Navratri Gen-Z vacation: આગામી નવરાત્રી પર્વને લઈને ગુજરાતમાં ગરબાના આયોજન વચ્ચે હવે ‘GEN Z વેકેશન’ની માંગ ઉઠી છે. હિન્દુ સંગઠન ભગવા સેનાએ દલીલ કરી છે કે સરકાર દ્વારા વહેલી સવાર સુધી ગરબાની મંજૂરી આપવામાં આવે છે, જ્યારે શાળાઓનો સમય પણ વહેલી સવારે શરૂ થાય છે. સંગઠનના પ્રમુખ કમલ રાવલે સરકાર સમક્ષ માંગ કરી છે કે જો રાત્રિ દરમિયાન ગરબાને મંજૂરી આપવામાં આવે છે તો વિદ્યાર્થીઓને ધ્યાનમાં રાખીને નવરાત્રી દરમિયાન રજા અંગે પણ વિચાર કરવો જોઈએ.
બાળકો માટે શાળાનો સમય સવારે 7 વાગ્યાથી શરૂ થાય
ભગવા સેનાના જણાવ્યા મુજબ, કેટલીક જગ્યાએ સવારે 5 વાગ્યા સુધી ગરબા યોજાય છે અને ત્યારબાદ બાળકો માટે શાળાનો સમય સવારે 7 વાગ્યાથી શરૂ થાય છે. સંગઠનનો સવાલ છે કે આખી રાત ગરબામાં ભાગ લીધા બાદ બાળકો વહેલી સવારે શાળાએ કેવી રીતે જઈ શકશે? આ મુદ્દાને લઈને સંગઠને ‘GEN Z વેકેશન’ની માંગ કરી છે. જોકે, આ અંગે સરકાર દ્વારા કોઈ નિર્ણય જાહેર થયો હોવાની માહિતી આપવામાં આવી નથી.
ગરબા આયોજકોને પ્રવેશ વ્યવસ્થા વધુ કડક કરવાની અપીલ કરી
આ સાથે ભગવા સેનાએ નવરાત્રી દરમિયાન ‘વિધર્મી વિનાની નવરાત્રી’ની પણ માંગ કરી છે. સંગઠનના પ્રમુખે ‘લવ જેહાદ’ અંગે ચિંતા વ્યક્ત કરતાં ગરબા આયોજકોને પ્રવેશ વ્યવસ્થા વધુ કડક કરવાની અપીલ કરી છે. તેમના જણાવ્યા મુજબ, અગાઉ કેટલાક ગરબા સ્થળોએ આધારકાર્ડ ચેકિંગ અને તિલક જેવી વ્યવસ્થાઓનો ઉપયોગ કરવામાં આવતો હતો.
પ્રવેશ સંબંધિત શરતો અંગે લોકોને જાણ કરવામાં આવશે
કમલ રાવલના જણાવ્યા મુજબ, આ વર્ષે સંગઠન દ્વારા ગરબા સ્થળોએ પોસ્ટર લગાવીને પોતાની પ્રવેશ સંબંધિત શરતો અંગે લોકોને જાણ કરવામાં આવશે. તેમણે દાવો કર્યો છે કે સંગઠન કેટલાક પાર્ટી પ્લોટમાં ગાયક, વાદ્ય કલાકારો અને કેટરિંગ સ્ટાફ સહિત ગરબા આયોજન સાથે સંકળાયેલા લોકોની પણ ઓળખ ચકાસવાની માંગ કરશે. આ નિવેદનને લઈને નવરાત્રી દરમિયાન ગરબા સ્થળોએ પ્રવેશ અને ઓળખ ચકાસણીને લઈને ચર્ચા વધુ તેજ બનવાની શક્યતા છે.
આયોજકો દ્વારા અલગ-અલગ માંગણીઓ કરવામાં આવી
નવરાત્રી 11 ઓક્ટોબરથી શરૂ થવાની છે અને તે પહેલાં ગરબા આયોજન, સમયમર્યાદા, સુરક્ષા વ્યવસ્થા તથા પ્રવેશના નિયમોને લઈને વિવિધ સંગઠનો અને આયોજકો દ્વારા અલગ-અલગ માંગણીઓ કરવામાં આવી રહી છે. હવે ‘GEN Z વેકેશન’ અને પ્રવેશ વ્યવસ્થા અંગે સરકાર તથા સ્થાનિક પ્રશાસન શું નિર્ણય લે છે તેના પર નજર રહેશે.
