Bahucharaji Navratri Celebration: આદ્યશક્તિની આરાધનાના પવિત્ર પર્વ નવરાત્રિ દરમિયાન યાત્રાધામ બહુચરાજી ખાતે ભારે ધાર્મિક ઉલ્લાસ જોવા મળી રહ્યો છે. આસો સુદ એકમના દિવસે ઘટસ્થાપન વિધિ સાથે શરૂ થયેલા ઉત્સવમાં શ્રદ્ધાળુઓ મનોભાવથી માતાજીની ભક્તિમાં લીન બન્યા છે. મંદિરમાં શાસ્ત્રોક્ત વિધિ-વિધાન સાથે દિવસે હોમ-હવન, પૂજા-અર્ચના અને રાત્રિના સમયે પ્રાચીન ગરબાઓનું સુંદર આયોજન કરવામાં આવી રહ્યું છે, જેના દર્શન કરી માઇભક્તો ધન્યતા અનુભવે છે.
શતચંડી યજ્ઞની પૂર્ણાહુતિ અને શોભાયાત્રાનું આયોજન
નવરાત્રિ ઉત્સવ દરમિયાન બહુચરાજી મંદિરમાં શતચંડી યજ્ઞનું વિશેષ ધાર્મિક મહત્વ રહેલું છે. સતત ત્રણ દિવસ સુધી ચાલનારા આ પવિત્ર શતચંડી યજ્ઞની પૂર્ણાહુતિ રવિવારે સાંજે 4:30 કલાકે યોજાશે. ત્યારબાદ દુર્ગાષ્ટમીની વિશેષ રાત્રિએ 9:30 કલાકે માતાજીની એક ભવ્ય તથા આકર્ષક શોભાયાત્રા નીકળશે, જેમાં મોટી સંખ્યામાં શ્રદ્ધાળુઓ જોડાય છે.
મધ્યરાત્રિએ માતાજીના સન્મુખ ભરાશે પલ્લી
દુર્ગાષ્ટમીની રાત્રે નીકળેલી શોભાયાત્રા નિશ્ચિત માર્ગો પર ફરીને મંદિરે પરત ફર્યા બાદ, રાત્રે 12:00 કલાકે માતાજીના સન્મુખ પરંપરાગત પલ્લી (નવૈધ) ભરવામાં આવશે. આસો સુદ આઠમની રાત્રિ સાથે લાખો માઇભક્તોની ગાઢ શ્રદ્ધા જોડાયેલી છે. ખાસ કરીને જે પરિવાર અને સમાજની કુળદેવી મા બહુચર છે, તેઓ આ ધાર્મિક પ્રસંગે ખાસ ઉપસ્થિત રહે છે. જે લોકો રાત્રે રૂબરૂ હાજર રહી શકતા નથી, તેઓ સવારથી સાંજ સુધી માતાજીના દર્શન કરી ધન્યતા અનુભવે છે.
વિજયાદશમીએ જવેરા ઉત્થાપન વિધિ અને પ્રસાદનું મહત્વ
નવરાત્રિના સમાપન બાદ આસો સુદ દશમ (વિજયાદશમી)ના દિવસે સવારે 7:30 કલાકે જવેરાની ઉત્થાપન વિધિ શાસ્ત્રોક્ત ઢબે કરવામાં આવશે. શ્રદ્ધાળુઓ આ જવેરાને સુખ, રિદ્ધિ-સિદ્ધિ અને સમૃદ્ધિનું પ્રતિક માને છે, જેના કારણે જવેરાનો એક નાનામાં નાનો ટુકડો પ્રસાદી રૂપે મેળવવા માટે માઇભક્તોમાં ભારે ઉત્સાહ જોવા મળે છે.
બહુચરાજીમાં વર્ષમાં 15 વખત નીકળે છે માતાજીની સવારી
યાત્રાધામ બહુચરાજીની એક અનોખી પરંપરા મુજબ, વર્ષ દરમિયાન કુલ 15 વખત માતાજીની સવારી નીકળે છે. આમાં દર મહિનાની પૂનમ, ચૈત્ર અને આસો મહિનાની આઠમ તેમજ વિજયાદશમીના દિવસે શમી વૃક્ષના પૂજન અર્થે માતાજીના મંદિરથી બેચર ગામ તરફ સવારી લઈ જવામાં આવે છે. સદીઓ જૂની આ પવિત્ર પરંપરા આજે પણ એટલી જ આસ્થા અને શ્રદ્ધા સાથે જાળવી રાખવામાં આવી છે.
