Vav-Tharad Crime News: શિક્ષક દિને જ વાવ-થરાદના સરહદી પંથકમાંથી શિક્ષણ જગતને શરમસાર કરતી ચોંકાવનારી ઘટના સામે આવી છે. સરકારી માધ્યમિક શાળાના આચાર્ય સામે 15 વર્ષીય વિદ્યાર્થિની પર દુષ્કર્મ આચર્યાનો આરોપ લાગ્યો છે. સગીરાની ફરિયાદના આધારે પોલીસે આચાર્ય વિરુદ્ધ ગુનો નોંધી તપાસ શરૂ કરી છે.
શાળાના રૂમમાં બોલાવી દુષ્કર્મ
પોલીસ ફરિયાદ મુજબ, શાળામાં હાજર સગીરાને આચાર્ય મનિષ પરમારે શાળાના એક રૂમમાં બોલાવી હતી. ફરિયાદમાં આરોપ છે કે રૂમનો દરવાજો બંધ કર્યા બાદ સગીરાની મરજી વિરુદ્ધ દુષ્કર્મ આચરવામાં આવ્યું હતું. ફરિયાદમાં વધુમાં આરોપ લગાવવામાં આવ્યો છે કે ઘટના અંગે કોઈને જાણ ન કરવા માટે સગીરાને ગંભીર પરિણામોની અને જાનથી મારી નાખવાની ધમકી પણ આપવામાં આવી હતી.
વાલીઓ અને સામાજિક આગેવાનોમાં રોષ
ઘટનાની જાણ થતાં જ વાવ-થરાદના સરહદી પંથકમાં વાલીઓ અને સામાજિક આગેવાનોમાં રોષ જોવા મળી રહ્યો છે. શિક્ષણ ક્ષેત્ર સાથે જોડાયેલા વ્યક્તિ સામે સગીરા દ્વારા કરવામાં આવેલા ગંભીર આરોપને પગલે લોકો દ્વારા કડક કાર્યવાહી કરવાની માંગ કરવામાં આવી રહી છે.
માવસરી પોલીસે POCSO હેઠળ તપાસ શરૂ કરી
સગીરાની ફરિયાદના આધારે માવસરી પોલીસે આચાર્ય મનિષ પરમાર વિરુદ્ધ POCSO એક્ટ સહિત ભારતીય ન્યાય સંહિતાની સંબંધિત કલમો હેઠળ ગુનો નોંધ્યો છે. પોલીસે સમગ્ર મામલે તપાસ શરૂ કરી છે અને ફરિયાદમાં કરવામાં આવેલા આરોપોની કાયદેસરની તપાસ હાથ ધરવામાં આવી રહી છે.
