Ahmedabad noise pollution: અમદાવાદમાં વધતા અવાજ પ્રદૂષણને લઈને નાગરિકોની પરેશાની સતત વધી રહી છે. મોડી રાત સુધી ચાલતા પાર્ટી પ્લોટ, ડીજે સાઉન્ડ સિસ્ટમ, જાહેર કાર્યક્રમો અને 24 કલાક ધમધમતા ઔદ્યોગિક એકમોના ઘોંઘાટથી કંટાળેલા અમદાવાદીઓએ છેલ્લા દસ મહિનામાં 112 ઇમરજન્સી હેલ્પલાઇન પર અવાજ પ્રદૂષણ અંગે 17,050 ફરિયાદો નોંધાવી છે. પોલીસ કંટ્રોલ રૂમના આંકડા પ્રમાણે, રાત્રે 10 વાગ્યા બાદ પણ નિયમોનું ઉલ્લંઘન કરતા ભારે અવાજ સામે કાર્યવાહી માટે દરરોજ સરેરાશ 55થી વધુ કોલ મળી રહ્યા છે. શહેરના કેટલાક રહેણાંક અને મિશ્ર વિસ્તારોમાં અવાજનું સ્તર નિર્ધારિત સલામત મર્યાદા કરતાં લગભગ બમણું હોવાનું પણ સામે આવ્યું છે.
મોડી રાતના ટ્રાફિકના હોર્નથી મુશ્કેલી વધી
પશ્ચિમ અમદાવાદમાં સિંધુ ભવન રોડ, એસ.જી. હાઇવે, બોડકદેવ, સેટેલાઇટ, વસ્ત્રાપુર અને પ્રહલાદનગર જેવા વિસ્તારોમાં પાર્ટી પ્લોટ, ઓપન-એર કેફે અને ક્લબ્સના કારણે મોડી રાત સુધી અવાજની ફરિયાદો થઈ રહી છે. પૂર્વ વિસ્તારમાં બાપુનગર, નિકોલ, ઓઢવ, નરોડા, અમરાઈવાડી અને વટવા ખાતે જાહેર સરઘસો, ધાર્મિક-સામાજિક કાર્યક્રમો તથા ઔદ્યોગિક એકમોના અવાજથી લોકો પરેશાન છે. જ્યારે કાલુપુર, દરિયાપુર, શાહપુર અને જમાલપુર જેવા જૂના શહેરના વિસ્તારોમાં સામાજિક પ્રસંગો, સાંકડી ગલીઓમાં ગુંજતા અવાજ અને મોડી રાતના ટ્રાફિકના હોર્નથી મુશ્કેલી વધી છે. વટવા GIDC, નરોડા GIDC, ઓઢવ GIDC, ચાંગોદર અને કઠવાડા જેવા ઔદ્યોગિક વિસ્તારોમાં ભારે મશીનરી, મધરાતના લોડિંગ-અનલોડિંગ અને ભારે વાહનોના અવાજ અંગે પણ સતત ફરિયાદો થઈ રહી છે.
શાંત વિસ્તારોમાં 50 અને 40 ડેસિબલ
નિયમો મુજબ રહેણાંક વિસ્તારોમાં દિવસ દરમિયાન અવાજની મર્યાદા 55 ડેસિબલ અને રાત્રે 45 ડેસિબલ નક્કી કરવામાં આવી છે. વાણિજ્યિક વિસ્તારો માટે આ મર્યાદા અનુક્રમે 65 અને 55 ડેસિબલ, ઔદ્યોગિક વિસ્તારો માટે 75 અને 70 ડેસિબલ, જ્યારે શાંત વિસ્તારોમાં 50 અને 40 ડેસિબલ છે. કાર્યક્રમોને મંજૂરી આપતા પહેલાં સ્થળની તપાસ અને અવાજના સ્તરની ચકાસણી કરવાની જોગવાઈ હોવા છતાં, વ્યવહારમાં અનેક સ્થળે યોગ્ય ચકાસણી થતી ન હોવાની ફરિયાદો છે. પોલીસ અધિકારીઓ પાસે પ્રમાણભૂત ડેસિબલ મીટર ઉપલબ્ધ ન હોવાના કારણે સ્થળ પર અવાજની કાયદાકીય મર્યાદા કરતાં વધુ હોવાનો વૈજ્ઞાનિક પુરાવો એકત્ર કરવામાં પણ મુશ્કેલી પડે છે.
શહેરમાં અવાજ પ્રદૂષણ અંગે મોટી સંખ્યામાં ફરિયાદો નોંધાઈ
આ સ્થિતિમાં મોડી રાત સુધી લાઉડસ્પીકર, ડીજે અને ઔદ્યોગિક મશીનરીના અવાજ વચ્ચે રહેતા નાગરિકો માટે 112 હેલ્પલાઇન ફરિયાદ કરવાનો મુખ્ય વિકલ્પ બની રહી છે. શહેરમાં અવાજ પ્રદૂષણ અંગે મોટી સંખ્યામાં ફરિયાદો નોંધાઈ રહી હોવા છતાં, અસરકારક કાર્યવાહી માટે નિયમિત સાઉન્ડ મોનિટરિંગ, સ્થળ તપાસ અને પ્રમાણભૂત ડેસિબલ મીટરની ઉપલબ્ધતા મહત્વપૂર્ણ બની છે. વધતી ફરિયાદો દર્શાવે છે કે અમદાવાદમાં અવાજ પ્રદૂષણ હવે માત્ર અસુવિધાનો મુદ્દો નહીં, પરંતુ શહેરી જીવનની ગુણવત્તા સાથે જોડાયેલો ગંભીર પ્રશ્ન બની રહ્યો છે.
