Surat Student Suicide: સુરતના વરાછા વિસ્તારમાં ધોરણ-5માં અભ્યાસ કરતી એક વિદ્યાર્થિનીનું ઘરમાં આપઘાતથી મોત થયું છે. માતા-પિતા કામ માટે બહાર ગયા હતા અને ચારેય બાળકો ઘરે હતા. સાંજે બાળકોને ટ્યુશન મૂકવા માટે માતા ઘરે પરત આવી ત્યારે દરવાજો અંદરથી બંધ હતો. દરવાજો ખોલ્યા બાદ દીકરી ગંભીર હાલતમાં મળી આવી હતી. ઘટનાને પગલે પોલીસે તપાસ શરૂ કરી છે, પરંતુ આટલી નાની ઉંમરમાં બાળકીનું આવું પગલું ભરવા પાછળનું કારણ હજુ અકબંધ છે.
માતા ટ્યુશન મૂકવા ઘરે આવી ત્યારે ઘટના સામે આવી
વરાછાની સહજાનંદ સોસાયટીમાં રહેતા વિજય કુશવાહને ત્રણ દીકરી અને એક દીકરો છે. વિજય અને તેમની પત્ની રોજની જેમ કામ માટે બહાર ગયા હતા, જ્યારે ચારેય બાળકો ઘરે હતા. સાંજના સમયે બાળકોને ટ્યુશન મૂકવા માટે માતા ઘરે પરત આવી હતી. જોકે, ઘરનો દરવાજો અંદરથી બંધ હોવાથી ખોલી શકાયો નહોતો. ત્યારબાદ પાડોશીઓની મદદથી દરવાજો ખોલવામાં આવ્યો હતો.
ધોરણ-5માં અભ્યાસ કરતી દીકરીનું મોત
ઘરમાં પ્રવેશતા જ ધોરણ-5માં અભ્યાસ કરતી રોલી ગંભીર હાલતમાં મળી આવી હતી. પરિવારજનો અને પાડોશીઓએ તેને તાત્કાલિક નીચે ઉતારી સારવાર માટે લઈ જવાનો પ્રયાસ કર્યો હતો, પરંતુ તેનું મોત થઈ ચૂક્યું હતું. ઘટનાની જાણ થતાં પોલીસે તપાસ હાથ ધરી છે.
‘દીકરીએ આવું પગલું કેમ ભર્યું તે સમજાતું નથી’
મૃતકના પિતા વિજયે જણાવ્યું કે તેઓ અને તેમની પત્ની દરરોજની જેમ કામ પર ગયા હતા અને ચારેય બાળકો ઘરે જ હતા. તેમની ગેરહાજરી દરમિયાન દીકરીએ આવું પગલું શા માટે ભર્યું તે પરિવારને સમજાતું નથી. પોલીસ દ્વારા ઘટનાના સંજોગો અને બાળકીના આપઘાત પાછળના સંભવિત કારણોની તપાસ કરવામાં આવી રહી છે.
નાની ઉંમરના બાળકોમાં માનસિક સમસ્યાઓ અંગે નિષ્ણાતોની ચિંતા
નિષ્ણાતોના મતે, બાળકો અને કિશોરોમાં માનસિક સ્વાસ્થ્ય સંબંધિત સમસ્યાઓને ગંભીરતાથી લેવાની જરૂર છે. ડિપ્રેશન, ચિંતા, ADHD જેવી સમસ્યાઓ તેમજ આવેગમાં લેવાયેલા નિર્ણયો કેટલાક બાળકોને જોખમી પગલાં તરફ દોરી શકે છે. આવી સ્થિતિમાં બાળકોના વર્તનમાં અચાનક ફેરફાર, સતત ઉદાસીનતા અથવા અસામાન્ય ચિંતા જોવા મળે તો માતા-પિતાએ તેમની સાથે વાતચીત કરવી અને જરૂર પડે ત્યારે માનસિક સ્વાસ્થ્ય નિષ્ણાતની મદદ લેવી મહત્વપૂર્ણ છે.
