Vadodara Crime News: વડોદરાના સોમા તળાવ ચાર રસ્તા પાસે વણઝારા સમાજના નવરાત્રિ મહોત્સવ દરમિયાન 26 વર્ષીય નિલેશ વણઝારાની ચપ્પુના ઘા ઝીંકીને હત્યા કરવામાં આવતાં ચકચાર મચી ગઈ છે. પાર્ટી પ્લોટની બહાર મોડી રાત્રે અજાણ્યા શખસોએ નિલેશ પર હુમલો કર્યો હતો. ઘટનાને પગલે પરિવારજનોમાં શોક અને આક્રોશની લાગણી ફેલાઈ છે. પુત્રના મોતથી ભાંગી પડેલી માતાએ આક્રંદ કરતાં કહ્યું, “મારા રાજા બાબુ, તું પાછો આવી જા... તારા વિના તારી મમ્મી સૂની છે.” બીજી તરફ, હત્યા પાછળનું ચોક્કસ કારણ હજી સામે આવ્યું નથી અને પોલીસે આરોપીઓને શોધવા તપાસ તેજ કરી છે.
નવરાત્રિ મહોત્સવની બહાર યુવકની હત્યા
વડોદરાના સોમા તળાવ ચાર રસ્તા પાસે આવેલા પાર્ટી પ્લોટમાં વણઝારા સમાજનો નવરાત્રિ મહોત્સવ ચાલી રહ્યો હતો. આ દરમિયાન પાર્ટી પ્લોટની બહાર મોડી રાત્રે નિલેશ વણઝારા પર અજાણ્યા શખસોએ ચપ્પુ વડે હુમલો કર્યો હતો. હુમલામાં ગંભીર ઈજાઓ થતાં તેનું મોત થયું હતું. ઘટનાની જાણ થતાં DCP અભિષેક ગુપ્તા સહિતના પોલીસ અધિકારીઓ ઘટનાસ્થળે દોડી ગયા હતા. પ્રાથમિક ચર્ચા મુજબ, જૂની અદાવતને કારણે હત્યા થઈ હોવાની આશંકા વ્યક્ત કરવામાં આવી રહી છે. જોકે, હત્યા પાછળનું ચોક્કસ કારણ હજી સ્પષ્ટ થયું નથી.
‘મારા રાજા બાબુ, તું પાછો આવી જા...’
નિલેશની હત્યાથી પરિવાર પર દુઃખનો પહાડ તૂટી પડ્યો છે. પુત્રના મોતથી આઘાતમાં સરી પડેલી માતાએ આક્રંદ સાથે કહ્યું, “મારા દીકરા નિલેશ... મારા રાજા બાબુ... પાછો આવી જા મારા દીકરા... તારા વિના તારી આ મમ્મી સૂની છે, મારા બેટા...” માતાના આ હૃદયદ્રાવક આક્રંદથી ઘટનાસ્થળે અને પરિવારમાં શોકનું વાતાવરણ છવાઈ ગયું હતું. પરિવારજનોએ નિલેશની હત્યા અંગે આક્રોશ વ્યક્ત કર્યો હતો. માતાએ એવો આક્ષેપ પણ કર્યો હતો કે અન્ય લોકો વચ્ચેના ઝઘડામાં તેના નિર્દોષ દીકરાનો જીવ ગયો.
મોબાઇલ ફોન અને કામના સ્થળે તપાસ
હત્યા કેસની તપાસ માટે કપુરાઈ પોલીસ ઉપરાંત લોકલ ક્રાઈમ બ્રાન્ચ (LCB) અને ડિટેક્શન ઓફ ક્રાઈમ બ્રાન્ચ (DCB)ની ટીમો કામે લાગી છે. પોલીસ મૃતકના રહેઠાણ અને કામના સ્થળે તપાસ કરી રહી છે. આ ઉપરાંત, નિલેશના મોબાઇલ ફોનની વિગતો, ટેક્નિકલ સર્વેલન્સ અને હ્યુમન ઇન્ટેલિજન્સની મદદથી સંભવિત આરોપીઓ સુધી પહોંચવાના પ્રયાસો હાથ ધરવામાં આવ્યા છે. ઘટનાસ્થળ અને આસપાસના વિસ્તારોના CCTV ફૂટેજ પણ તપાસવામાં આવી રહ્યા છે.
હત્યા પાછળનું કારણ હજી અકબંધ
નિલેશ વણઝારાની હત્યા જૂની અદાવતને કારણે થઈ હોવાની આશંકા વ્યક્ત કરવામાં આવી રહી છે, પરંતુ આ અંગે સત્તાવાર રીતે કોઈ કારણની પુષ્ટિ થઈ નથી. હુમલામાં કોણ સામેલ હતું અને હત્યા પાછળનો હેતુ શું હતો તે જાણવા પોલીસ વિવિધ પાસાંથી તપાસ કરી રહી છે. DCP ઝોન-3 અભિષેક ગુપ્તાના જણાવ્યા અનુસાર, પાર્ટી પ્લોટની સામેના રોડ પર નિલેશભાઈ વણઝારાની હત્યા કરવામાં આવી હતી. આ કેસમાં સ્થાનિક પોલીસ સ્ટેશન, ક્રાઈમ બ્રાન્ચ અને DCBની અલગ-અલગ ટીમો CCTV ફૂટેજ તપાસી રહી છે અને વિવિધ દિશામાં તપાસ હાથ ધરવામાં આવી છે. હાલ પોલીસ આરોપીઓની શોધખોળ કરી રહી છે. હત્યાનું ચોક્કસ કારણ અને આરોપીઓની ઓળખ તપાસ પૂર્ણ થયા બાદ જ સ્પષ્ટ થશે.
