Two cargo ships collide: કંડલા બંદર નજીક બે માલવાહક જહાજ વચ્ચે ટક્કર થતાં દરિયામાં તંગ પરિસ્થિતિ સર્જાઈ હતી. ઘટનાની જાણ થતાં ભારતીય કોસ્ટ ગાર્ડે તાત્કાલિક રેસ્ક્યુ ઓપરેશન હાથ ધરીને એક જહાજમાં સવાર 21 સભ્યોને સુરક્ષિત રીતે બહાર કાઢ્યા હતા. સંરક્ષણ બાબતના જનસંપર્ક અધિકારી, ચેન્નઈ દ્વારા શનિવારે આ સફળ બચાવ કામગીરીની માહિતી આપવામાં આવી હતી. મર્ચન્ટ વેસલ MC કેમેક્સ એમ્પરર અને MV ટુ મેરિનર વચ્ચે આ ટક્કર થઈ હોવાનું જણાવાયું છે.
21ને સુરક્ષિત રીતે બચાવી લેવામાં આવ્યા
ડિફેન્સ PRO ચેન્નઈએ સોશિયલ મીડિયા પ્લેટફોર્મ X પર માહિતી આપતા જણાવ્યું કે MV કેમેક્સ એમ્પરર પર કુલ 24 સભ્યો સવાર હતા, જેમાંથી 21ને સુરક્ષિત રીતે બચાવી લેવામાં આવ્યા છે. જ્યારે જહાજના જરૂરી સંચાલન અને સુરક્ષા માટે ત્રણ સભ્યોને હજુ પણ બોર્ડ પર રાખવામાં આવ્યા છે. બંને જહાજોની સ્થિતિ તેમજ ક્રૂ સભ્યોની સુરક્ષા અંગે વધુ વિગતો મેળવવાની કામગીરી ચાલી રહી છે.
ગેરકાયદેસર દાણચોરીના પ્રયાસનો પર્દાફાશ કર્યો
દરમિયાન, મહારાષ્ટ્રના મુંબઈ દરિયાકાંઠે ભારતીય કોસ્ટ ગાર્ડે શંકાસ્પદ બોટને ઝડપી પાડી ગેરકાયદેસર દાણચોરીના પ્રયાસનો પર્દાફાશ કર્યો છે. 10 સપ્ટેમ્બર 2026ના રોજ બપોરે 2:10 વાગ્યે ઓફશોર ઓઈલ રિગ નજીક શંકાસ્પદ ગતિવિધિ અંગે માહિતી મળ્યા બાદ કોસ્ટ ગાર્ડે તાત્કાલિક પોતાની એડવાન્સ્ડ ઓફશોર પેટ્રોલ વેસલને તપાસ માટે મોકલી હતી. રાત્રિના સમયે બોટને ઘેરીને હાથ ધરાયેલી તપાસમાં ગેરકાયદેસર દારૂ અને આશરે ₹10 લાખની બિનહિસાબી રોકડ મળી આવી હતી.
તપાસ માટે મુંબઈ હાર્બર સુધી લાવવામાં આવી
કાર્યવાહી દરમિયાન બોટમાં સવાર છ ક્રૂ સભ્યોને કસ્ટડીમાં લેવામાં આવ્યા હતા અને શંકાસ્પદ બોટને વધુ તપાસ માટે મુંબઈ હાર્બર સુધી લાવવામાં આવી હતી. કંડલા નજીક જહાજ અથડાવાની ઘટના હોય કે મુંબઈ દરિયાકાંઠે શંકાસ્પદ બોટ પકડાવાની કાર્યવાહી, બંને કિસ્સામાં ભારતીય કોસ્ટ ગાર્ડની ઝડપી કામગીરી મહત્વપૂર્ણ રહી છે. હવે સંબંધિત એજન્સીઓ દ્વારા બંને ઘટનાઓમાં આગળની તપાસ અને જરૂરી કાયદેસરની કાર્યવાહી હાથ ધરવામાં આવી રહી છે.
