Vishwa Vadoya Junagadh PM Modi Vadodara: જૂનાગઢ જિલ્લાના માળિયા હાટીના તાલુકાના એક નાનકડા ગામની 23 વર્ષીય નેશનલ ગોલ્ડ મેડલિસ્ટ અને ઈન્ટરનેશનલ ચેસ પ્લેયર વિશ્વા હિતેશભાઈ વાડોયા વડોદરા ખાતે વડાપ્રધાન નરેન્દ્ર મોદીને રૂબરૂ જોઈને અત્યંત ભાવુક થઈ ગઈ હતી. વડાપ્રધાનને નજીકથી જોતાં જ વિશ્વાની આંખોમાંથી ખુશીના આંસુ વહી નીકળ્યા હતા. આ ભાવુક ક્ષણનો વીડિયો સોશિયલ મીડિયા પર ભારે વાયરલ થઈ રહ્યો છે. વિશ્વાએ સ્વીકાર્યું હતું કે વડાપ્રધાનને રૂબરૂ મળવાનું તેનું સ્વપ્ન આજે પૂરું થયું છે.
"મોદીજી તમે મારા પિતાના ભગવાન છો"
પોતાની લાગણી વ્યક્ત કરતાં વિશ્વાએ જણાવ્યું હતું કે, "હું એક ખૂબ જ નાના ગામમાંથી આવું છું જ્યાં છોકરીઓને રમતગમતમાં આગળ વધવાની મંજૂરી મળતી ન હતી. પરંતુ મારા પિતા હિતેશભાઈએ મારા પર વિશ્વાસ રાખ્યો અને ખેલ મહાકુંભમાં મારું નામ નોંધાવ્યું. મોદીજી, તમે મારા પિતા માટે ભગવાન સમાન છો અને આજે તમને રૂબરૂ જોઈને મારું જીવન ધન્ય થઈ ગયું છે."
ખેલ મહાકુંભથી બની સ્પોર્ટ્સ ઓથોરિટીમાં કોચ
વિશ્વા માટે વડાપ્રધાન નરેન્દ્ર મોદી દ્વારા ગુજરાતના મુખ્યમંત્રી તરીકેના કાર્યકાળ દરમિયાન શરૂ કરવામાં આવેલો 'ખેલ મહાકુંભ' તેની કારકિર્દીનો ટર્નિંગ પોઈન્ટ સાબિત થયો હતો. ખેલ મહાકુંભથી શરૂઆત કર્યા બાદ વિશ્વાએ રાજ્ય, રાષ્ટ્રીય અને આંતરરાષ્ટ્રીય FIDE રેટિંગ ટુર્નામેન્ટ્સમાં દેશ અને રાજ્યનું પ્રતિનિધિત્વ કર્યું હતું. આ રમતગમત ક્ષેત્રે મેળવેલી સિદ્ધિઓના આધારે આજે તે સ્પોર્ટ્સ ઓથોરિટી ઓફ ગુજરાત (SAG)માં ચેસ ટ્રેનર (કોચ) તરીકે સરકારી નોકરી કરી રહી છે.
અભ્યાસ અને રમતનો તમામ ખર્ચ સરકારે ઉપાડ્યો
પોતાની સફળતાનો શ્રેય રાજ્ય સરકારની યોજનાઓને આપતાં વિશ્વાએ ઉમેર્યું કે,"નાના ગામના ખેલાડીઓ માટે પ્લેટફોર્મ મેળવવું મુશ્કેલ હોય છે પરંતુ, સરકારની DLSS યોજના અને ખેલ મહાકુંભને કારણે મારો અભ્યાસ અને ચેસ રમતનો તમામ રહેવા-જમવાનો અને તાલીમનો ખર્ચ સરકારે ઉપાડ્યો છે. જો ખેલ મહાકુંભ શરૂ ન થયો હોત, તો મારી આ સફર ક્યારેય શક્ય ન બની હોત."
ખેલ મહાકુંભ અને DLSS યોજના અંગે વિશેષ માહિતી
ખેલ મહાકુંભ (Khel Mahakumbh): આ યોજના વર્ષ 2010માં ગુજરાતના તત્કાલીન મુખ્યમંત્રી નરેન્દ્ર મોદી દ્વારા શરૂ કરવામાં આવી હતી. આ યોજનાનો મુખ્ય ઉદ્દેશ્ય ગ્રામીણ અને શહેરી વિસ્તારોમાંથી રમતગમતની પ્રતિભા શોધીને તેને યોગ્ય પ્લેટફોર્મ અને રોકડ પુરસ્કારો પૂરા પાડવાનો છે. આજે આ યોજનાથી હજારો ખેલાડીઓ રાષ્ટ્રીય સ્તરે ચમકી રહ્યા છે.
DLSS યોજના (District Level Sports School): ગુજરાત સરકારના રમતગમત, યુવા અને સાંસ્કૃતિક પ્રવૃત્તિઓ વિભાગ દ્વારા સંચાલિત આ યોજના હેઠળ પસંદગી પામેલા બાળ ખેલાડીઓને મફત શિક્ષણ, સ્પોર્ટ્સ કોચિંગ, પૌષ્ટિક ખોરાક અને રહેવાની સુવિધા આપવામાં આવે છે, જેથી તેઓ અભ્યાસની સાથે રમતમાં પણ નિપુણ બની શકે.
