Surendranagar Encroachment Drive: સુરેન્દ્રનગર મહાનગરપાલિકાએ શહેરમાં દબાણ હટાવ ઝુંબેશ શરૂ કરતાં દબાણકારોમાં ફફડાટ ફેલાયો છે. વઢવાણના ધોળીપોળથી શીયાણીપોળ થઈ લીંબડી રોડ સુધીના વિસ્તારમાં પાલિકાની દબાણ શાખાએ સવારથી જ કાર્યવાહી હાથ ધરી હતી. રસ્તા પર નડતરરૂપ લારી-ગલ્લા, કાચા-પાકા બાંધકામો અને અન્ય દબાણો હટાવી માર્ગ ખુલ્લો કરાયો હતો.
ધોળીપોળથી ચરમાળીયા ચોકી સુધી કાર્યવાહી
માહિતી મુજબ, પાલિકાની ટીમે વહેલી સવારથી ધોળીપોળ વિસ્તારમાં ઝુંબેશ શરૂ કરી હતી. ધોળીપોળથી ચરમાળીયા ચોકી સુધીના માર્ગ પર આવેલા લારી-ગલ્લા, અસ્થાયી દુકાનો અને બાંધકામો દૂર કરવામાં આવ્યા હતા. લાંબા સમયથી આ વિસ્તારમાં વધતા દબાણને કારણે ટ્રાફિક સમસ્યા સર્જાતી હતી અને વાહનચાલકોને અવરજવરમાં ભારે હાલાકીનો સામનો કરવો પડતો હતો.
માર્ગ ખુલ્લો થતા ટ્રાફિકને મળશે રાહત
પાલિકાની કાર્યવાહીના પગલે હવે આ માર્ગ પર વાહનવ્યવહાર સરળ બનશે તેવી આશા વ્યક્ત કરવામાં આવી રહી છે. દબાણ દૂર થતાં રસ્તો પહોળો અને ખુલ્લો બન્યો છે, જેના કારણે સ્થાનિકો અને વાહનચાલકોને રાહત મળશે. શહેરમાં ટ્રાફિક વ્યવસ્થા સુધારવા માટે પાલિકાની આ ઝુંબેશ મહત્વપૂર્ણ માનવામાં આવી રહી છે.
વ્હાલા-દવલાની નીતિના આક્ષેપો પણ ઉઠ્યા
જો, કે દબાણ હટાવ કામગીરી દરમિયાન કેટલાક સ્થાનિકોએ આક્ષેપ કર્યો હતો, કે અમુક દબાણો સામે કાર્યવાહી કરવામાં આવી નથી. જેના કારણે પાલિકા પર ‘વ્હાલા-દવલાની નીતિ’ અપનાવવાના સવાલો પણ ઉઠ્યા હતા. બીજી તરફ, ઝુંબેશ શરૂ થતાં શહેરના અન્ય દબાણકારોમાં પણ ફફડાટ ફેલાયો છે અને હવે પાલિકા અન્ય વિસ્તારોમાં પણ આવી કાર્યવાહી કરશે કે કેમ તેની ચર્ચા શરૂ થઈ છે.
