Gir Lion Safari 2026: ગીર સોમનાથ અને સાસણ ગીર ખાતે વસતા એશિયાટિક સિંહોને જોવા આતુર પ્રવાસીઓ અને સિંહપ્રેમીઓ માટે ખુશીના સમાચાર આવ્યા છે. આ વર્ષે સાસણ ગીરમાં જંગલ સફારી નક્કી કરેલા સમય કરતા 13 દિવસ વહેલી શરૂ કરવાનો મહત્વનો નિર્ણય લેવામાં આવ્યો છે. આગામી 3 ઓક્ટોબરથી જ પ્રવાસીઓ જંગલમાં જઈને સિંહોના દર્શન કરી શકશે. નવરાત્રીના તહેવારો પહેલા જ ગીર જંગલ ખુલી જતાં પ્રવાસીઓમાં ઉત્સાહ અને રોમાંચનો માહોલ જોવા મળી રહ્યો છે.
નિયમ શું છે અને આ વખતે વહેલું કેમ ખુલશે?
સામાન્ય નિયમ મુજબ દર વર્ષે ચોમાસાની ઋતુ દરમિયાન 16 જૂનથી 15 ઓક્ટોબર સુધી એમ કુલ ચાર મહિના માટે ગીર જંગલ સફારી પ્રવાસીઓ માટે સંપૂર્ણપણે બંધ રાખવામાં આવે છે. ચોમાસું એ સિંહોનો સંવર્ધન કાળ (મેટીંગ પિરિયડ) હોવાથી વન્યજીવોને કોઈ ખલેલ ન પહોંચે તે માટે આ 'વેકેશન' આપવામાં આવે છે. જોકે, આ વર્ષે ગીર વિસ્તારમાં વરસાદ પ્રમાણમાં ઓછો પડ્યો છે અને જંગલના કાચા રસ્તાઓ પણ વાહનવ્યવહાર માટે અનુકૂળ સ્થિતિમાં છે. આ પરિસ્થિતિને ધ્યાનમાં રાખીને વન વિભાગે 15 ઓક્ટોબરની રાહ જોવાને બદલે 3 ઓક્ટોબરથી જ સફારી શરૂ કરવાનો નિર્ણય લીધો છે.
ગત વર્ષની સરખામણી અને વન મંત્રીનું નિવેદન
અત્રે ઉલ્લેખનીય છે કે, જંગલ સફારી વહેલી શરૂ થઈ હોય તેવું આ પહેલીવાર નથી બન્યું. ગત વર્ષે પણ રાષ્ટ્રપતિ દ્રૌપદી મુર્મુના આગમનને પગલે નક્કી કરેલી તારીખ કરતાં 9 દિવસ વહેલી જંગલ સફારી ખુલ્લી મુકાઈ હતી. બીજી તરફ, વહેલા સિંહ દર્શન શરૂ કરવાના નિર્ણય અંગે વન અને પર્યાવરણ મંત્રી અર્જુન મોઢવાડિયાએ સ્પષ્ટતા કરતા જણાવ્યું હતું કે, આ નિર્ણય સંપૂર્ણપણે નિયમો અને આંતરરાષ્ટ્રીય માનદંડોને આધીન રહીને જ લેવામાં આવ્યો છે. ભારતમાં સિંહોનું સંરક્ષણ અને સંવર્ધન વિશ્વભરમાં એક ઉત્કૃષ્ટ ઉદાહરણ છે અને તમામ પરિસ્થિતિઓની સમીક્ષા કર્યા બાદ જ આ જાહેરાત કરવામાં આવી છે.
પ્રવાસન ઉદ્યોગ અને સ્થાનિક વેપારીઓમાં ખુશીની લહેર
ગીર જંગલ સફારી 13 દિવસ વહેલી શરૂ થવાથી માત્ર પ્રવાસીઓ જ નહીં પરંતુ સ્થાનિક પ્રવાસન ઉદ્યોગ સાથે જોડાયેલા લોકોને પણ મોટો ફાયદો થશે. સાસણ અને આસપાસના વિસ્તારમાં આવેલા હોટલ, રિસોર્ટ, ગાઈડ, જીપ સફારીના ચાલકો અને સ્થાનિક વેપારીઓ માટે આ નિર્ણય વિશેષરૂપ સાબિત થશે. તહેવારોની સિઝનમાં વહેલું બુકિંગ શરૂ થવાથી વિસ્તારના અર્થતંત્રને મોટો ટેકો મળશે અને પ્રવાસીઓને પણ રજાઓનો આનંદ માણવાની ઉત્તમ તક મળશે.
