Pratap Dudhat attacks the government in Amreli: અમરેલી જિલ્લામાં કમોસમી વરસાદથી ખેડૂતોને થયેલા ભારે નુકસાન બાદ રાજ્ય સરકારે 10 હજાર કરોડ રૂપિયાના કૃષિ રાહત પેકેજની જાહેરાત કરી છે. પરંતુ આ જાહેરાત બાદ અમરેલી જિલ્લા કોંગ્રેસ પ્રમુખ પ્રતાપ દુધાતે સરકાર પર તીખો પ્રહાર કર્યો છે. તેમણે આ પેકેજને “ગૃહિણીના રસોડામાં મીઠા કે ચટણી જેટલું બજેટ” ગણાવી સરકારની મજાક ઉડાવી હતી.
'ખેડૂતોના વાસ્તવિક નુકસાનની સામે તુચ્છ રકમ'
દુધાતે જણાવ્યું કે પ્રતિ હેક્ટર 22 હજાર રૂપિયાની સહાય ખેડૂતોના વાસ્તવિક નુકસાનની સામે તુચ્છ રકમ છે. “એક હેક્ટર એટલે સાડા છ વિધા, એટલે સરકારે વિધે ફક્ત 3,400 રૂપિયાની સહાય નક્કી કરી છે, જ્યારે ખેડૂતોને એક વિધે 50 હજાર રૂપિયાનું નુકસાન થયું છે,” એમ તેમણે આંકડાઓ સાથે સરકારની નીતિની ટીકા કરી.
'એક જ ગામમાં 12 કરોડ રૂપિયાનું નુકસાન થયું'
તેમણે વધુમાં ઉમેર્યું કે સરકાર 16,500 ગામ અને 44 લાખ ખેડૂતોની વાત કરે છે, પરંતુ વાસ્તવમાં એક જ ગામમાં 12 કરોડ રૂપિયાનું નુકસાન થયું છે. “જો સરકાર ખરેખર ખેડૂતોના હિતમાં હોય તો દેવા માફી, ઘાસચારા સહાય અને સાગરખેડૂતો માટે માછલીઓના નુકસાનનું વળતર તાત્કાલિક જાહેર કરે,” એમ દુધાતે જણાવ્યું.
કોંગ્રેસ આવતીકાલથી ગામે ગામ આંદોલન વેગવંતું બનાવશે
દુધાતે ચેતવણી આપી કે હવે નિર્ણય ખેડૂતોના હાથમાં છે. “ખેડૂતને શબ્દો નહીં, વાસ્તવિક સહાય જોઈતી છે,” એમ તેમણે કહ્યું. તેમણે જણાવ્યું કે કોંગ્રેસ આવતીકાલથી ગામે ગામ આંદોલન વેગવંતું બનાવશે. શક્તિસિંહ ગોહિલ અમરેલીની મુલાકાતે આવી રહ્યા છે અને ખેડૂતોની સાથે ચર્ચા કરીને આગામી પગલાં નક્કી કરશે. આ નિવેદન સાથે દુધાતે સરકારના રાહત પેકેજને “પ્રચારનો પ્રપંચ” ગણાવી ખેડૂતોના અસંતોષને રાજકીય લડતમાં રૂપાંતરિત કરવાની ચેતવણી આપી છે.
