Mehsana News: મહેસાણા તાલુકાના સાલડી ગામમાં આવેલ સ્વયંભૂ પીપળેશ્વર મહાદેવ મંદિર પરિસરમાં ચોરીની ચોંકાવનારી ઘટના સામે આવી છે. રાત્રિના સમયે ચલિત મહાદેવ મંદિરની બહાર રાખેલી દાનપેટી ચડ્ડી-બનીયાન ધારી ગેંગ ઉઠાવી લઈ ફરાર થઈ જવાની સમગ્ર ઘટના CCTV કેમેરામાં કેદ થઈ ગઈ છે.
તસ્કરોએ કોઈ ભય કે અચકાવટ વગર ચોરી અંજામ આપી
માહિતી મુજબ, આ ઘટના 3 નવેમ્બરની રાત્રે લગભગ 2.30 વાગ્યે બની હતી. CCTV ફૂટેજમાં ચાર શખ્સો ચડ્ડી અને બનીયાન પહેરીને મંદિરના પ્રાંગણમાં પ્રવેશતા દેખાય છે. થોડો સમય આજુબાજુ નિરીક્ષણ કર્યા બાદ તેઓ દાનપેટી ઉઠાવીને ભાગી ગયા હતા. ઘટનાના દ્રશ્યો સ્પષ્ટપણે દર્શાવે છે કે તસ્કરોએ કોઈ ભય કે અચકાવટ વગર આ ચોરી અંજામ આપી.
સ્થાનિકોમાં સુરક્ષા વ્યવસ્થા અંગે પ્રશ્નો ઊભા થયા
મંદિરના ટ્રસ્ટી મુજબ, દાનપેટી થોડા દિવસ પહેલાં જ ખોલવામાં આવી હતી, જેમાં અંદાજિત ₹1200 જેટલી રકમ હતી. તેથી નાની રકમ હોવાને કારણે ટ્રસ્ટ દ્વારા આ મુદ્દે પોલીસ ફરિયાદ નોંધાવવામાં આવી નથી. તેમ છતાં, આ ઘટનાએ સ્થાનિકોમાં સુરક્ષા વ્યવસ્થા અંગે પ્રશ્નો ઊભા કર્યા છે.
તસ્કરો બેફામ બન્યા
સ્થાનિક સ્તરે ચર્ચા ચાલી રહી છે કે છેલ્લા કેટલાક અઠવાડિયામાં આ વિસ્તારમાં તસ્કરો બેફામ થઈ ગયા છે. થોડા દિવસ પહેલાં લાઘણંજ નજીક ગોગા મહારાજના મંદિરમાં પણ આવી જ ચોરી થઈ હતી, જે પોલીસ પેટ્રોલિંગની કાર્યક્ષમતા પર સવાલ ઊભો કરે છે.
રાત્રિ પેટ્રોલિંગ વધુ સઘન બનાવવા સ્થાનિકોની માંગ
સ્થાનિક રહેવાસીઓએ માંગણી કરી છે કે પોલીસ રાત્રિ પેટ્રોલિંગ વધુ સઘન બનાવે અને CCTV ફૂટેજના આધારે આ ગેંગને ઝડપથી પકડે. હાલમાં, આ ઘટના માત્ર નાની રકમની ચોરી નથી રહી, પરંતુ ધાર્મિક સ્થળોની સુરક્ષાને લઈને ઉઠેલા ગંભીર પ્રશ્નોનું પ્રતિનિધિત્વ કરી રહી છે.
