PM Modi Birthday 2026: વડાપ્રધાન નરેન્દ્ર મોદીના 76મા જન્મદિવસ નિમિત્તે અમદાવાદના જાસપુર ખાતે આવેલા વિશ્વ ઉમિયાધામમાં મધરાતે વિશેષ કાર્યક્રમનું આયોજન કરવામાં આવ્યું હતું. મુખ્યમંત્રી ભૂપેન્દ્ર પટેલની ઉપસ્થિતિમાં યોજાયેલા કાર્યક્રમમાં મા ઉમિયાની મહાઆરતી કરવામાં આવી હતી અને વડાપ્રધાનના દીર્ઘાયુ માટે પ્રાર્થના કરવામાં આવી હતી. કાર્યક્રમમાં મોટી સંખ્યામાં લોકો ઉપસ્થિત રહ્યા હતા.
મધરાતે 12 વાગ્યે પ્રગટાવાયા 76 હજાર દીવડાં
વિશ્વ ઉમિયાધામ ખાતે રાત્રે 12 વાગ્યે 76,000 દીવડાં પ્રગટાવવામાં આવ્યા હતા. આ ઉપરાંત ઉપસ્થિત લોકોએ સામૂહિક રીતે ‘વંદે માતરમ્’નું ગાન કર્યું હતું. અહેવાલો અનુસાર, આ કાર્યક્રમમાં આશરે 5,000 લોકો જોડાયા હતા.
મુખ્યમંત્રી ભૂપેન્દ્ર પટેલે કરી મા ઉમિયાની મહાઆરતી
આ કાર્યક્રમમાં મુખ્યમંત્રી ભૂપેન્દ્ર પટેલ વિશેષ ઉપસ્થિત રહ્યા હતા. તેમણે મા ઉમિયાની મહાઆરતીમાં ભાગ લીધો હતો. વિશ્વ ઉમિયાધામના આયોજનને વડાપ્રધાનના જન્મદિવસ અને તેમના 25 વર્ષના જાહેર જીવન સાથે જોડવામાં આવ્યું હતું.
વંદે માતરમ્ સહિત અનેક કાર્યક્રમો યોજાયા
વિશ્વ ઉમિયાધામ ખાતે દીપોત્સવ ઉપરાંત વંદે માતરમ્ ગાન, ભવ્ય લોકડાયરો અને ભજન સંધ્યા સહિતના કાર્યક્રમોનું આયોજન કરવામાં આવ્યું હતું. વડાપ્રધાનના જીવનપ્રવાસ અને ‘સંકલ્પ-વિકસિત ભારત 2047’ સાથે જોડાયેલી રજૂઆતો પણ કાર્યક્રમનો ભાગ રહી હતી.
‘આશીર્વાદનો દીવો’ કાર્યક્રમનો હેતુ શું?
‘આશીર્વાદનો દીવો’ કાર્યક્રમને વડાપ્રધાન નરેન્દ્ર મોદીના 76મા જન્મદિવસ તેમજ તેમના 25 વર્ષના જાહેર જીવનના પ્રસંગ સાથે જોડવામાં આવ્યો છે. ગુજરાતમાં આ પ્રસંગે રાજ્યભરમાં દીવા પ્રગટાવવાના કાર્યક્રમોનું પણ આયોજન કરવામાં આવ્યું હતું. વિશ્વ ઉમિયા ફાઉન્ડેશન દ્વારા આયોજિત કાર્યક્રમમાં સંસ્થાના હોદ્દેદારો ઉપરાંત રાજકીય આગેવાનો, દાતાઓ, કાર્યકરો અને મોટી સંખ્યામાં નાગરિકો ઉપસ્થિત રહ્યા હતા. વિશ્વ ઉમિયા ફાઉન્ડેશનની સત્તાવાર માહિતી અનુસાર, જાસપુર ખાતેનું વિશ્વ ઉમિયાધામ અમદાવાદ-ગાંધીનગર હાઇવે પર વૈષ્ણોદેવી સર્કલ નજીક આવેલું છે.
