Patan Radhanpur Accident:પાટણ જિલ્લાના રાધનપુર-સમી રોડ પર ગોચનાદ ગામ નજીક ગંભીર માર્ગ અકસ્માતની ઘટના સામે આવી છે. ટ્રક અને કાર વચ્ચે થયેલી જોરદાર ટક્કરમાં સોની પરિવારના બે સભ્યોનાં ઘટનાસ્થળે જ મોત નીપજ્યાં હતાં, જ્યારે અન્ય ચાર લોકો ઇજાગ્રસ્ત થયા હતા. આ ઘટનાને પગલે વિસ્તારમાં ચકચાર મચી ગઈ હતી. પ્રાથમિક અહેવાલ મુજબ, પરિવાર દ્વારકાધીશનાં દર્શન કરીને ભાભર ખાતે રહેતી પોતાની દીકરીના ઘરે જઈ રહ્યો હતો, ત્યારે રસ્તામાં આ દુર્ઘટના સર્જાઈ હતી.
ગોચનાદ નજીક કાર અને ટ્રક વચ્ચે જોરદાર ટક્કર
પ્રાપ્ત વિગતો અનુસાર, મૂળ રાજસ્થાન ખાતે સ્થાયી થયેલો સોની પરિવાર હાલ ગુજરાતના પ્રવાસે આવ્યો હતો. આ પરિવારના સભ્યોએ સૌપ્રથમ દ્વારકા ખાતે પહોંચીને ભગવાન શ્રીકૃષ્ણ એટલે કે દ્વારકાધીશના ભક્તિભાવપૂર્વક દર્શન કર્યા હતા. દર્શન પૂર્ણ કર્યા બાદ આ ખુશખુશાલ પરિવાર પોતાની કાર લઈને ભાભર ખાતે રહેતી પોતાની દીકરીને મળવા તથા તેની સાથે સમય વિતાવવા માટે રવાના થયો હતો. જોકે, કુદરતને કંઈક અલગ જ મંજૂર હોય તેમ, રાધનપુર-સમી રોડ પર ગોચનાદ ગામ નજીક પહોંચતા જ તેમની કાર સામેથી પૂરપાટ ઝડપે આવી રહેલી એક ટ્રક સાથે ધડાકાભેર અથડાઈ હતી. આ ટક્કર એટલી જોરદાર હતી કે કારનો કચ્ચરઘાણ નીકળી ગયો હતો.
બે લોકોનાં ઘટનાસ્થળે જ મોત,ચાર ઇજાગ્રસ્તોને સારવાર માટે હોસ્પિટલ ખસેડાયા
આ ગંભીર માર્ગ અકસ્માતને પગલે હાઈવે પર થોડા સમય માટે અફરાતફરીનો માહોલ સર્જાઈ ગયો હતો. કારમાં સવાર સોની પરિવારના બે સભ્યોના ઘટનાસ્થળે જ કમકમાટીભર્યા મોત નીપજ્યા હતા, જ્યારે અન્ય ચાર વ્યક્તિઓ ગંભીર રીતે ઘાયલ થઈને લોહીલુહાણ હાલતમાં કારમાં ફસાઈ ગયા હતા. ઘટનાની જાણ થતાં આસપાસના લોકો મદદ માટે દોડી આવ્યા હતા. ત્યારબાદ સ્થાનિક પોલીસ પણ ઘટનાસ્થળે પહોંચી હતી. ઇજાગ્રસ્તોને તાત્કાલિક સારવાર માટે હોસ્પિટલમાં ખસેડવામાં આવ્યા હતા.
પોલીસ દ્વારા અકસ્માતની તપાસ શરૂ, મૃતદેહોને પોસ્ટમોર્ટમ અર્થે મોકલાયા
અકસ્માાતની જાણ થતાં સ્થાનિક પોલીસે ઘટનાસ્થળે પહોંચીને જરૂરી કાર્યવાહી હાથ ધરી હતી. પોલીસ અને સ્થાનિક ગ્રામજનોએ ભારે જહેમત બાદ ઈજાગ્રસ્તોને કારમાંથી બહાર કાઢ્યા હતા અને તાત્કાલિક સારવાર અર્થે નજીકની હોસ્પિટલમાં ખસેડ્યા હતા, જ્યાં હાલ તેમની સારવાર ચાલી રહી છે. બીજી તરફ, અકસ્માતમાં જીવ ગુમાવનાર બંને મૃતકોના મૃતદેહોને પોલીસે પોસ્ટમોર્ટમ અર્થે સમીની સરકારી હોસ્પિટલ ખાતે મોકલી આપ્યા છે. આ ગોઝારા અકસ્માતને કારણે સોની પરિવારમાં શોકનું મોજુ ફરી વળ્યું છે. પોલીસે આ મામલે ગુનો નોંધીને અકસ્માત કયા સંજોગોમાં સર્જાયો તેની વધુ કાયદેસરની તપાસ હાથ ધરી છે.
