Surat Crime Branch Drug Bust: સુરત ક્રાઇમ બ્રાન્ચની ટીમે દિલ્હી-મુંબઈ એક્સપ્રેસવે પરથી એક હાઇ-પ્રોફાઇલ ડ્રગ્સ તસ્કરી કેસનો પર્દાફાશ કર્યો છે. મુંબઈના સાંતાક્રુઝ વિસ્તારની રહેવાસી અને મલેશિયન એરલાઇન્સની પૂર્વ એર હોસ્ટેસ માનસી ફાતિમા સૈયદ અને તેના સાથી સોહેલ સુલેમાન શેખને 977 ગ્રામ એમ.ડી. (મેફેડ્રોન) ડ્રગ્સ સાથે રંગેહાથ ઝડપી પાડવામાં આવ્યા છે. આ આંતરરાષ્ટ્રીય બજારમાં જપ્ત કરાયેલા ડ્રગ્સની કિંમત આશરે ₹30 લાખ આંકવામાં આવી રહી છે.
બાતમીના આધારે એક્સપ્રેસ-વે પર ફિલ્મી ઢબે દરોડો
સોમવારે સુરત ક્રાઇમ બ્રાન્ચને બાતમીદાર તરફથી મજબૂત માહિતી મળી હતી કે, વડોદરા તરફથી આવી રહેલી એક અર્ટિગા કારમાં મોટા પ્રમાણમાં એમડી ડ્રગ્સની ખેપ મુંબઈ તરફ લઈ જવામાં આવી રહી છે. માહિતી મળતાં જ ક્રાઇમ બ્રાન્ચે દિલ્હી-મુંબઈ એક્સપ્રેસવે પર આવેલી ટોલ પ્લાઝા નજીક વોચ ગોઠવી દીધી હતી. શંકાસ્પદ અર્ટિગા કાર આવતાં જ તેને અટકાવીને તલાશી લેવામાં આવી હતી. તપાસ દરમિયાન કારમાંથી બાળકોના બેબી ડાયપર મળી આવ્યા હતા. પોલીસને શંકા જતાં ડાયપર ખોલીને જોતાં તેમાંથી 977 ગ્રામ એમડી ડ્રગ્સનું પેકેટ મળી આવ્યું હતું.
મુંબઈથી ભાડે કાર લઈને વડોદરા આવ્યા હતા આરોપીઓ
પ્રાથમિક પૂછપરછમાં ખુલાસો થયો છે કે, માનસી સૈયદ અને સોહેલ શેખે આ તસ્કરી માટે મુંબઈથી જ એક અર્ટિગા કાર ભાડે લીધી હતી. તેઓ વડોદરા રેલ્વે સ્ટેશન નજીક પહોંચ્યા હતા, જ્યાં એક અજાણી મહિલા પાસેથી તેમણે આ ડ્રગ્સનો જથ્થો ખરીદ્યો હતો. આરોપીઓનો પ્લાન આ ડ્રગ્સ મુંબઈ લઈ જઈને 10-10 ગ્રામના નાના ઝિપલોક પેકેટો બનાવીને છૂટક ગ્રાહકો તથા નાઇટ ક્લબ્સમાં વેચવાનો હતો. કારની તલાશી દરમિયાન પોલીસને અનેક સ્માર્ટફોન, ઇલેક્ટ્રોનિક વેઇંગ સ્કેલ, નાની પ્લાસ્ટિક બેગ્સ અને પેકેજિંગ મટીરિયલ પણ મળી આવ્યું છે.
ડ્રગ્સ કનેક્શન અને જેલયાત્રાનો ઇતિહાસ
આરોપી માનસી સૈયદ નોટોરિયસ ડ્રગ હિસ્ટ્રી ધરાવે છે. તે અગાઉ મલેશિયન એરલાઇન્સમાં એર હોસ્ટેસ તરીકે કામ કરી ચૂકી છે, પરંતુ બાદમાં તે ડ્રગ્સના કાળો કારોબારમાં સક્રિય થઈ ગઈ હતી.
2015થી ક્રાઇમ નેટવર્કમાં સક્રિય: માનસી વર્ષ 2015થી ડ્રગ્સ સપ્લાય અને પેડલિંગના નેટવર્કમાં સામેલ છે.
2021નો ઇન્દોર કેસ: વર્ષ 2021માં મધ્યપ્રદેશના ઇન્દોર ખાતેથી ઇન્દોર પોલીસે 100 ગ્રામ ડ્રગ્સ સાથે માનસીની ધરપકડ કરી હતી. તે કેસમાં તેને સજા થઈ હતી અને તેણે આશરે 4 વર્ષ જેલમાં વિતાવ્યા હતા. જેલમાંથી છૂટ્યા બાદ પણ તેણે આ ગેરકાયદે પ્રવૃત્તિઓ ચાલુ રાખી હતી.
પોલીસ તપાસ અને આગળની કાર્યવાહી
સુરત ક્રાઇમ બ્રાન્ચે બંને આરોપીઓ સામે એનડીપીએસ (NDPS) એક્ટ હેઠળ ગુનો નોંધીને રિમાન્ડ મેળવવાની પ્રક્રિયા હાથ ધરી છે. વડોદરામાં જે મહિલાએ આ ખેપ સોંપી હતી તે મુખ્ય સપ્લાયરની શોધખોળ માટે અલગ-અલગ ટીમ બનાવીને દરોડા પાડવામાં આવી રહ્યા છે. આ સિવાય મુંબઈમાં આ ડ્રગ્સ કોને સપ્લાય કરવાનું હતું તે નેટવર્કની કડીઓ પણ પોલીસ શોધી રહી છે.
