Rajkot rickshaw driver acid consumption: રાજકોટના મવડી વિસ્તારમાં આવેલા જશરાજનગરમાં રહેતા 21 વર્ષીય રિક્ષાચાલક યુવકે એસિડ પી આપઘાતનો પ્રયાસ કરતા ચકચાર મચી છે. કાલાવડ રોડ પર કટારીયા ચોકડી નજીક કોસ્મોપ્લેક્સ સિનેમા પાછળ યુવકે સાંજના સમયે એસિડ ગટગટાવી લીધું હતું. ઝેરી અસર થતાં તેને તાત્કાલિક સારવાર માટે સિવિલ હોસ્પિટલ ખસેડવામાં આવ્યો હતો. પ્રાથમિક પૂછપરછ દરમિયાન યુવકે બે પોલીસ કર્મચારીઓ સામે ગંભીર આક્ષેપો કર્યા હોવાનું સામે આવ્યું છે.
પોલીસે ચાર પેટી દારૂ ઝડપી લીધો હતો
પોલીસમાંથી મળતી માહિતી મુજબ, યુવક ભાર્ગવ હિતેષભાઈ વાળા રિક્ષા ચલાવે છે. આશરે બે મહિના અગાઉ તેની રિક્ષામાં બેઠેલા એક મુસાફર પાસેથી પોલીસે ચાર પેટી દારૂ ઝડપી લીધો હતો. આ મામલે પોલીસે મુસાફર વિરુદ્ધ ગુનો પણ નોંધ્યો હતો. જોકે, ભાર્ગવના આક્ષેપ મુજબ ત્યારબાદ PCBના પોલીસ કર્મચારી અનિલ સોનારા અને મહીપાલસિંહ દ્વારા તેની પાસેથી રૂ. 2 લાખની માંગણી કરવામાં આવતી હતી.
ભાર્ગવે પ્રાથમિક પૂછપરછમાં જણાવ્યું
યુવકના જણાવ્યા મુજબ, બંને કર્મચારીઓ અવારનવાર તેની સાથે મારપીટ પણ કરતા હતા. વારંવારની કથિત ઉઘરાણી અને મારપીટથી કંટાળીને તેણે એસિડ પી આપઘાતનો પ્રયાસ કર્યો હોવાનું ભાર્ગવે પ્રાથમિક પૂછપરછમાં જણાવ્યું છે. જોકે, આ તમામ આક્ષેપો હાલ યુવકના નિવેદન પર આધારિત છે અને સમગ્ર મામલે તપાસ બાદ જ હકીકત સ્પષ્ટ થશે.
કર્મચારીઓ સામે કરવામાં આવેલા આક્ષેપોની તપાસ કરશે
ઘટનાની જાણ થતાં યુનિવર્સિટી પોલીસ દ્વારા વધુ તપાસ હાથ ધરવામાં આવી છે. પોલીસ યુવકના નિવેદન, અગાઉના દારૂના કેસની વિગતો તેમજ PCBના બંને કર્મચારીઓ સામે કરવામાં આવેલા આક્ષેપોની તપાસ કરશે. હાલ યુવકને સારવાર આપવામાં આવી રહી છે અને સમગ્ર ઘટનામાં પોલીસની તપાસ બાદ જ આગળની કાર્યવાહી અંગે નિર્ણય લેવામાં આવશે.
