PM Modi Gujarat Visit: વડાપ્રધાન નરેન્દ્ર મોદી આગામી 8 સપ્ટેમ્બરે ગુજરાતની મુલાકાતે આવવાના છે. તેમની મુલાકાત દરમિયાન વડોદરામાં અંદાજે ₹30 હજાર કરોડના વિવિધ વિકાસકાર્યોનું લોકાર્પણ અને ખાતમુહૂર્ત કરવામાં આવશે. PM મોદીના પ્રવાસને પગલે વહીવટી તંત્ર અને ભાજપ સંગઠન દ્વારા તૈયારીઓ શરૂ કરી દેવામાં આવી છે.
વડોદરામાં અનેક વિકાસ પ્રોજેક્ટ્સને મળશે વેગ
PM મોદીની ગુજરાત મુલાકાત દરમિયાન વડોદરામાં વિવિધ ક્ષેત્ર સાથે સંકળાયેલા મહત્વપૂર્ણ પ્રોજેક્ટ્સનું લોકાર્પણ અને ખાતમુહૂર્ત કરવામાં આવશે. આશરે ₹30 હજાર કરોડના આ વિકાસકાર્યોના કારણે વડોદરા અને આસપાસના વિસ્તારોમાં માળખાકીય સુવિધાઓને વધુ મજબૂતી મળવાની શક્યતા છે.
બપોરે 3 વાગ્યે નવસારી પહોંચશે PM મોદી
વડોદરાના કાર્યક્રમો પૂર્ણ કર્યા બાદ વડાપ્રધાન નરેન્દ્ર મોદી બપોરે 3 વાગ્યે નવસારી પહોંચશે. અહીં તેઓ જિલ્લા ભાજપ કાર્યાલયનું ઉદ્ઘાટન કરશે. PM મોદીની મુલાકાતને લઈને સ્થાનિક ભાજપ સંગઠન દ્વારા કાર્યક્રમની તૈયારીઓને અંતિમ ઓપ આપવામાં આવી રહ્યો છે.
ભાજપ કાર્યકર્તાઓને પણ કરશે સંબોધિત
નવસારીમાં જિલ્લા ભાજપ કાર્યાલયના ઉદ્ઘાટન બાદ PM મોદી ભાજપના સ્થાનિક નેતાઓ અને કાર્યકર્તાઓને સંબોધિત કરશે. કાર્યક્રમમાં મોટી સંખ્યામાં ભાજપના કાર્યકર્તાઓ અને આગેવાનો હાજર રહે તેવી શક્યતા છે.
ગુજરાત બાદ મુંબઈ જવા રવાના થશે PM મોદી
ગુજરાત પ્રવાસ પૂર્ણ કર્યા બાદ વડાપ્રધાન નરેન્દ્ર મોદી મુંબઈ જવા રવાના થશે. આમ, 8 સપ્ટેમ્બરના પ્રવાસ દરમિયાન વડોદરા અને નવસારીમાં તેમના વિવિધ કાર્યક્રમો યોજાશે. એક તરફ વડોદરામાં મોટા વિકાસકાર્યોનું લોકાર્પણ અને ખાતમુહૂર્ત થશે, તો બીજી તરફ નવસારીમાં ભાજપ સંગઠન સાથે જોડાયેલો કાર્યક્રમ પણ યોજાશે.
