Raj Shah Influencer Nikol Dispute: અમદાવાદ શહેરના પૂર્વ વિસ્તાર ગણાતા નિકોલમાં આવેલી જાણીતી 'ડેન્ગી ડમ્સ' કેક શોપમાં એક અત્યંત સામાન્ય બાબતે ગ્રાહક અને દુકાનના કર્મચારી વચ્ચે મારામારી અને ગાળાગાળીનો બનાવ બન્યો છે. નિકોલ સ્થિત રાજહંસ સિનેમા નીચે આવેલા આ સ્ટોર પર કેક પર કયા રંગની ક્રીમથી નામ લખવું તે બાબતે ઉશ્કેરાયેલા ગ્રાહકે સેલ્સમેન સાથે બોલાચાલી કરીને ઝપાઝપી કરી હતી. આ સમગ્ર ઘટના દુકાનના અંદર લગાવેલા CCTVમાં કેદ થઈ ગઈ છે. આ ઘટના અંગે ભોગ બનનાર કર્મચારીએ સોશિયલ મીડિયા ઇન્ફ્લુએન્સર રાજ શાહ અને તેની સાથે આવેલા અજાણ્યા યુવકો સામે નિકોલ પોલીસ સ્ટેશનમાં લેખિત અરજી આપી છે.
લાલ ક્રીમ ઉપલબ્ધ ન હોવાનું જણાવતાં જ યુવકો ઉશ્કેરાયા
મળતી વિગતો મુજબ ન્યુ મણીનગર વિસ્તારમાં રહેતો 28 વર્ષીય શિવશંકર પનિરસેલ્વમ મુદલીયા છેલ્લા 10 વર્ષથી સેલ્સમેન તરીકે નોકરી કરે છે અને હાલ નિકોલની 'ડેન્ગી ડમ્સ' કેક શોપમાં ફરજ બજાવે છે. ગત 6 ઓક્ટોબરે રાત્રિના સમયે તે દુકાને હાજર હતો ત્યારે સોશિયલ મીડિયા ઇન્ફ્લુએન્સર રાજ શાહ પોતાના મિત્રો સાથે કેક ખરીદવા આવ્યો હતો. કર્મચારીએ તેમને સફેદ અક્ષરથી નામ લખેલી કેક આપી હતી પરંતુ, રાજ શાહે કેક પર લાલ રંગની ક્રીમથી નામ લખી આપવા હઠ પકડી હતી. કર્મચારીએ સ્ટોરમાં લાલ ક્રીમ ઉપલબ્ધ ન હોવાનું નમ્રતાપૂર્વક જણાવતાં જ રાજ શાહ અને તેના સાથીદારો ઉશ્કેરાઈ ગયા હતા અને ગાળો આપીને કર્મચારી પર તૂટી પડ્યા હતા.
'અત્યારે જ કંપની ખરીદીને તને નોકરીમાંથી કાઢી મૂકીશ'
પ્રાથમિક તપાસમાં સામે આવ્યું છે કે, આરોપી રાજ શાહ સોશિયલ મીડિયા પર સક્રિય હોવાની સાથે વિઝા કન્સલ્ટન્સીની કંપની ચલાવે છે. બનાવ દરમિયાન ઉશ્કેરાયેલા રાજ શાહે દાદાગીરી કરતા કર્મચારીને ધમકી આપી હતી કે "હું આ આખી કંપની અત્યારે જ ખરીદી લઉં તેમ છું અને તને તરત જ ફાયર કરી દઈશ." આટલું જ નહીં પરંતુ, કર્મચારી સાથે ઉગ્ર ઝપાઝપી કરીને જાનથી મારી નાખવાની ગાળો પણ ભાંડી હતી. કર્મચારીએ આ અંગે તરત જ પોતાના સ્ટોર મેનેજરને જાણ કરી હતી અને ત્યારબાદ નિકોલ પોલીસ સ્ટેશન પહોંચીને કાયદેસરની અરજી આપી હતી.
નિકોલ પોલીસ દ્વારા સીસીટીવી ફૂટેજના આધારે કાયદેસરની તપાસ શરૂ
બનાવ અંગે નિકોલ પોલીસ સ્ટેશનના પોલીસ ઇન્સ્પેક્ટર એસ.એ. દેસાઈએ જણાવ્યું હતું કે, કેક શોપના કર્મચારી શિવશંકર દ્વારા રાજ શાહ અને તેની સાથેના અન્ય અજાણ્યા યુવકો સામે અરજી સોંપવામાં આવી છે. પોલીસે ઘટનાસ્થળના CCTV કબજે કરીને સમગ્ર મામલે તપાસ હાથ ધરી છે. જો અરજદાર કર્મચારી સત્તાવાર FIR નોંધાવવા માટે માંગ કરશે તો ગુનો નોંધીને આરોપીઓ સામે BNSની સંબંધિત કલમો હેઠળ આકરી કાયદેસરની કાર્યવાહી કરવામાં આવશે.
જાહેર સ્થળોએ નાના કર્મચારીઓ સાથે ગેરવર્તણૂક અને ધમકીઓ સામે સુરક્ષાનો પ્રશ્ન
હાલના સમયમાં સોશિયલ મીડિયા ઇન્ફ્લુએન્સર કે પ્રભાવશાળી વ્યક્તિઓ દ્વારા નાની-નાની બાબતોમાં સર્વિસ સેક્ટર કે રિટેલ સ્ટોર્સમાં કામ કરતા સામાન્ય કર્મચારીઓ સાથે દાદાગીરી અને મારામારી કરવાના બનાવો વધી રહ્યા છે. આ અગાઉ પણ રેસ્ટોરન્ટ અને શોપિંગ મોલ્સમાં કસ્ટમર સર્વિસ કર્મચારીઓ સાથે મારામારીના કિસ્સાઓ સામે આવ્યા છે. કાયદાકીય નિષ્ણાતોના મતે, જાહેર સ્થળે ગાળાગાળી કરવી, હુમલો કરવો કે માનસિક ધમકી આપવી એ ગંભીર કાનૂની અપરાધ છે. આવી ઘટનાઓમાં સીસીટીવી પુરાવા તરીકે અત્યંત મહત્વપૂર્ણ ભૂમિકા ભજવે છે.
સોશિયલ મીડિયા પર CCTV વાયરલ થતાં લોકોમાં રોષ
કેક શોપમાં બનેલી આ ઘટનાના સીસીટીવી ફૂટેજ સોશિયલ મીડિયા પર વાયરલ થતાં જ લોકોમાં ભારે આક્રોશ જોવા મળી રહ્યો છે. નેટિઝન્સ દ્વારા માત્ર કેક પર ક્રીમના રંગ જેવા નજીવા કારણસર શ્રમજીવી કર્મચારી પર હુમલો કરનાર ઇન્ફ્લુએન્સર રાજ શાહ સામે સખત પોલીસ કાર્યવાહી કરવાની માંગ કરવામાં આવી રહી છે. રિટેલ સ્ટોર એસોસિએશન અને વેપારી મંડળો દ્વારા પણ સ્ટોર સ્ટાફની સુરક્ષા માટે પોલીસ પેટ્રોલિંગ વધારવા અને આવા તત્વો સામે દાખલારૂપ પગલાં ભરવાની રજૂઆત કરવામાં આવી છે.








