હવે વાવ-થરાદના યુવાનોને સ્ટાર્ટઅપ માટે મળશે મોટી મદદ, લોનની ગેરંટી લેશે શંકર ચૌધરી

Shankar Chaudhary Announcement: વાવ-થરાદ જિલ્લાના મુખ્ય મથક થરાદ ખાતે ગુજરાત વિધાનસભાના અધ્યક્ષ અને થરાદના ધારાસભ્ય શંકરભાઈ ચૌધરીની ઉપસ્થિતિમાં ભવ્ય નૂતન વર્ષાભિનંદન કાર્યક્રમ યોજાયો હતો. આ કાર્યક્રમમાં જનપ્રતિનિધિઓ, ભાજપના હોદ્દેદારો અને મોટી સંખ્યામાં લોકો ઉપસ્થિત રહ્યા હતા. આ પ્રસંગે શંકરભાઈ ચૌધરીએ જિલ્લાના વિકાસ, યુવાનો માટે રોજગારની તકો, ખેડૂતો અને પાણીની સમસ્યાઓને લઈને અનેક જાહેરાતો કરી હતી. ખાસ કરીને યુવાનો પોતાનો સ્વતંત્ર વ્યવસાય શરૂ કરી શકે તે માટે લોનની ગેરંટી લેવાની જાહેરાત અને ઔદ્યોગિક ક્ષેત્ર માટે 45 ટકા સુધીની સબસિડીની વાતને લઈને ચર્ચા શરૂ થઈ છે.

જનસંવાદમાં પાણી અને ખેડૂતોના હિતની વાત
નૂતન વર્ષાભિનંદન કાર્યક્રમ દરમિયાન વાવ-થરાદના લોકોને સંબોધતાં શંકરભાઈ ચૌધરીએ જિલ્લાના સર્વાંગી વિકાસ પર ભાર મૂક્યો હતો. તેમણે ભૂગર્ભ જળસ્તર અને પીવાના પાણીની સમસ્યાના કાયમી ઉકેલ માટે ખેડૂતોને ટપક સિંચાઈ પદ્ધતિ અપનાવવા પ્રોત્સાહિત કરવાની વાત કરી હતી. ટપક સિંચાઈને વધુ વેગ મળે તે માટે ખેડૂતોને 80થી 90 ટકા સુધી સબસિડી મળે તેવી રજૂઆત રાજ્યના મુખ્યમંત્રી સમક્ષ કરવાની ખાતરી પણ તેમણે આપી હતી. આ પગલાથી પાણીનો કરકસરપૂર્વક ઉપયોગ થાય અને ખેતીને ફાયદો મળે તેવો હેતુ વ્યક્ત કરવામાં આવ્યો હતો.

1,000 યુવાનોને વ્યવસાય શરૂ કરવામાં મદદની જાહેરાત
યુવાનોના ભવિષ્યને લઈને શંકરભાઈ ચૌધરીએ ખાસ જાહેરાત કરી હતી. તેમના જણાવ્યા અનુસાર, વાવ-થરાદના 1,000 યુવક-યુવતીઓ પોતાનો સ્વતંત્ર ધંધો કે વ્યવસાય શરૂ કરવા ઇચ્છે તો તેમને આર્થિક સહાય માટે લોનની જરૂર પડશે. આવા ઉદ્યોગસાહસિકોની લોનની જવાબદારી પોતે સ્વીકારશે અને તેની ગેરંટી આપશે તેવી જાહેરાત તેમણે કરી હતી. આ ઉપરાંત, રાજ્ય સરકાર દ્વારા ઔદ્યોગિક ક્ષેત્રના વિકાસને પ્રોત્સાહન આપવા માટે 45 ટકા સુધીની સબસિડી આપવાની પણ વાત કરવામાં આવી હતી. આ જાહેરાતથી જિલ્લામાં નવા ઉદ્યોગો અને સ્વરોજગારની તકો ઊભી થવાની આશા વ્યક્ત કરવામાં આવી રહી છે.

દરેક તાલુકામાં આધુનિક પુસ્તકાલય બનાવવાનો સંકલ્પ
જિલ્લાના વિદ્યાર્થીઓ અને યુવાનો સરકારી સ્પર્ધાત્મક પરીક્ષાઓમાં સારું પ્રદર્શન કરી શકે તે માટે પણ આયોજનની વાત કરવામાં આવી હતી. શંકરભાઈ ચૌધરીએ વાવ-થરાદના દરેક તાલુકામાં આધુનિક પુસ્તકાલય બનાવવાનો સંકલ્પ વ્યક્ત કર્યો હતો. આ પુસ્તકાલયોથી વિદ્યાર્થીઓને અભ્યાસ માટે યોગ્ય સુવિધાઓ અને સ્પર્ધાત્મક પરીક્ષાઓની તૈયારી માટે જરૂરી વાતાવરણ મળી રહે તેવો હેતુ છે.

વાવ-થરાદના વિકાસને વેગ આપવાની વાત
નૂતન વર્ષના કાર્યક્રમમાં કરવામાં આવેલી આ જાહેરાતો બાદ જિલ્લામાં યુવાનો અને સ્થાનિક લોકોમાં ઉત્સાહ જોવા મળ્યો હતો. સ્વરોજગાર માટે લોનની ગેરંટી, ઉદ્યોગો માટે સબસિડી, ટપક સિંચાઈને પ્રોત્સાહન અને આધુનિક પુસ્તકાલયોની યોજના દ્વારા વાવ-થરાદના આર્થિક તથા શૈક્ષણિક વિકાસને વેગ આપવાનો સંકલ્પ વ્યક્ત કરવામાં આવ્યો છે.