Rent a Garba partner: નવરાત્રિ એટલે મા જગદંબાની આરાધના સાથે ગરબાના તાલે ઝૂમવાનો ઉત્સવ. રંગબેરંગી પરિધાન, ઢોલના ધબકારા અને ગરબા ગ્રાઉન્ડ્સ પર જોવા મળતો ઉત્સાહ તહેવારને ખાસ બનાવે છે. પરંતુ આ જ ઉત્સાહનો લાભ લઈને સાયબર ઠગો લોકો સાથે છેતરપિંડી કરવા માટે નવા કીમિયા અજમાવી રહ્યા હોવાની ચેતવણી સામે આવી છે. સોશિયલ મીડિયા પર 'રેન્ટ અ ગરબા પાર્ટનર'ના નામે વાયરલ થતી પોસ્ટ્સ અને રીલ્સ સિંગલ ખેલૈયાઓ માટે સાયબર ફ્રોડનું કારણ બની શકે છે.
'મેલ-ફિમેલ ગરબા પાર્ટનર રેન્ટ પર મળશે'ની પોસ્ટ્સ વાયરલ
છેલ્લા કેટલાક દિવસોથી સોશિયલ મીડિયા પર નવરાત્રિ દરમિયાન ગરબા રમવા માટે 'મેલ-ફિમેલ પાર્ટનર રેન્ટ પર મળશે' તેવા દાવા કરતી પોસ્ટ્સ અને રીલ્સ જોવા મળી રહી છે. આવી ઓફર જોઈને કોઈ વ્યક્તિ પાર્ટનર હાયર કરવાનો પ્રયાસ કરે તો અજાણી વ્યક્તિ અથવા ફેક પ્રોફાઇલના સંપર્કમાં આવી શકે છે. આવી પ્રોફાઇલ દ્વારા પહેલા વાતચીત શરૂ કરીને ત્યારબાદ પેમેન્ટ, બુકિંગ અથવા વધુ માહિતીના નામે રૂપિયા માગવામાં આવે તેવી શક્યતા રહે છે. શંકાસ્પદ લિંક મોકલીને ફિશિંગ અથવા અન્ય પ્રકારની છેતરપિંડી કરવાનો પ્રયાસ પણ થઈ શકે છે.
અમદાવાદ સાયબર ક્રાઇમની સોશિયલ મીડિયા પર નજર
આ મામલે અમદાવાદ સાયબર ક્રાઇમની સોશિયલ મીડિયા મોનિટરિંગ ટીમ દ્વારા આવી પોસ્ટ્સ અને રીલ્સ પર નજર રાખવામાં આવી રહી હોવાનું જણાવાયું છે. ખાસ કરીને અમદાવાદ, સુરત અને મુંબઈના યુઝર્સમાં આવી સામગ્રી શેર થતી હોવાનું ધ્યાનમાં આવ્યું છે. અધિકારીઓના જણાવ્યા મુજબ, હાલ આ પ્રકારની પોસ્ટ્સને લઈને કોઈ સત્તાવાર ફરિયાદ નોંધાઈ નથી. જોકે, તહેવારો અને સોશિયલ મીડિયા ટ્રેન્ડનો ઉપયોગ કરીને સાયબર ગુનેગારો નવી મોડસ ઓપરેન્ડી અપનાવતા હોવાથી લોકોને સાવચેત રહેવાની અપીલ કરવામાં આવી છે.
અજાણી વ્યક્તિને પૈસા કે અંગત માહિતી ન આપો
સાયબર ક્રાઇમ દ્વારા લોકોને ખાસ કરીને સોશિયલ મીડિયા પર અજાણી પ્રોફાઇલ પર આંખ બંધ કરીને વિશ્વાસ ન કરવાની સલાહ આપવામાં આવી છે. 'ગરબા પાર્ટનર' મેળવવાના નામે કોઈ અજાણી વ્યક્તિને ઓનલાઈન પેમેન્ટ ન કરવું અને વ્યક્તિગત માહિતી, ફોટા કે અન્ય સંવેદનશીલ વિગતો શેર ન કરવી. જો કોઈ વ્યક્તિ પેમેન્ટ અથવા વધુ માહિતી માટે લિંક મોકલે તો તેના પર ક્લિક કરતા પહેલાં તેની વિશ્વસનીયતા ચકાસવી જરૂરી છે. શંકાસ્પદ લિંક ફિશિંગ માટે ઉપયોગમાં લેવાઈ શકે છે અને કેટલાક કિસ્સામાં વોટ્સએપ એકાઉન્ટ અથવા બેંકિંગ સંબંધિત માહિતી જોખમમાં મુકાઈ શકે છે.
ઠગાઈ થાય તો તરત 1930 પર સંપર્ક કરો
જો કોઈ વ્યક્તિ આવી પોસ્ટ અથવા પ્રોફાઇલના સંપર્કમાં આવ્યા બાદ છેતરપિંડીનો ભોગ બને, તો સમય બગાડ્યા વગર 1930 સાયબર હેલ્પલાઇન નંબર પર સંપર્ક કરવાની સલાહ આપવામાં આવી છે. જરૂર જણાય તો નજીકના સાયબર ક્રાઇમ પોલીસ સ્ટેશનનો પણ સંપર્ક કરી શકાય છે. નવરાત્રિના ઉત્સાહમાં કોઈપણ ઓનલાઈન ઓફર પર વિશ્વાસ કરતા પહેલાં પ્રોફાઇલ, વ્યક્તિ અને પેમેન્ટની વિગતોની યોગ્ય ચકાસણી કરવી જરૂરી છે. ગરબા પાર્ટનરની શોધમાં ઉત્સાહથી લેવાયેલું એક ખોટું પગલું નાણાકીય નુકસાન કે અન્ય મુશ્કેલીનું કારણ બની શકે છે.
સાયબર પોલીસ તપાસ કરી રહી છે
અમદાવાદ સાયબર ક્રાઇમના જણાવ્યા અનુસાર, સોશિયલ મીડિયા પર ચાલી રહેલા 'રેન્ટ અ પાર્ટનર' ટ્રેન્ડ અંગે તપાસ કરવામાં આવી રહી છે. આવી પોસ્ટ્સ પાછળ કોઈ ફ્રોડ અથવા ગેરકાયદેસર પ્રવૃત્તિનો હેતુ છે કે નહીં, તે અંગે પણ તપાસ ચાલી રહી હોવાનું અધિકારીઓએ જણાવ્યું છે. ખાસ કરીને પેમેન્ટ અથવા વધુ માહિતી મેળવવાના બહાને મોકલવામાં આવતી અજાણી લિંકથી સાવચેત રહેવાની અપીલ કરવામાં આવી છે. નવરાત્રિમાં ગરબાના તાલે મન મૂકીને ઝૂમો, પરંતુ સોશિયલ મીડિયા પર અજાણી ઓફર સામે સાવચેતી રાખવાનું ભૂલશો નહીં.
