા બાદ પણ આ બાળકો જામ સાહેબને 'ધ ગુડ મહારાજા' તરીકે યાદ કરે છે.
આતંકવાદ પર સ્પષ્ટ વલણ
મોદીએ પોતાના સંબોધનમાં આતંકવાદ સામે ભારતની 'ઝીરો ટોલરન્સ' નીતિ ફરી દોહરાવી. તેમણે જણાવ્યું કે આતંકવાદ મુદ્દે બેવડું વલણ સહન નહીં કરવામાં આવે. ભારત ક્ષેત્રિય સ્થિરતા અને શાંતિનો સમર્થક છે અને અબ્રાહમ એકકોર્ડ્સને પણ સમર્થન આપે છે. તેમણે વધુમાં ઉમેર્યું કે ભારત અને ઇઝરાયેલના સંબંધો લગભગ 2000 વર્ષ જૂના છે. પ્રથમ વિશ્વયુદ્ધ દરમિયાન હાઇફાની લડાઈમાં આશરે 4000 ભારતીય સૈનિકોએ શહીદી વ્હોરી હતી, જે બંને દેશોના ઐતિહાસિક સંબંધોને વધુ ગાઢ બનાવે છે.
ભારત-ઇઝરાયેલ સંબંધોની ઐતિહાસિક કડી
ભારતમાં યહૂદી સમુદાયે સદીઓથી નિર્ભય રીતે જીવન વ્યતીત કર્યું છે અને દેશના વિકાસમાં યોગદાન આપ્યું છે. મોદીએ આ વાત પર ભાર મૂકતા કહ્યું કે યહૂદી નરસંહારનો ઇતિહાસ કાળો છે, પરંતુ ભારત હંમેશા માનવતા અને સહઅસ્તિત્વના મૂલ્યો પર અડગ રહ્યું છે. જામ સાહેબની ઘટના માત્ર ઐતિહાસિક કિસ્સો નથી, પરંતુ તે ભારતની સંસ્કૃતિમાં રહેલા કરુણા અને સહિષ્ણુતાના મૂલ્યોનો જીવંત પુરાવો છે, જેને વડાપ્રધાન મોદીએ વૈશ્વિક મંચ પર ફરી ઉજાગર કર્યા.
