Mother and 4 month old baby Suicide news surat: સુરતના સરથાણા વિસ્તારમાંથી એક હૃદયદ્રાવક ઘટના સામે આવી છે, જેમાં 29 વર્ષીય મહિલાએ પોતાના ચાર મહિનાના પુત્ર સાથે આત્મઘાતી પગલું ભરતાં બંનેના કરુણ મોત થયા છે. પ્રાથમિક તપાસમાં જાણવા મળ્યું છે કે પ્રસૂતિ બાદ મહિલાની માનસિક સ્થિતિ સતત બગડી રહી હતી, જેના કારણે તેણે આ ચોંકાવનારો નિર્ણય લીધો હોવાની શક્યતા વ્યક્ત કરવામાં આવી રહી છે.
દોઢ વર્ષ પહેલાં જ થયા હતા લગ્ન
માહિતી અનુસાર, સરથાણાના યોગીચોક નજીક આવેલી એવન હાઇટ્સ સોસાયટીમાં રહેતી ધારા નામની મહિલા મૂળ અમરેલી જિલ્લાના ધારી તાલુકાની વતની હતી. આશરે દોઢ વર્ષ પહેલાં તેના લગ્ન થયા હતા. ચાર મહિના પહેલાં તેણે પુત્રને જન્મ આપ્યો હતો અને ડિલિવરી માટે તે પોતાના પિયરમાં રહેવા આવી હતી. બાળકના આગમનથી પરિવારજનોમાં ખુશીનો માહોલ સર્જાયો હતો, પરંતુ થોડા જ સમયમાં પરિસ્થિતિ દુઃખદ બની ગઈ હતી. પરિવારના સભ્યો અને સ્થાનિક સૂત્રોના જણાવ્યા મુજબ, ધારા કેટલાક સમયથી માનસિક સ્વાસ્થ્ય સંબંધિત સમસ્યાઓનો સામનો કરી રહી હતી. તેની સારવાર અને દવાઓ પણ ચાલુ હતી. બાળકના જન્મ બાદ તેની માનસિક સ્થિતિમાં વધુ ફેરફાર જોવા મળ્યો હતો. છેલ્લા કેટલાક દિવસોથી તે ખૂબ જ તણાવમાં રહેતી હતી અને તેણે ખાવા-પીવામાં પણ રસ ગુમાવી દીધો હતો. પરિવારજનો તેની સ્થિતિને લઈને ચિંતિત હતા.
ચાર મહિનાના પુત્ર સાથે એસિડ પીને કર્યો આપઘાત
સોમવાર 1 જૂનની સાંજે બનેલી આ ઘટનાએ સૌને સ્તબ્ધ કરી દીધા હતા. ધારા પોતાના ચાર મહિનાના પુત્ર રીશાનને લઈને સોસાયટીના ગ્રાઉન્ડ ફ્લોર પર આવેલા શૌચાલય તરફ ગઈ હતી. ત્યાં તેણે પહેલા બાળકને એસિડ પીવડાવ્યું હોવાનો આરોપ છે અને ત્યારબાદ પોતે પણ એસિડ પી લીધું હતું. થોડા સમય બાદ ઘટનાની જાણ થતાં આસપાસના લોકો અને પરિવારજનો તરત જ મદદ માટે દોડી આવ્યા હતા. ગંભીર હાલતમાં માતા અને બાળકને તાત્કાલિક હોસ્પિટલમાં ખસેડવામાં આવ્યા હતા. તબીબોએ બંનેને બચાવવા માટે સારવાર શરૂ કરી હતી, પરંતુ તેમની સ્થિતિ અત્યંત ગંભીર હોવાથી સારવાર દરમિયાન બંનેના મોત થયા છે. આ સમાચાર મળતા જ પરિવારજનો પર દુઃખનો પહાડ તૂટી પડ્યો હતો. હોસ્પિટલ પરિસરમાં સગા-સંબંધીઓના આક્રંદથી વાતાવરણ ગમગીન બની ગયું હતું.
પોલીસે ગુનો નોંધી તપાસ હાથ ધરી
ઘટનાની જાણ થતા સરથાણા પોલીસ તાત્કાલિક ઘટનાસ્થળે પહોંચી હતી અને સમગ્ર મામલાની તપાસ હાથ ધરી હતી. પોલીસે અકસ્માત મોતનો ગુનો નોંધી જરૂરી કાયદેસરની કાર્યવાહી શરૂ કરી છે. સાથે જ મહિલાએ આ પગલું માત્ર ડિલિવરી પછીના ડિપ્રેશનના કારણે ભર્યું હતું કે પછી અન્ય કોઈ કારણ જવાબદાર હતું, તે મુદ્દે પણ તપાસ ચાલી રહી છે. આ ઘટના ફરી એકવાર પ્રસૂતિ બાદ મહિલાઓના માનસિક સ્વાસ્થ્ય પ્રત્યે જાગૃતિ અને યોગ્ય સારવારની જરૂરિયાત તરફ ધ્યાન દોરે છે. નિષ્ણાતોનું માનવું છે કે ડિલિવરી પછી કેટલાક કિસ્સાઓમાં મહિલાઓ ગંભીર માનસિક તણાવ અને ડિપ્રેશનનો ભોગ બની શકે છે, જેના લક્ષણોને સમયસર ઓળખી સારવાર આપવામાં આવે તો આવી દુર્ઘટનાઓ અટકાવી શકાય છે.
