Ahmedabad Air Pollution Rises: અમદાવાદમાં એક તરફ મા અંબાના ગરબા અને નવરાત્રિ પર્વની ધૂમધામથી ઉજવણી થઈ રહી છે, તો બીજી તરફ શહેરની હવાની ગુણવત્તા કથળતા નાગરિકો માટે ચિંતાજનક સ્થિતિ સર્જાઈ છે. ઉત્સવના વાતાવરણ વચ્ચે વાયુ પ્રદૂષણમાં થયેલા અચાનક વધારાને કારણે શહેર પર ધુમ્મસ અને પ્રદૂષણનું સામ્રાજ્ય છવાઈ ગયું છે. શહેરના મોટાભાગના વિસ્તારોમાં હવાની ગુણવત્તાનું સ્તર કથળતા લોકો શ્વાસ લેવામાં તકલીફ અનુભવી રહ્યા છે, જેનાથી ઉત્સવના આનંદ વચ્ચે આરોગ્યનું મોટું સંકટ ઊભું થયું છે.
ટ્રાફિકનો ધુમાડો અને ધૂળિયા રસ્તા બન્યા મુખ્ય કારણ
શહેરમાં પ્રદૂષણના આ ઉછાળા પાછળ મુખ્યત્વે બે પરિબળો જવાબદાર છે – એક તો શહેરમાં સતત વધી રહેલો વાહનોનો ટ્રાફિક અને બીજું ધૂળથી ભરેલા રસ્તાઓ. નવરાત્રિ દરમિયાન રાત્રિના સમયે લોકો ગરબા રમવા અને ફરવા નીકળતા હોવાથી રસ્તાઓ પર વાહનોની અવરજવર બમણી થઈ ગઈ છે. આ વાહનોમાંથી નીકળતો ઝેરી ધુમાડો અને રસ્તાઓ પરથી ઊડતા ધૂળના રજકણો હવામાં ભળતા વાતાવરણ વધારે ઝેરી બન્યું છે.
એરપોર્ટ અને બોપલ જેવા વિસ્તારોમાં AQI રેકોર્ડ સ્તરે
એર ક્વોલિટી ઇન્ડેક્સ (AQI)ના તાજેતરના આંકડા દર્શાવે છે કે અમદાવાદના વિવિધ વિસ્તારોમાં પ્રદૂષણનું સ્તર ભયજનક સપાટીએ પહોંચી ગયું છે. ખાસ કરીને અમદાવાદ એરપોર્ટ વિસ્તારમાં AQI 244 નોંધાયો છે, જે 'ખૂબ જ ખરાબ' (Very Poor) શ્રેણીમાં આવે છે. આ ઉપરાંત બોપલ જેવા વિકસતા વિસ્તારમાં પણ AQI 155 નોંધાયો છે, જે 'મધ્યમથી ખરાબ' શ્રેણીમાં ગણાય છે. આ સિવાય પશ્ચિમ અને પૂર્વ અમદાવાદના અનેક પોશ વિસ્તારોમાં પણ હવાની ગુણવત્તા સતત કથળી રહી છે.
હોસ્પિટલોમાં અસ્થમા અને સૂકી ખાંસીના દર્દીઓનો જમાવડો
હવાની ખરાબ ગુણવત્તાની સીધી અસર હવે નાગરિકોના સ્વાસ્થ્ય પર જોવા મળી રહી છે. તબીબોના જણાવ્યા અનુસાર, છેલ્લા કેટલાક દિવસોથી અસ્થમા, શ્વાસ લેવામાં તકલીફ, ગળામાં ઇન્ફેક્શન અને સૂકી ખાંસીના દર્દીઓમાં નોંધપાત્ર વધારો થયો છે. ખાસ કરીને નાના બાળકો, વયોવૃદ્ધો અને પહેલેથી જ શ્વસન સંબંધિત બીમારીઓ ધરાવતા લોકો માટે આ હવા અત્યંત જોખમી સાબિત થઈ રહી છે.
સત્તાવાળાઓ પાસે ત્વરિત પગલાં લેવાની ઉઠેલી માગ
શહેરમાં સતત બગડતી હવાની ગુણવત્તાને ધ્યાનમાં રાખીને નાગરિકો અને આરોગ્ય નિષ્ણાતો દ્વારા સ્થાનિક તંત્ર તથા મહાનગરપાલિકા પાસે કડક પગલાં લેવાની માગ કરવામાં આવી રહી છે. રસ્તાઓ પર પાણીનો છંટકાવ કરવો, ટ્રાફિક વ્યવસ્થા સુધારવી અને ધૂળ પર નિયંત્રણ મેળવવું અત્યંત જરૂરી બન્યું છે. તબીબોએ પણ લોકોને નવરાત્રિ દરમિયાન મોં પર માસ્ક પહેરવા અને પ્રદૂષિત વિસ્તારોમાં જવાનું ટાળવા અપીલ કરી છે.
