Dholka Chemical Water Protest: ધોળકા તાલુકાના ભેટાવાડા, ત્રાસદ, નેસડા અને પાલડી સહિતના પાંચ ગામના લોકો છેલ્લા 11 દિવસથી દૂષિત કેમિકલયુક્ત પાણી સામે ઉગ્ર આંદોલન ચલાવી રહ્યા છે. સ્થાનિક રહીશોનો આરોપ છે કે છેલ્લા 15 વર્ષથી નગરપાલિકાનું ગંદુ પાણી અને આસપાસની ફેક્ટરીઓનું ઝેરી પાણી ખુલ્લામાં છોડી દેવામાં આવે છે. વારંવાર રજૂઆતો કરવા છતાં તંત્ર કે સ્થાનિક નેતાઓ દ્વારા કોઈ યોગ્ય કાયમી ઉકેલ લાવવામાં આવ્યો નથી. આ પરિસ્થિતિથી કંટાળેલા ગ્રામજનોએ હવે લડાઈ લડવાનો નિર્ણય કરી લીધો છે.
ગંદુ પાણી બોરવેલમાં ભળતાં રોગચાળો: 11 લોકોના કેન્સરથી મોતનો આક્ષેપ
ઔદ્યોગિક એકમો દ્વારા ખુલ્લામાં છોડાતા કેમિકલયુક્ત ઝેરી પાણીના કારણે ભૂગર્ભ જળ દૂષિત થઈ ગયા છે, જેના લીધે ખેતરોની હજારો એકર જમીન બરબાદ થઈ રહી છે. એટલું જ નહીં, બોરવેલનું પાણી પણ ઝેરી બનતા આ વિસ્તારમાં ચામડીના ભયાનક રોગો અને કેન્સર જેવી ગંભીર બીમારીઓનું પ્રમાણ ખૂબ વધી ગયું છે. સ્થાનિક લોકોનો દાવો છે કે આ દૂષિત પાણીના લીધે અત્યાર સુધીમાં 5 ગામોમાં 11થી વધુ લોકોના કેન્સરના કારણે મોત થયા છે, જ્યારે 50થી વધુ લોકો હાલમાં પણ કેન્સર સામે ઝઝૂમી રહ્યા છે.
ઉકેલ નહીં આવે તો MLA અને નગરપાલિકા કાર્યાલય પર ટેન્કર ઠાલવાશે
લાંબા સમયથી ચાલતા આંદોલન બાદ પણ પરિણામ ન મળતાં આખરે ગ્રામજનોની સબરની સીમા તૂટી ગઈ છે. દેખાવકારોએ ચીમકી આપી છે કે જો તંત્ર દ્વારા આ દૂષિત અને ઝેરી પાણીનો તાત્કાલિક કાયમી નિકાલ કરવામાં નહીં આવે, તો તેઓ કેમિકલવાળા ગંદા પાણીના ટેન્કરો ભરીને ધોળકાના ભાજપ ધારાસભ્ય કિરીટસિંહ ડાભીના નિવાસસ્થાને અને નગરપાલિકાની કચેરીમાં જઈને ઠાલવશે. જનતાનો આ આક્રોશ હવે રાજ્યભરમાં ચર્ચાનો વિષય બન્યો છે.
તંત્ર એક્શનમાં: કેડિલા ફાર્મા સહિત 5 ઔદ્યોગિક એકમોને કડક નોટિસ ફટકારાઈ
ગ્રામજનોના આક્રમક વલણ અને વધતા જનઆક્રોશને ધ્યાનમાં રાખીને આખરે સરકારી તંત્ર પણ હરકતમાં આવ્યું છે. તંત્ર દ્વારા આ વિસ્તારમાં આવેલી કેડિલા ફાર્માસ્યુટિકલ્સ, કોનકાર્ડ બાયોટેક, જીમાં ટેક્સ, ધરમચંદ અલ્ટ્રા કેમ અને વાસા ફાર્મા નામની 5 કંપનીઓને રૂબરૂમાં નોટિસ પાઠવવામાં આવી છે. આ તમામ કંપનીઓને પોતાના બચાવમાં જરૂરી પુરાવા રજૂ કરવાનો સમય આપવામાં આવ્યો છે અને જો નિયત સમયમાં યોગ્ય ખુલાસો નહીં થાય તો તેમની સામે કાનૂની જોગવાઈઓ હેઠળ અત્યંત કડક કાર્યવાહી કરવાની સ્પષ્ટ ચેતવણી આપવામાં આવી છે.
