Tapi Suicide Case: તાપીના સોનગઢમાં મકાન અને પારિવારિક સંપત્તિના વિવાદ વચ્ચે દીપક નાયર નામના યુવકના આપઘાતનો મામલો સામે આવ્યો છે. આપઘાત પહેલાં રેકોર્ડ કરેલો યુવકનો ઓડિયો-વીડિયો સોશિયલ મીડિયા પર વાયરલ થતાં સમગ્ર પંથકમાં ચકચાર મચી છે. વીડિયોમાં યુવકે વડાપ્રધાન નરેન્દ્ર મોદી, ગુજરાતના ગૃહ રાજ્યમંત્રી હર્ષ સંઘવી સહિતના નેતાઓને પોતાનો સંદેશ પહોંચાડવા અને સમગ્ર મામલે CBI તપાસ કરાવવાની અપીલ કરી છે. બીજી તરફ, મૃતકની માતા રાધાબેન નાયરની ફરિયાદના આધારે પોલીસે પાંચ વ્યક્તિઓ સામે ગુનો નોંધી તપાસ શરૂ કરી છે.
વાયરલ વીડિયોમાં યુવકે શું આક્ષેપ કર્યા?
વાયરલ ઓડિયો-વીડિયોમાં દીપક નાયરે જમીન અને પારિવારિક સંપત્તિના વિવાદને લઈને કેટલાક લોકો સામે ગંભીર આક્ષેપો કર્યા છે. યુવકના જણાવ્યા પ્રમાણે, છેલ્લા સાતથી આઠ વર્ષથી તે આ વિવાદમાં ન્યાય મેળવવા માટે પ્રયાસ કરી રહ્યો હતો. તેણે એવો પણ દાવો કર્યો હતો કે આ વિવાદને કારણે તેને અને તેના પરિવારને માનસિક ત્રાસનો સામનો કરવો પડ્યો હતો. યુવકે વીડિયોમાં સલીમ મુલ્લા, તેમના પુત્ર વસીમ સલીમ મુલ્લા, સાબીર અબ્બાસ પઠાણ, રિયાઝ શેખ અને ઇમ્તિયાઝ શેખ સહિતના લોકોનાં નામ લીધાં હતાં. તેણે જમીનના દસ્તાવેજો અને પરિવારના સભ્યોનાં નામમાં કથિત ફેરફાર કરવામાં આવ્યો હોવાના આક્ષેપો પણ કર્યા હતા. જોકે, વાયરલ વીડિયોમાં કરવામાં આવેલા આક્ષેપો હજુ તપાસનો વિષય છે. આરોપોની સત્યતા અંગે પોલીસ તપાસ બાદ જ સ્પષ્ટતા થઈ શકશે.
વડાપ્રધાન મોદી અને હર્ષ સંઘવીને કરી અપીલ
દીપક નાયરે પોતાના વીડિયોમાં વડાપ્રધાન નરેન્દ્ર મોદી, ગુજરાતના ગૃહ રાજ્યમંત્રી હર્ષ સંઘવી, રાજ્યના અન્ય મંત્રી અને જયરામભાઈ ગામીત સુધી પોતાનો સંદેશ પહોંચાડવાની અપીલ કરી હતી. યુવકે જમીન વિવાદ, દસ્તાવેજોમાં કથિત ફેરફાર અને પરિવારની સંપત્તિને લગતા મામલાની CBI તપાસ કરાવવાની માગ કરી હતી. ન્યાય મેળવવા માટે વર્ષોથી દોડધામ કરવા છતાં ન્યાય ન મળ્યો હોવાની વ્યથા પણ તેણે વીડિયોમાં વ્યક્ત કરી હતી. યુવકે લોકડાઉન દરમિયાન તેના દાદાને કેટલાક લોકો લઈ ગયા હોવાનો અને ત્યારબાદ હુકમનામાના દાખલાઓના આધારે જમીનના રેકોર્ડમાં નામ ચડાવવામાં આવ્યું હોવાનો દાવો કર્યો હતો.
માતાની ફરિયાદના આધારે પાંચ સામે ગુનો નોંધાયો
મૃતકની માતા રાધાબેન નાયરની ફરિયાદના આધારે પોલીસે પાંચ વ્યક્તિઓ સામે ભારતીય ન્યાય સંહિતા (BNS)ની કલમ 108 અને 54 હેઠળ ગુનો નોંધ્યો છે. ફરિયાદમાં નામ ધરાવતા વ્યક્તિઓમાં સોનગઢના સલીમ મુલ્લા, વસીમ ઉર્ફે દાદુ, રિયાઝ શેખ અને ઇમ્તિયાઝ શેખનો સમાવેશ થાય છે. પાંચમા આરોપી તરીકે ઉકાઈના ભીમપુરા ગામના બિપીન રતનભાઈ ગામીતનું નામ નોંધાયું છે. પોલીસ દ્વારા શંકાસ્પદ આરોપીઓને રાઉન્ડઅપ કરવામાં આવ્યા હોવાની માહિતી પણ સામે આવી છે. ગુનો નોંધાયો હોવાનો અર્થ આરોપો સાબિત થયા એવો નથી. આ મામલે તપાસ અને કાયદાકીય પ્રક્રિયા બાદ જ જવાબદારી નક્કી થશે.
અંતિમયાત્રા દરમિયાન પોલીસ બંદોબસ્ત
યુવકના મૃત્યુ બાદ તેના ઘરની આસપાસની શેરીઓમાં પોલીસ બંદોબસ્ત ગોઠવવામાં આવ્યો હતો. ચુસ્ત પોલીસ સુરક્ષા વચ્ચે યુવકની અંતિમયાત્રા નીકળી હતી. વાયરલ વીડિયાને પગલે મામલો ચર્ચાનું કેન્દ્ર બન્યો છે.
હવે પોલીસ તપાસ પર સૌની નજર
દીપક નાયરના આપઘાત પાછળનાં ચોક્કસ કારણો, જમીન અને સંપત્તિનો વિવાદ, દસ્તાવેજોમાં કથિત ફેરફાર તથા વાયરલ ઓડિયો-વીડિયોમાં કરવામાં આવેલા આક્ષેપોની સત્યતા સહિતના મુદ્દાઓની તપાસ મહત્ત્વપૂર્ણ છે. મૃતકની માતાની ફરિયાદ, સંબંધિત દસ્તાવેજો અને અન્ય પુરાવાઓના આધારે તપાસ આગળ વધશે. સમગ્ર મામલાની વાસ્તવિક હકીકત પોલીસ તપાસ પૂર્ણ થયા બાદ જ સ્પષ્ટ થઈ શકશે.
