Surat-Udaipur Vande Bharat: દક્ષિણ ગુજરાત અને રાજસ્થાન વચ્ચે રેલવે કનેક્ટિવિટી વધુ મજબૂત બનાવવા માટે રેલવે બોર્ડે નવી સુરત-ઉદયપુર વંદે ભારત એક્સપ્રેસને મંજૂરી આપી છે. આ નવી પ્રીમિયમ ટ્રેન સેવા 3 ઓક્ટોબરથી નિયમિત શરૂ થવાની છે. જ્યારે 2 ઓક્ટોબરે ગાંધી જયંતીના અવસરે તેના Inaugural Run તરીકે સ્પેશિયલ સેવા શરૂ કરવામાં આવે તેવી શક્યતા છે. રેલવે બોર્ડના નિર્દેશ મુજબ, આ ટ્રેનની શરૂઆત એડવાન્સ રિઝર્વેશન પીરિયડ અથવા નો-બુકિંગ ડેટમાંથી જે તારીખ વહેલી હશે ત્યારથી લાગુ થશે. ઉદ્ઘાટન સેવા બાદ ટ્રેનને નિયમિત ટાઈમટેબલ હેઠળ દોડાવવામાં આવશે.
સુરતથી ઉદયપુરનો પ્રવાસ 7 કલાક 30 મિનિટમાં
મંજૂર સમયપત્રક પ્રમાણે સુરત-ઉદયપુર વંદે ભારત બંને દિશામાં એક જ દિવસમાં મુસાફરી પૂર્ણ કરવાની સુવિધા આપશે. ટ્રેન નંબર 26903 સુરતથી સવારે 6:10 વાગ્યે રવાના થઈ બપોરે 1:40 વાગ્યે ઉદયપુર સિટી પહોંચશે. જ્યારે પરત ફરતી ટ્રેન નંબર 26904 ઉદયપુર સિટીથી બપોરે 3:35 વાગ્યે ઉપડશે અને રાત્રે 11:00 વાગ્યે સુરત પહોંચશે. આ રીતે બંને તરફની મુસાફરીમાં આશરે 7 કલાક અને 30 મિનિટનો સમય લાગશે. ટ્રેન ભરૂચ, વડોદરા, આણંદ, મણિનગર, અસારવા, હિંમતનગર, શામળાજી રોડ, ડુંગરપુર અને ઝાવર સહિતના સ્ટેશનો પર રોકાશે.
ગુજરાત અને રાજસ્થાનના મહત્વના શહેરો જોડાશે
નવી વંદે ભારત એક્સપ્રેસ ગુજરાત અને રાજસ્થાનના અનેક મહત્વના શહેરો તથા વેપારી કેન્દ્રોને સીધી રેલ કનેક્ટિવિટી આપશે. સુરતથી નીકળ્યા બાદ ટ્રેન ભરૂચ, વડોદરા, આણંદ, મણિનગર, અસારવા, હિંમતનગર, શામળાજી રોડ, ડુંગરપુર અને ઝાવર થઈને ઉદયપુર પહોંચશે. ખાસ કરીને દક્ષિણ ગુજરાતના મુસાફરો માટે ઉત્તર ગુજરાત અને દક્ષિણ રાજસ્થાન સુધી પહોંચવા માટે આ નવી સેવા ઉપયોગી બનશે. ઉદયપુર જેવા જાણીતા પ્રવાસન સ્થળ માટે પણ ગુજરાતમાંથી સીધી અને ઝડપી મુસાફરીનો વિકલ્પ ઉપલબ્ધ થશે. આ રૂટ વેપાર અને પ્રવાસન ક્ષેત્રે પણ કનેક્ટિવિટી વધારશે.
ઉદયપુર-અસારવા વંદે ભારત સેવામાં ફેરફાર
નવી સુરત-ઉદયપુર વંદે ભારત શરૂ થતાં ટ્રેન નંબર 26963/26964 ઉદયપુર સિટી-અસારવા વંદે ભારત એક્સપ્રેસને બંધ કરવાની રેલવે બોર્ડે મંજૂરી આપી છે. નવી ટ્રેન આ સેવાની જગ્યા લેશે અથવા તેની પુનઃરચના કરવામાં આવશે. મંજૂર ઓપરેટિંગ પ્લાન પ્રમાણે નવી વંદે ભારત રેકનું પ્રાથમિક મેન્ટેનન્સ સુરત ખાતે કરવામાં આવશે. વડોદરા અને અસારવા સ્ટેશનને Watering Stations તરીકે ઉપયોગમાં લેવામાં આવશે. આ નવી સેવા 8 કોચ ધરાવતી વંદે ભારત એક્સપ્રેસ રેકથી સંચાલિત કરવામાં આવશે.
